ᥝᥢᥰ (ᥑᥝᥲ ᥝᥣᥱ) (ᥟᥩᥐᥱ ᥝᥣᥱ) ᥖᥒᥰ (ᥐᥢᥱ ᥖᥨᥝᥰ)
ᥝᥢᥰ ᥑᥝᥲ ᥝᥣᥱ,ᥟᥩᥐᥱ ᥝᥣᥱ ᥖᥒᥰ ᥐᥢᥱ ᥖᥨᥝᥰ
ᥟᥣ ᥛᥥᥝᥰ ᥖᥭᥰ ᥙᥥᥢ ᥟᥣ ᥛᥥᥝᥰ ᥐᥨᥢᥰ ᥛᥫᥒᥰ ᥖᥒᥰ ᥘᥣᥭᥴ ᥕᥧᥛᥱ ᥕᥛ ᥕᥨᥝᥰ ᥖᥣᥢᥰ ᥙᥧᥖ ᥗᥣᥳ ᥔᥣᥱ ᥔᥣᥳ ᥘᥣᥱ ᥔᥣᥒᥱ ᥓᥨᥝᥱ ᥙᥧᥱ ᥘᥢᥳ,ᥘᥬᥰ ᥓᥬ ᥐᥨᥢᥰ ᥛᥫᥒᥰ ᥟᥣ ᥛᥥᥝᥰ ᥖᥭᥰ ᥛᥣᥖ ᥝᥣ,ᥙᥧᥖ ᥗᥣᥳ ᥔᥣᥱ ᥔᥢᥱ ᥘᥣᥱ ᥐᥦᥢᥱ ᥑᥫᥐ ᥔᥧᥒᥴ,ᥑᥫᥐ ᥑᥛᥱ ᥖᥩᥢᥰ ᥖᥫᥰ ᥖᥥᥳ ᥖᥥᥳ.ᥙᥧᥖ ᥗᥣᥳ ᥔᥣᥱ ᥔᥢᥱ ᥘᥣᥱ ᥔᥩᥒᥴ ᥘᥥᥴ ᥐᥨᥢᥰ ᥖᥒᥰ ᥘᥣᥭᥴ ᥙᥦᥖ ᥓᥣᥳ ᥑᥣᥴ ᥘᥤ, ᥐᥩᥭᥰ ᥔᥧᥲ ᥖᥒᥲ ᥓᥬ ᥖᥒᥲ ᥑᥨᥝᥰ ᥔᥥᥰ ᥑᥣᥛᥱ,ᥔᥤᥒᥲ ᥐᥣᥛᥱ ᥔᥥᥴ ᥓᥝᥱ ᥑᥝᥲ ᥘᥭᥲ "ᥛᥫᥒᥰ ᥘᥤᥰ ᥙᥣᥢᥰ"
ᥓᥨᥝ ᥞᥪᥒᥴ ᥑᥣᥝᥰ ᥕᥣᥝᥰ ᥛᥣᥰ, ᥑᥣᥛᥰ ᥛᥣᥭᥴ ᥖᥣᥰ ᥘᥣᥰ ᥖᥒᥰ ᥞᥩᥭ ᥙᥦᥒ ᥙᥧᥖ ᥗᥣᥳ ᥔᥣᥱ ᥔᥣᥳ ᥘᥣᥱ ᥙᥩᥰ ᥐᥫᥐᥱ ᥑᥨᥢᥰ ᥑᥝᥲ ᥘᥬᥰ ᥛᥫ ᥝᥢᥰ ᥓᥣᥛᥱ ᥓᥣᥰ ᥑᥩᥒᥴ ᥐᥨᥢᥰ ᥛᥫᥒᥰ ᥟᥣ ᥛᥥᥝᥰ ᥖᥭᥰ,ᥘᥩᥒ ᥕᥧᥛᥱ ᥕᥛ ᥚᥣᥰ ᥘᥣᥰ,ᥑᥨᥙ ᥝᥭ ᥕᥨᥝᥰ ᥐᥧᥒᥱ ᥚᥣᥰ ᥘᥣᥰ ᥟᥥᥐᥱ ᥖᥒᥰ ᥐᥛ ᥔᥤᥢᥴ ᥔᥥᥰ ᥑᥣᥛᥱ ᥘᥢᥳ ᥙᥩᥰ ᥙᥥᥢ ᥘᥩᥒ ᥞᥥᥖᥱ ᥖᥣᥒᥰ ᥙᥩᥒ ᥓᥩᥛᥰ ᥓᥬ ᥓᥩᥛᥰ ᥑᥨᥝᥰ ᥟᥢ ᥕᥥᥒᥰ ᥞᥣᥴ ᥘᥩᥒ ᥟᥣᥒᥲ ᥖᥣᥒᥰ ᥟᥥᥴ ᥑᥩᥒᥴ ᥖᥐ ᥐᥣᥱ ᥟᥣ ᥛᥥᥝᥰ ᥖᥭᥰ ᥘᥢᥳ ᥕᥝᥳ.ᥐᥩᥙ ᥙᥫ ᥘᥭᥴ,"ᥑᥝᥲ ᥝᥣᥱ"ᥟᥩᥐᥱ ᥝᥣᥱ "ᥖᥒᥰ ᥐᥢᥱ ᥖᥨᥝᥰ ᥐᥦᥢᥱ ᥙᥥᥢ ᥝᥢᥰ ᥙᥩᥭᥰ ᥑᥩᥒᥴ ᥟᥣ ᥛᥥᥝᥰ ᥖᥭᥰ ᥟᥢ ᥔᥤᥖ ᥖᥤᥳ ᥑᥫᥐ ᥑᥥᥒ ᥟᥥᥐᥱ ᥔᥛᥳ ᥛᥨᥢ ᥖᥩᥢᥰ ᥘᥨᥒᥴ ᥘᥣᥒᥴ ᥘᥢᥳ.
1.ᥙᥧᥛᥱ ᥔᥪᥙ ᥑᥭ ᥑᥝᥲ ᥝᥣᥱ ᥖᥒᥰ ᥟᥩᥐᥱ ᥝᥣᥱ ᥙᥧᥛᥱ ᥔᥪᥙ ᥑᥭ ᥐᥢ ᥝᥣ,ᥛᥤᥰ ᥙᥩᥐ ᥘᥫᥒ,ᥚᥣᥰ ᥘᥣᥰ ᥙᥥᥢ ᥓᥝᥲ ᥐᥨᥝᥰ ᥖᥛᥰ ᥛᥣᥰ ᥐᥣᥱ ᥑᥨᥒᥰ ᥜᥣᥳ ᥖᥣᥱ ᥝᥣᥳ ᥖᥤᥒᥱ ᥔᥣᥱ ᥞᥨᥝᥰ ᥗᥛᥰ ᥖᥒ ᥘᥣᥖ ᥑᥭ ᥖᥣᥰ ᥘᥣᥰ ᥞᥬᥲ ᥘᥣ ᥑᥛᥰ ᥛᥥ ᥟᥩᥐᥱ ᥛᥢᥰ ᥓᥝᥲ ᥔᥣᥛᥴ ᥘᥫᥢ.ᥖᥙ ᥙᥥᥰ ᥖᥒᥰ ᥘᥣᥭᥴ ᥓᥫᥰ ᥕᥧᥱ ᥑᥨᥒᥰ ᥐᥣᥒ ᥐᥨᥢᥰ ᥘᥢᥳ ᥖᥩ ᥟᥩᥐᥱ ᥘᥬᥰ ᥓᥩᥒᥰ ᥐᥣᥱ ᥖᥧᥒᥰ ᥘᥧᥱ ᥖᥧᥒᥰ ᥔᥩᥛᥰ,ᥙᥫ ᥟᥢ ᥐᥨᥢᥰ ᥘᥣᥭᥴ ᥘᥨᥢᥳ ᥖᥣᥒᥰ ᥚᥣᥭᥱ ᥙᥭ,ᥔᥣᥒᥱ ᥑᥣᥱ ᥕᥥᥙᥱ ᥐᥨᥝ ᥑᥝᥲ ᥖᥣᥭ ᥘᥛᥴ ᥘᥣᥭᥴ.