ᥗᥦᥛᥰ ᥙᥣ ᥘᥥᥐᥳ:In the news
ᥓᥧᥛᥰ ᥘᥧᥛᥰ ᥝᥤᥖ ᥓᥣᥱ ᥟᥣ ᥛᥥᥝᥰ ᥖᥭᥰ ᥖᥬᥲ ᥑᥨᥒᥰ ᥙᥩᥒ ᥞᥥᥖᥱ ᥐᥣᥢ ᥔᥩᥢᥴ ᥘᥣᥭᥰ ᥖᥭᥰ ᥗᥝᥲ ᥗᥪᥒᥴ ᥖᥤ ᥙᥩᥒ ᥞᥥᥖᥱ ᥞᥦᥴ 15 ᥝᥢᥰ ᥑᥣᥝᥰ 2 ᥝᥢᥰ ᥙᥨᥢᥳ ᥘᥢᥳ ᥑᥩᥖᥱ ᥔᥣᥰ. ᥓᥫᥝ ᥓᥫᥢᥱ ᥔᥥᥲ ᥖᥣᥒᥰ ᥓᥧᥰ ᥔᥥᥲ ᥡᥫᥢᥳ ᥕᥦᥢᥳ ᥘᥤᥲ ᥓᥧ ᥓᥣᥒᥰ ᥑᥨᥭᥱ ᥓᥣᥒᥰ ᥘᥬᥰ ᥘᥧᥛᥰ ᥝᥤᥖ ᥓᥣᥱ ᥟᥣ ᥛᥥᥝᥰ ᥖᥭᥰ ᥖᥬᥲ ᥑᥨᥒᥰ ᥘᥤᥰ ᥔᥤᥲ ᥐᥣᥱ ᥖᥫᥳ ᥑᥝᥲ ᥙᥣᥒ ᥟᥥᥐᥱ ᥔᥛᥳ ᥑᥩᥖᥱ ᥔᥦᥰ. ᥘᥧᥐ ᥛᥫ 2022 ᥙᥤ ᥛᥣᥰ ᥘᥭᥳ ᥘᥩᥒ ᥔᥩᥢᥴ ᥘᥣᥭᥰ ᥖᥭᥰ ᥗᥝᥲ ᥙᥨᥝᥰ ᥙᥩᥒ ᥞᥥᥖᥱ ᥘᥭᥲ ᥛᥣᥰ 3 ᥙᥧᥖ ᥞᥝᥳ. ᥐᥣᥢ ᥔᥩᥢᥴ ᥘᥥᥴ ᥙᥩᥐ ᥘᥭᥳ ᥗᥪᥒᥴ ᥖᥤ ᥓᥨᥝᥰ ᥓᥣᥰ ᥘᥣ ᥞᥦᥢᥰ ᥐᥧ ᥙᥣᥲ ᥐᥧ ᥚᥣᥭᥱ ᥖᥨᥝ ᥓᥣᥛᥱ ᥘᥭᥲ ᥙᥥᥢ ᥘᥩᥒ ᥙᥥᥢ ᥚᥧᥰ ᥘᥨᥒᥴ ᥘᥣᥒᥴ . ᥗᥪᥒᥴ ᥖᥤ ᥓᥨᥝᥰ ᥓᥣᥰ ᥔᥩᥢᥴ ᥘᥥᥴ ᥞᥦᥴ 10 ᥙᥣᥭ ᥝᥢᥰ ᥐᥨᥝᥳ ᥜᥫᥐᥱ ᥖᥒᥰ ᥘᥣᥭᥴ ᥙᥨᥝᥰ ᥛᥨᥝᥴ ᥚᥖᥴ ᥛᥨᥝᥴ ᥖᥦᥛᥲ ᥞᥝᥳ . ᥘᥛᥳ ᥐᥖ ᥖᥣᥒᥰ ᥔᥧᥒᥴ ᥖᥨᥝ ᥘᥭᥲ ᥕᥨᥐ ᥔᥧᥒᥴ ᥛᥣᥰ ᥘᥣᥭ ᥘᥣᥭ ᥙᥨᥝᥰ ᥑᥪᥖ ᥗᥪᥒᥴ ᥖᥣᥒᥰ ᥛᥣᥭᥴ ᥟᥢ ᥞᥝᥰ ᥟᥣᥒᥲ ᥘᥢᥳ . ᥘᥤᥰ ᥔᥤᥲ : ᥘᥥᥴ ᥞᥬᥲ ᥐᥨᥢᥰ ᥓᥫᥰ ᥛᥣᥰ ᥑᥣᥰ ᥓᥣᥰ ᥘᥢᥳ ᥐᥧ ᥐᥨᥝᥳ ᥔᥧᥲ ᥓᥨᥝᥰ ᥓᥣᥰ ᥐᥧᥛᥰ ᥐᥨᥝᥱ ᥗᥦᥢᥲ ᥕᥬᥰ ᥕᥬᥰ ᥞᥬᥲ ᥘᥤᥐ ᥑᥫᥐ ᥘᥣᥭᥰ ᥐᥣ ᥞᥝᥰ ᥔᥩᥢᥳ ᥔᥪᥙ ᥐᥣᥱ ᥕᥬᥰ ᥕᥬᥰ ᥐᥩᥙ ᥞᥬᥲ ᥘᥤᥐ ᥘᥣᥭᥰ ᥞᥝᥰ ᥞᥪᥒᥰ ᥗᥣᥰ ᥞᥥᥖᥱ ᥟᥩᥐᥱ ᥘᥩᥒ ᥟᥣᥙ ᥔᥣᥐ ᥛᥣᥰ . ᥕᥧᥱ ᥘᥬᥰ ᥙᥣᥒ ᥑᥩᥖᥱ ᥔᥣᥰ ᥘᥢᥳ ᥐᥨᥝᥳ ᥜᥫᥐᥱ ᥖᥒᥰ ᥘᥣᥭᥴ ᥔᥛᥳ ᥕᥒᥰ ᥙᥩᥒ ᥞᥥᥖᥱ ᥘᥩᥒ ᥞᥨᥝᥰ ᥚᥖᥴ ᥘᥤᥐ ᥗᥝᥲ ᥞᥩᥒᥳ ᥑᥣᥛᥰ ᥛᥣᥐᥱ ᥙᥝᥱ ᥙᥤᥱ ᥘᥛᥳ ᥖᥝᥲ ᥖᥣᥢᥲ ᥑᥣᥛᥰ ᥐᥙᥴ ᥗᥧᥐᥴ ᥖᥒᥰ ᥖᥦᥛᥲ ᥖᥨᥝ ᥘᥣᥭᥰ ᥓᥫᥰ ᥘᥭᥳ . ᥚᥧᥱ ᥑᥨᥭᥱ ᥓᥣᥒᥰ : ᥔᥤᥱ ᥟᥣᥭᥲ ᥙᥝᥰ ᥕᥤᥢᥳ ᥙᥝᥰ ᥡᥦᥒᥲ ᥘᥤᥲ ᥔᥧ ᥓᥣᥒᥰ ᥓᥪ ᥓᥪᥱ ᥛᥤᥢᥳ ᥖᥒᥰ ᥛᥨᥝᥴ ᥔᥩᥢᥴ ᥡᥣᥭᥱ ᥔᥦᥝᥰ ᥑᥩᥒᥱ ᥑᥝᥴ ᥓᥫᥰ ᥘᥭᥳ ᥐᥣᥱ ᥖᥫᥳ ᥑᥝᥲ ᥙᥣᥒ ᥑᥩᥖᥱ ᥔᥣᥰ ᥟᥥᥐᥱ ᥔᥛᥳ ᥟᥝ ᥘᥣᥭᥰ ᥘᥣᥐ ᥛᥣᥖ ᥓᥤᥲ ᥕᥥᥲ ᥜᥣᥲ ᥞᥬᥲ ᥐᥨᥝᥳ ᥜᥫᥐᥱ ᥖᥒᥰ ᥘᥣᥭᥴ . ᥐᥨᥝᥳ ᥜᥫᥐᥱ ᥖᥒᥰ ᥘᥣᥭᥴ ᥖᥨᥝ ᥟᥩᥢ ᥐᥢ ᥙᥦᥰ ᥘᥥᥴ ᥝᥣ ᥙᥩᥐ ᥘᥭᥳ ᥛᥣᥰ ᥑᥣᥰ ᥓᥣᥰ ᥖᥨᥝ ᥜᥫᥐᥱ ᥞᥥᥢᥰ ᥘᥭᥲ ᥘᥛᥴ ᥖᥥᥳ ᥖᥥᥳ ᥘᥧᥐ ᥘᥭᥳ ᥐᥣᥱ ᥐᥩᥙ ᥞᥬᥲ ᥘᥤᥐ ᥘᥣᥭᥰ ᥖᥭᥰ ᥞᥝᥰ ᥔᥩᥢᥳ ᥔᥪᥙ ᥖᥨᥐᥱ ᥐᥣᥱ ᥖᥤᥴ ᥐᥣᥱ ᥓᥨᥝᥰ ᥓᥣᥰ ᥕᥣᥙᥱ ᥞᥥᥖᥱ ᥕᥣᥙᥱ ᥙᥩᥒ.
ᥚᥪᥢᥴ ᥘᥤᥐ ᥗᥦᥛᥰ ᥙᥣ ᥘᥥᥐᥳ[ᥔᥣᥒᥲ]| ᥚᥧᥱ ᥓᥫᥰ ᥛᥥᥰ ᥗᥖᥴ ᥑᥝᥴ ᥓᥣᥒ ᥓᥣᥛᥰ ᥖᥨᥭᥰ ᥘᥭᥲ ᥓᥫᥰ ᥙᥥᥢ ᥘᥣᥲ ᥘᥤᥐ sandbox (ᥔᥣᥒᥲ | ᥒᥝᥰ ᥛᥫᥢᥴ) ᥘᥦᥲ testcases (ᥔᥣᥒᥲ) ᥞᥣᥒᥰ ᥗᥦᥛᥰ ᥙᥣ ᥘᥥᥐᥳ ᥟᥢ ᥘᥭᥳ ᥘᥭᥲ ᥕᥧᥱ ᥑᥣᥲ။ ᥔᥬᥱ ᥙᥫᥒ ᥗᥣᥢᥲ ᥐᥣ ᥖᥤ ᥘᥣᥲ ᥘᥤᥐ ᥚᥥᥴ /doc ᥘᥦᥲ။ ᥘᥣᥲ ᥘᥤᥐ ᥚᥥᥴ ᥞᥣᥒᥰ ᥗᥦᥛᥰ ᥙᥣ ᥘᥥᥐᥳ ᥟᥢ ᥘᥭᥳ။. |