ᥓᥣᥒᥳ ᥘᥨᥒᥴ ᥖᥒᥰ ᥛᥦᥝᥴ ᥟᥩᥢᥱ
ᥛᥤᥰ ᥝᥢᥰ ᥘᥫᥒ，ᥛᥦᥝᥴ ᥟᥩᥢᥱ ᥖᥨᥝ ᥘᥫᥒ ᥘᥒ ᥖᥤ ᥖᥬᥲ ᥖᥨᥢᥲ ᥞᥨᥒᥰ，ᥛᥢᥰ ᥑᥭᥲ ᥓᥬ ᥖᥤᥴ ᥐᥣᥱ ᥖᥥᥐᥱ ᥘᥧᥴ ᥑᥣᥴ ᥖᥣᥒᥰ ᥐᥤᥢ。ᥐᥛᥰ ᥘᥢᥳ，ᥛᥤᥰ ᥓᥣᥒᥳ ᥘᥨᥒᥴ ᥖᥨᥝ ᥘᥫᥒ ᥙᥭ ᥛᥣᥰ。ᥓᥣᥒᥳ ᥞᥢᥴ ᥛᥦᥝᥴ ᥞᥦᥴ，ᥟᥝ ᥞᥧᥰ ᥘᥒ ᥛᥢᥰ ᥑᥤᥖᥴ ᥑᥪᥢᥲ ᥛᥣᥰ ᥔᥧᥒᥴ ᥔᥧᥒᥴ，ᥖᥨᥝᥱ ᥛᥦᥝᥴ ᥝᥣ：“ᥟᥢ ᥛᥬᥰ ᥘᥭᥳ，ᥐᥩᥭᥰ ᥐᥨᥝᥳ ᥟᥩᥢᥱ ᥑᥭᥳ，ᥕᥒ ᥟᥛᥱ ᥕᥬᥱ ᥖᥢᥱ ᥖᥤᥢ ᥐᥝ，ᥖᥤᥴ ᥞᥪᥴ ᥙᥥᥳ ᥙᥫᥢ ᥘᥭᥲ？”ᥛᥦᥝᥴ ᥟᥩᥢᥱ ᥖᥩᥛᥱ ᥞᥦᥴ，ᥐᥩᥲ ᥕᥒ ᥑᥭᥲ ᥓᥣᥳ，ᥛᥢᥰ ᥖᥨᥝᥱ ᥓᥣᥒᥳ ᥘᥨᥒᥴ ᥝᥣ：“ᥓᥣᥭᥰ ᥘᥨᥒᥴ ᥓᥣᥒᥳ ᥞᥫᥭᥰ，ᥛᥬᥰ ᥙᥭᥱ ᥛᥣᥖ ᥛᥝ ᥐᥝ ᥘᥩ，ᥓᥣᥒ ᥑᥥᥰ，ᥐᥝ ᥖᥤᥴ ᥗᥦᥛᥴ ᥓᥨᥝᥲ ᥓᥒᥴ ᥛᥬᥰ ᥙᥩᥰ。”ᥓᥣᥒᥳ ᥑᥭᥲ ᥓᥣᥳ ᥞᥦᥴ ᥝᥣ：“ᥘᥒᥴ ᥛᥬᥰ ᥖᥨᥝ ᥟᥩᥢᥱ ᥐᥩᥭᥰ ᥑᥭᥳ，ᥙᥭᥱ ᥛᥣᥰ ᥖᥫᥳ ᥐᥝ ᥖᥣᥢᥲ ᥑᥣᥛᥰ。”ᥖᥣᥢᥲ ᥕᥝᥳ，ᥓᥣᥝᥙᥭ ᥐᥣᥱ ᥞᥣᥒᥰ ᥛᥢᥰ ᥕᥝᥳ。