ᥚᥣᥰ ᥘᥣᥰ ᥙᥥᥢ ᥓᥝᥲ ᥝᥣᥭᥱ ᥙᥩᥐ ᥑᥨᥒᥰ ᥐᥣᥒ ᥑᥨᥒᥰ ᥐᥨᥢᥰ,ᥘᥭᥲ ᥞᥧᥳ ᥞᥢᥴ ᥗᥪᥒᥴ ᥔᥣᥱ ᥚᥣᥙ ᥘᥩᥒ ᥖᥣᥒᥰ ᥞᥨᥝᥴ ᥘᥭᥳ ᥔᥥᥴ,ᥐᥦᥢᥱ ᥟᥤᥴ ᥘᥧᥴ ᥐᥨᥢᥰ ᥛᥫᥒᥰ ᥕᥣᥙᥱ ᥘᥪᥒᥴ ᥞᥥᥖᥱ ᥐᥣᥢ ᥘᥢᥳ ᥖᥥᥳ ᥖᥥᥳ.ᥙᥫ ᥘᥭᥴ ᥚᥣᥰ ᥘᥣᥰ ᥙᥥᥢ ᥓᥝᥲ ᥓᥒᥱ ᥙᥨᥒ ᥑᥨᥝᥲ ᥛᥐᥴ ᥛᥣᥭᥴ ᥝᥣ: ᥘᥬᥰ ᥐᥣ ᥔᥣᥛᥴ ᥘᥫᥢ ᥐᥧ ᥙᥤ ᥟᥢ ᥛᥢᥰ ᥓᥝᥲ ᥐᥣᥱ ᥑᥨᥒᥰ ᥜᥣᥳ ᥖᥣᥱ ᥝᥣᥳ ᥖᥤᥒᥱ ᥔᥣᥱ ᥞᥨᥝᥰ ᥗᥛᥰ ᥖᥒᥰ ᥘᥣᥖ ᥑᥭ ᥞᥨᥝᥰ ᥖᥣᥰ ᥘᥣᥰ ᥘᥢᥳ, ᥟᥛᥱ ᥟᥣ ᥘᥧᥳ ᥕᥣᥖ ᥞᥬᥲ ᥖᥣ ᥙᥥᥰ ᥖᥒᥰ ᥘᥣᥭᥴ ᥟᥩᥐᥱ ᥙᥭ ᥙᥣᥲ ᥘᥩᥐ ᥖᥧᥒᥰ ᥘᥧᥱ ᥖᥧᥒᥰ ᥔᥩᥛᥰ, ᥐᥩᥭᥰ ᥞᥬᥲ ᥖᥧᥒᥰ ᥔᥤᥢᥴ ᥐᥛ ᥗᥛᥰ ᥔᥥᥰ ᥑᥣᥛᥱ ᥖᥤ ᥘᥬᥰ ᥓᥩᥒᥰ.ᥖᥥᥰ ᥖᥣᥛᥰ ᥕᥣᥛᥰ ᥘᥢᥳ,ᥘᥬᥰ ᥘᥒᥱ ᥔᥣᥛᥴ ᥘᥫᥢ ᥟᥢ ᥖᥧᥒᥰ ᥔᥤᥢᥴ ᥐᥛ ᥗᥛᥰ ᥔᥥᥰ ᥑᥣᥛᥱ ᥖᥤ ᥘᥬᥰ ᥓᥩᥒᥰ ᥘᥢᥳ, ᥓᥒᥱ ᥞᥥᥐ ᥝᥣ "ᥑᥝᥲ ᥚᥢ ᥔᥣᥴ"ᥛᥝᥱ ᥘᥢᥴ "ᥑᥝᥲ ᥝᥖ ᥝᥣᥱ" ᥖᥭᥰ ᥖᥬᥲ ᥑᥨᥒᥰ ᥔᥛᥳ ᥞᥥᥐ ᥒᥣᥭ ᥒᥣᥭ ᥝᥣ " ᥑᥝᥲ ᥝᥣᥱ" ᥝᥢᥰ ᥚᥣᥰ ᥘᥣᥰ ᥙᥥᥢ ᥓᥝᥲ ᥝᥣᥭᥱ ᥙᥩᥐ ᥑᥨᥒᥰ ᥐᥣᥒ ᥑᥨᥒᥰ ᥐᥨᥢᥰ,ᥟᥣ ᥘᥧᥳ ᥕᥣᥖ ᥞᥬᥲ ᥖᥣ ᥙᥥᥰ ᥖᥒᥰ ᥘᥣᥭᥴ ᥟᥩᥐᥱ ᥙᥭ ᥙᥣᥲ ᥘᥩᥐ ᥖᥧᥒᥰ ᥘᥧᥱ ᥖᥧᥒᥰ ᥔᥩᥛᥰ ᥘᥢᥳ, ᥔᥛᥳ ᥞᥥᥐ ᥝᥣ " ᥟᥩᥐᥱ ᥚᥢ ᥔᥣᥴ"ᥛᥝᥱ ᥘᥢᥴ " ᥟᥩᥐᥱ ᥝᥖ ᥝᥣᥱ"ᥖᥭᥰ ᥖᥬᥲ ᥑᥨᥒᥰ ᥔᥛᥳ ᥞᥥᥐ ᥒᥣᥭ ᥒᥣᥭ ᥝᥣ " ᥟᥩᥐᥱ ᥝᥣᥱ".
2.ᥙᥩᥭᥰ ᥗᥣᥛᥰ ᥙᥩᥒ ᥑᥝᥲ ᥝᥣᥱ,ᥟᥩᥐᥱ ᥝᥣᥱ ᥖᥒᥰ ᥐᥢᥱ ᥖᥨᥝᥰ ᥘᥐᥴ ᥘᥤᥲ ᥙᥤ ᥖᥭᥰ ᥘᥫᥢ 9 ᥘᥭᥲ 15 ᥝᥢᥰ ( ᥘᥨᥒᥳ ᥘᥤᥲ ᥘᥫᥢ 6 ᥘᥭᥲ 15 ᥝᥢᥰ)ᥐᥧ ᥙᥤ ᥖᥥᥰ " ᥑᥝᥲ ᥝᥣᥱ ", ᥑᥤᥒᥱ ᥛᥫ ᥘᥬᥰ ᥝᥣᥱ 3 ᥘᥫᥢ, ᥘᥐᥴ ᥘᥤᥲ ᥙᥤ ᥖᥭᥰ ᥘᥫᥢ 12 ᥘᥭᥲ 15 ᥝᥢᥰ ( ᥘᥨᥒᥳ ᥘᥤᥲ ᥘᥫᥢ 9 ᥘᥭᥲ 15 ᥝᥢᥰ) ᥟᥩᥐᥱ ᥝᥣᥱ, ᥐᥙᥴ ᥖᥣᥛᥰ ᥘᥣᥛᥰ ᥛᥣᥰ ᥔᥛᥳ " ᥐᥢᥱ ᥖᥨᥝᥰ " .ᥙᥩᥭᥰ ᥗᥣᥛᥰ ᥙᥩᥒ "ᥑᥝᥲ ᥝᥣᥱ"ᥟᥩᥐᥱ ᥝᥣᥱ"ᥖᥒᥰ "ᥐᥢᥱ ᥖᥨᥝᥰ" ᥑᥩᥒᥴ ᥟᥣ ᥛᥥᥝᥰ ᥖᥭᥰ,ᥔᥤᥖ ᥖᥤᥳ ᥑᥫᥐ ᥑᥥᥒ ᥟᥥᥐᥱ ᥔᥛᥳ ᥛᥨᥢ ᥖᥩᥢᥰ ᥘᥨᥒᥴ ᥘᥣᥒᥴ.
