ᥘᥩᥒᥴ ᥐᥝᥲ ᥘᥣᥢᥳ
ᥕᥧᥱ ᥖᥤ ᥘᥩᥒᥴ ᥖᥝᥰ ᥘᥦᥒ ᥘᥬᥰ ᥔᥦᥢᥱ ᥛᥫᥒᥰ ᥛᥣᥝᥰ ᥘᥢᥳ，ᥛᥤᥰ ᥘᥩᥒᥴ ᥞᥨᥭᥱ ᥘᥫᥒ ᥞᥩᥒᥳ ᥝᥣ ᥘᥩᥒᥴ ᥐᥝᥲ ᥘᥣᥢᥳ，ᥟᥣ ᥙᥧᥛᥱ ᥘᥩᥒᥴ ᥐᥝᥲ ᥘᥣᥢᥳ ᥓᥛᥰ ᥐᥨᥢᥰ ᥗᥝᥲ ᥖᥨᥝ ᥐᥭᥳ ᥑᥨᥢᥳ ᥑᥭ ᥕᥧᥱ。
ᥛᥫ ᥓᥝᥳ ᥘᥢᥳ ᥛᥤᥰ ᥑᥧᥢᥴ ᥞᥨᥝᥴ ᥑᥛᥰ ᥐᥨᥝᥳ ᥘᥫᥒ，ᥘᥬᥰ ᥛᥫᥒᥰ ᥛᥢᥰ ᥒᥛᥰ ᥙᥫᥒᥱ ᥘᥢᥳ ᥛᥤᥰ ᥘᥩᥒᥴ ᥝᥭᥳ ᥙᥦᥖᥱ ᥞᥨᥭᥱ。ᥐᥩᥭᥰ ᥝᥣ ᥘᥩᥒᥴ ᥓᥫᥰᥘᥭᥳ ᥛᥤᥰ ᥘᥩᥒᥴ ᥞᥨᥭᥱ ᥘᥫᥒ ᥕᥬᥱ ᥔᥤᥴ ᥙᥫᥢ，ᥑᥧᥢᥴ ᥞᥨᥝᥴ ᥑᥛᥰ ᥕᥧᥱ ᥘᥬᥰ ᥙᥣᥒ ᥟᥥᥢᥲ ᥙᥥᥝᥱ ᥟᥥᥢᥲ ᥛᥨᥢ ᥘᥢᥳ ᥖᥫᥳ ᥘᥧᥐ ᥘᥥᥒᥳ ᥛᥢᥰ ᥓᥫᥰ ᥘᥢᥳ ᥝᥣ：“ᥘᥧᥐ ᥘᥥᥒᥳ ᥓᥫᥰ ᥘᥭᥳ，ᥚᥬᥴ ᥛᥤᥰ ᥙᥦᥒᥱ ᥕᥣᥱ ᥛᥣᥰ ᥖᥨᥒ ᥘᥛᥳ ᥘᥬᥰ ᥘᥩᥒᥴ ᥘᥭᥳ ᥛᥤᥰ ᥘᥣᥭᥴ ᥞᥣᥙᥱ？ᥚᥩᥒᥰ ᥚᥬᥴ ᥖᥨᥒ ᥘᥭᥲ ᥘᥛᥳ ᥘᥬᥰ ᥘᥩᥒᥴ ᥞᥨᥭᥱ ᥘᥭᥳ，ᥐᥝ ᥞᥬᥲ ᥛᥢᥰ ᥙᥧᥖ ᥑᥨᥝᥰ ᥞᥫᥢᥰ ᥐᥝ ᥞᥭᥳ。”ᥘᥧᥐ ᥘᥥᥒᥳ ᥛᥢᥰ ᥓᥫᥰ ᥘᥢᥳ ᥚᥬᥴ ᥐᥩᥲ ᥕᥒ ᥑᥬᥲ ᥓᥬ ᥘᥭᥲ ᥟᥩᥐᥱ ᥙᥦᥒᥱ ᥕᥣᥱ ᥔᥒᥴ ᥛᥣᥰ。ᥘᥩᥒ ᥖᥣᥒᥰ ᥘᥣᥒᥴ ᥘᥭᥳ ᥑᥭ ᥞᥩᥖ ᥗᥪᥒᥴ ᥞᥧᥰ ᥓᥝᥲ ᥐᥧᥒᥱ ᥛᥣᥱ ᥘᥣᥱ ᥘᥥᥴ，ᥓᥝᥲ ᥐᥧᥒᥱ ᥛᥣᥱ ᥓᥝᥱ ᥑᥝᥲ ᥘᥬᥰ ᥞᥣᥒᥲ ᥘᥬᥰ ᥞᥨᥝᥴ ᥛᥣᥰ ᥓᥧᥰ ᥑᥧᥢᥴ ᥞᥨᥝᥴ ᥑᥛᥰ，ᥓᥝᥲ ᥐᥧᥒᥱ ᥛᥣᥱ ᥖᥫᥳ ᥑᥧᥢᥴ ᥞᥨᥝᥴ ᥑᥛᥰ ᥝᥣ：“ᥓᥝᥲ ᥞᥨᥝᥴ ᥑᥛᥰ，ᥘᥩᥒᥴ ᥞᥨᥭᥱ ᥕᥬᥱ ᥘᥭᥳ ᥓᥛᥰ，ᥘᥛᥳ ᥘᥬᥰ ᥘᥩᥒᥴ ᥘᥢᥳ ᥖᥒᥰ ᥛᥨᥖᥴ ᥛᥤᥰ ᥐᥝᥲ ᥘᥣᥢᥳ ᥞᥣᥙᥱ，ᥚᥩᥒᥰ ᥝᥣ ᥛᥬᥰ ᥕᥒ ᥕᥧᥛᥱ ᥓᥛᥰ，ᥛᥬᥰ ᥟᥝ ᥗᥧᥒᥰ ᥐᥣᥱ ᥖᥥᥐ ᥖᥨᥭᥰ ᥘᥦᥰ，ᥓᥬ ᥟᥛᥱ ᥓᥬ ᥛᥤᥰ ᥐᥝᥲ ᥘᥣᥢᥳ ᥞᥣᥙᥱ。”ᥞᥥᥖᥱ ᥞᥬᥲ ᥑᥧᥢᥴ ᥞᥨᥝᥴ ᥑᥛᥰ ᥐᥛᥳ ᥐᥣᥒᥰ ᥟᥛ ᥔᥥᥒᥴ ᥔᥣᥒᥰ ᥔᥩᥢᥱ ᥘᥬᥰ ᥓᥬ ᥝᥭᥳ：“ᥘᥛᥳ ᥘᥬᥰ ᥘᥩᥒᥴ ᥘᥭᥳ ᥛᥤᥰ ᥐᥝᥲ ᥘᥣᥢᥳ ᥞᥣᥙᥱ，ᥚᥬᥴ ᥔᥛᥳ ᥖᥤᥴ ᥞᥪᥴ ᥛᥣᥰ ᥖᥨᥒ ᥘᥭᥲ ᥘᥩᥰ。”
ᥟᥣ ᥙᥧᥛᥱ ᥘᥣᥒᥴ ᥘᥭᥳ ᥑᥭ ᥔᥩᥢᥳ ᥖᥨᥐᥱ ᥛᥣᥰ ᥖᥨᥝᥱ ᥓᥒᥱ ᥘᥭᥳ ᥞᥝᥳ。
ᥛᥣᥢᥱ ᥘᥦᥒᥴ ᥗᥧᥢᥰ ᥓᥥᥙᥱ ᥞᥩᥛᥴ