ᥘᥭᥲ ᥞᥦᥴ ᥘᥣᥭᥴ ᥝᥢᥰ，ᥓᥣᥒᥳ ᥔᥛᥳ ᥙᥭ ᥐᥣᥭ ᥓᥨᥝᥲ ᥖᥨᥢᥲ ᥞᥧᥒᥰ ᥖᥨᥢᥲ ᥘᥢᥳ。ᥛᥢᥰ ᥟᥩᥐᥱ ᥓᥬ ᥑᥣᥢᥳ ᥓᥝᥱ ᥐᥣᥱ ᥘᥩᥢᥰ ᥖᥤ ᥖᥬᥲ ᥖᥨᥢᥲ ᥞᥨᥒᥰᥘᥢᥳ，ᥔᥩᥢ ᥞᥨᥛ ᥕᥧᥱ ᥕᥥᥢ ᥞᥣᥒᥰ ᥛᥢᥰ ᥝᥭᥳ。ᥟᥦᥒᥲ ᥘᥦᥒᥲ ᥘᥧᥐ ᥞᥣᥐ ᥖᥨᥢᥲ ᥞᥧᥒᥰ ᥘᥢᥳ ᥘᥦᥢ ᥟᥩᥐᥱ ᥘᥧᥴ ᥛᥣᥰ ᥖᥨᥝ ᥘᥫᥒ，ᥐᥣᥢᥰ ᥑᥪᥢᥲ ᥘᥫᥴ ᥖᥨᥝ ᥓᥣᥒᥳ ᥘᥨᥒᥴ ᥐᥣᥱ ᥐᥛᥰ ᥔᥪ。ᥓᥣᥒᥳ ᥘᥨᥒᥴ ᥐᥤᥲ ᥓᥨᥝᥲ，ᥚᥤ ᥚᥣ ᥟᥝ ᥞᥧᥰ ᥘᥒ ᥕᥣᥝᥰ ᥛᥢᥰ ᥞᥨᥖᥱ ᥞᥦᥴ ᥐᥤᥢᥰ ᥐᥤᥢᥰ，ᥝᥦᥢᥴ ᥘᥧᥐ ᥛᥣᥰ，ᥔᥢᥱ ᥖᥨᥝ ᥛᥢᥰ ᥚᥣᥖ ᥚᥣᥖ ᥘᥨᥒᥴ，ᥘᥧᥴ ᥞᥩᥢᥱ ᥘᥢᥳ ᥝᥣᥭᥲ ᥖᥨᥐᥱ ᥖᥨᥝ ᥓᥣᥒᥳ ᥛᥣᥰ ᥕᥝᥳ。ᥓᥣᥒᥳ ᥟᥣᥒᥲ ᥟᥝ ᥖᥤᥢ ᥘᥨᥒᥴ ᥛᥢᥰ ᥐᥣᥱ ᥕᥥᥙᥱ ᥘᥧᥴ ᥖᥣᥭ，ᥐᥩᥭᥰ ᥘᥧᥴ ᥔᥦᥢᥰ ᥙᥣᥭ ᥘᥭᥲ ᥚᥬᥰ，ᥔᥛᥳ ᥙᥨᥝᥰ ᥐᥣᥢᥰ ᥐᥤᥢᥰ ᥑᥪᥢᥲ ᥞᥣᥒᥴ ᥓᥣᥒᥳ ᥐᥣᥱ ᥕᥝᥳ。
ᥓᥣᥒᥳ ᥖᥒᥰ ᥘᥧᥴ ᥞᥥᥖᥱ ᥖᥤᥴ ᥐᥢ ᥖᥒᥰ ᥝᥢᥰ，ᥞᥥᥖᥱ ᥞᥬᥲ ᥓᥣᥒᥳ ᥘᥨᥒᥴ ᥙᥥᥢ ᥞᥫᥱ ᥙᥥᥢ ᥐᥤ ᥛᥦᥢᥳ，ᥓᥬ ᥙᥨᥝᥰ ᥗᥨᥭᥲ ᥕᥣᥙᥱ，ᥐᥩᥭᥰ ᥕᥒ ᥓᥣᥒ ᥞᥪᥴ ᥞᥥᥖᥱ ᥖᥤᥴ ᥘᥧᥴ。ᥓᥣᥒᥳ ᥑᥭᥲ ᥓᥣᥳ ᥘᥨᥒᥴ ᥘᥣᥒᥴ，ᥓᥝᥱ ᥟᥝ ᥞᥧᥰ ᥘᥒ ᥕᥣᥝᥰ ᥛᥢᥰ ᥜᥖ ᥐᥣᥱ ᥓᥧᥰ ᥘᥧᥴ，ᥟᥣᥒᥲ ᥟᥝ ᥘᥧᥴ ᥖᥣᥭ。ᥐᥛᥰ ᥘᥢᥳ，ᥔᥦᥢᥰ ᥞᥬᥲ ᥘᥧᥴ ᥓᥨᥛᥰ ᥕᥝᥳ，ᥘᥧᥴ ᥓᥝᥱ ᥚᥤ ᥚᥣ ᥐᥣᥢᥰ ᥑᥪᥢᥲ ᥞᥧᥰ ᥘᥒ ᥓᥣᥒᥳ ᥐᥣᥱ. ᥓᥣᥒᥳ ᥟᥨᥝᥰ ᥟᥣᥰ ᥘᥨᥒᥴ ᥐᥛᥰ ᥘᥭᥳ ᥖᥨᥝ ᥐᥤᥲ ᥛᥦᥢᥳ，ᥖᥤᥴ ᥞᥪᥴ ᥞᥥᥖᥱ ᥐᥩᥲ ᥕᥒ ᥞᥧᥳ ᥕᥝᥳ。ᥖᥫᥐ ᥐᥤᥲ ᥕᥒ ᥓᥣᥒ ᥞᥪᥴ ᥞᥥᥖᥱ，ᥛᥦᥝᥴ ᥖᥨᥝ ᥘᥢᥳ ᥝᥦᥢᥴ ᥟᥩᥐᥱ ᥛᥣᥰ，ᥘᥧᥐ ᥘᥬᥰ ᥞᥧᥰ ᥘᥒ ᥓᥣᥒᥳ ᥘᥢᥳ ᥐᥣᥱ ᥓᥣᥝᥴ ᥘᥭᥲ ᥘᥧᥴ ᥛᥣᥰ，ᥐᥤᥢ ᥙᥦᥖ ᥐᥛᥰ ᥔᥪ。
ᥓᥣᥒᥳ ᥘᥨᥒᥴ ᥟᥢᥴ ᥞᥦᥴ，ᥔᥛᥳ ᥓᥨᥛᥰ ᥔᥛᥳ ᥟᥣᥭ ᥙᥫᥢ ᥟᥥᥴ ᥛᥦᥝᥴ，ᥟᥣᥭ ᥞᥩ ᥘᥣᥲ ᥙᥨᥝᥰ ᥘᥦᥒ ᥐᥣᥱ ᥘᥦᥒ ᥛᥣᥰ，ᥛᥣᥒᥳ ᥕᥣᥙᥱ ᥓᥬ ᥟᥥᥴ ᥛᥦᥝᥴ ᥘᥛᥳ ᥖᥣ ᥙᥨᥝᥰ ᥘᥨᥐᥱ。
ᥘᥧᥐ ᥘᥭᥳ ᥐᥣᥱ ᥞᥦᥴ，ᥓᥣᥒᥳ ᥘᥨᥒᥴ ᥕᥒ ᥞᥖᥴ ᥛᥣᥖ ᥛᥝ ᥖᥨᥝ ᥔᥖᥴ ᥓᥫᥰ ᥖᥨᥝ ᥟᥩᥢᥱ ᥘᥢᥳ ᥕᥝᥳ。ᥛᥢᥰ ᥖᥒᥰ ᥖᥫᥳ ᥟᥥᥴ ᥛᥦᥝᥴ ᥟᥩᥢᥱ ᥕᥥᥢᥴ ᥙᥥᥢ ᥖᥭᥰ ᥐᥨᥝ ᥘᥤ ᥐᥢ。
ᥕᥣᥰ ᥗᥩᥢᥰ ᥓᥥᥙᥱ ᥞᥩᥛᥴ