"ᥑᥝᥲ ᥝᥣᥱ "ᥝᥢᥰ ᥘᥭᥳ,ᥖᥐ ᥐᥣᥱ ᥖᥒᥰ ᥘᥣᥭᥴ ᥔᥧᥲ ᥘᥨᥝᥱ ᥟᥣᥙᥱ ᥘᥛᥳ,ᥘᥣᥭ ᥗᥭᥱ ᥔᥫᥲ ᥑᥨᥝᥰ ᥔᥥᥴ,ᥓᥒᥱ ᥟᥝ ᥕᥣᥲ ᥚᥝᥴ,ᥖᥥᥢᥰ,ᥛᥩᥐᥱ ᥕᥣᥲ,ᥑᥝᥲ ᥔᥩᥛᥰ, ᥓᥫᥰ ᥘᥭᥳ ᥙᥣᥰ ᥐᥣᥱ ᥘᥬᥰ ᥓᥩᥒᥰ ᥘᥧᥱ ᥖᥣᥢᥰ ᥚᥣᥰ ᥘᥣᥰ ᥟᥥᥐᥱ ᥜᥒᥰ ᥗᥩᥛᥱ ᥔᥤᥢᥴ ᥗᥛᥰ ,ᥖᥧᥒᥰ ᥞᥙ ᥑᥣᥛᥰ ᥔᥩᥖ ᥔᥩᥢᥴ.ᥑᥤᥒᥱ ᥛᥫ ᥘᥬᥰ ᥝᥣᥱ ᥔᥣᥛᥴ ᥘᥫᥢ,ᥔᥣᥒᥱ ᥑᥣᥱ ᥕᥣ ᥞᥣᥢᥰ ᥖᥒᥰ ᥔᥤᥒᥲ ᥖᥒᥰ ᥛᥨᥖᥴ ᥔᥧᥲ ᥕᥧᥱ ᥘᥬᥰ ᥓᥩᥒᥰ ᥔᥥᥰ ᥑᥣᥛᥱ ᥘᥤᥛᥴ ᥘᥒ;ᥛᥫ ᥟᥩᥢ ᥖᥥᥰ "ᥝᥢᥰ ᥔᥤᥢᥴ " ᥖᥐ ᥐᥣᥱ ᥟᥣ ᥛᥥᥝᥰ ᥖᥭᥰ ᥓᥒᥱ ᥐᥣᥱ ᥘᥬᥰ ᥓᥩᥒᥰ ᥐᥤᥢ ᥐᥛ ᥖᥧᥒᥰ ᥔᥤᥢᥴ ᥔᥥᥰ ᥑᥣᥛᥱ . ᥐᥩᥲ ᥓᥝᥱ ᥓᥬ ᥝᥣ,ᥑᥤᥒᥱ ᥛᥫ ᥘᥬᥰ ᥝᥣᥱ ᥝᥢᥰ 14, 15 ,ᥝᥢᥰ 22 , 23 , ᥝᥢᥰ 29, 30.( ᥘᥫᥢ ᥟᥩᥐᥱ ᥖᥣᥛᥰ "ᥝᥢᥰ ᥔᥤᥢᥴ ᥛᥐᥴ ᥛᥣᥭᥴ),ᥝᥢᥰ 7, 8,ᥖᥩ ᥐᥣᥱ ᥖᥩᥛ ᥘᥬᥰ ᥓᥩᥒᥰ ᥐᥤᥢ ᥘᥩᥢᥰ ᥔᥥᥰ ᥑᥣᥛᥱ,ᥘᥧᥱ ᥖᥣᥢᥰ ᥚᥣᥰ ᥘᥣᥰ ᥑᥤᥒᥱ ᥛᥫ ᥘᥬᥰ ᥝᥣᥱ ᥔᥣᥛᥴ ᥘᥫᥢ,ᥓᥩᥒᥰ ᥟᥧᥰ ᥚᥣᥰ ᥐᥣᥱ ᥟᥣ ᥛᥥᥝᥰ ᥖᥭᥰ ᥖᥒᥰ ᥘᥣᥭᥴ ᥕᥒ ᥔᥣᥒᥲ ᥞᥫᥢᥰ ᥐᥨᥝᥱ ᥕᥥᥰ ᥘᥭᥲ,ᥐᥩᥲ ᥕᥒ ᥞᥥᥖᥱ ᥑᥦᥐᥱ ᥙᥥᥢ ᥞᥫᥢᥰ ᥘᥭᥲ.
ᥝᥢᥰ " ᥟᥩᥐᥱ ᥝᥣᥱ" ᥖᥒᥰ " ᥐᥢᥱ ᥖᥨᥝᥰ "ᥝᥣᥒ ᥘᥣᥭ ᥖᥩ ᥐᥙᥴ ᥖᥣᥛᥰ ᥘᥣᥛᥰ ᥐᥢ ᥕᥨᥐ ᥞᥥᥖᥱ ᥕᥨᥐ ᥙᥩᥒ.ᥝᥢᥰ " ᥟᥩᥐᥱ ᥝᥣᥱ" ᥖᥒᥰ"ᥐᥢᥱ ᥖᥨᥝᥰ" ᥘᥥᥐ ᥘᥧᥛᥱ ᥗᥝᥲ ᥔᥣᥛᥴ ᥐᥣᥙ ᥑᥩᥒᥴ ᥟᥣ ᥛᥥᥝᥰ ᥖᥭᥰ ᥖᥩ ᥐᥣᥱ ᥖᥫᥳ ᥑᥝᥲ ᥙᥩᥭᥰ ᥗᥣᥛᥰ ᥙᥩᥒ ᥗᥝᥴ ᥙᥫᥒ ᥐᥣᥢ ᥖᥤ ᥘᥬᥰ ᥓᥩᥒᥰ.ᥙᥩᥭᥰ ᥗᥣᥛᥰ ᥙᥩᥒ ᥗᥝᥴ ᥙᥫᥒ ᥐᥣᥢ ᥖᥤ ᥘᥐᥴ ᥖᥣᥛᥰ ᥓᥩᥛᥰ ᥔᥣᥛᥴ ᥚᥣᥭᥱ ᥘᥭᥳ ᥛᥣᥰ ᥕᥨᥐ ᥞᥥᥖᥱ ᥕᥨᥐ ᥙᥩᥒ: ᥙᥫᥒ ᥘᥫᥒ ᥘᥧᥱ ᥖᥣᥢᥰ ᥚᥣᥰ ᥘᥣᥰ ᥖᥒᥰ ᥑᥨᥙ ᥝᥭ ᥕᥨᥝᥰ ᥐᥧᥒᥱ ᥚᥣᥰ ᥘᥣᥰ,ᥖᥣᥒᥱ ᥛᥣᥖ ᥕᥩᥢᥰ ᥗᥦᥢᥲ ᥐᥧᥰ ᥔᥨᥝᥱ; ᥙᥫᥒ ᥔᥩᥒᥴ ᥞᥨᥛᥴ ᥓᥨᥛᥰ ᥙᥩᥭᥰ ᥗᥣᥛᥰ ᥙᥩᥒ ᥖᥧᥒᥰ ᥔᥤᥢᥴ ᥔᥥᥰ ᥑᥣᥛᥱ ᥖᥤ ᥑᥤᥒᥱ ᥛᥫ ᥘᥬᥰ ᥝᥣᥱ ᥔᥣᥛᥴ ᥘᥫᥢ ᥘᥢᥳ ᥕᥝᥳ ᥓᥩᥖᥱ ᥞᥩᥖ ᥙᥣᥭ; ᥙᥫᥒ ᥔᥣᥛᥴ " ᥐᥢᥱ ᥖᥨᥝᥰ" ᥘᥩᥒ ᥞᥥᥖᥱ ᥖᥣᥒᥰ ᥙᥩᥒ ᥓᥫᥰ ᥞᥥᥖᥱ ᥚᥤᥖᥴ ᥛᥤᥖᥴ ᥙᥫᥒ ᥖᥨᥝᥱ ᥑᥩᥛᥰ ᥛᥣᥭᥴ ᥖᥣᥰ ᥘᥣᥰ ᥖᥒᥰ ᥞᥩᥭ ᥙᥦᥒ ᥙᥧᥖ ᥗᥣᥳ ᥔᥣᥱ ᥔᥣᥳ ᥘᥣᥱ ᥘᥢᥳ.