ᥓᥝᥲ ᥔᥫᥴ ᥑᥣᥢᥱ ᥜᥣᥳ

ᥓᥧᥛᥲ ᥛᥫᥒᥰ

ᥘᥣᥒᥰ ᥟᥤᥱ ᥘᥩᥢᥰ ᥚᥥᥰ ᥕᥝᥳ ᥐᥩᥲ “ᥑᥧᥢᥴ ᥖᥣᥭᥱ ᥑᥪᥢᥲ ” ᥞᥬᥲ ᥚᥩᥒᥰ ᥛᥫᥒᥰ ᥑᥝᥴ ᥕᥧᥐᥳ ᥛᥣᥢᥲ ᥛᥫᥒᥰ ᥟᥣᥙ ᥛᥢᥰ ᥐᥛᥰ ᥘᥥᥝ ᥕᥝᥳ။ ᥚᥩᥒᥰ ᥛᥫᥒᥰ ᥐᥛᥳ ᥚᥩᥒ ᥑᥬᥲ ᥟᥣᥙ ᥙᥢ ᥔᥥᥴ ᥖᥣᥳ ᥐᥛᥳ ᥚᥩᥒ ᥔᥛᥳ ᥟᥛᥱ ᥚᥩᥛᥳ ᥘᥦᥳ ᥑᥧᥢᥴ ᥖᥣᥭᥱ ᥑᥪᥢᥲ ᥘᥣᥖ ᥝᥣ “ᥛᥫᥒᥰ ᥛᥣᥝᥰ ᥘᥨᥒᥴ ᥔᥧᥴ ᥘᥭᥳ ... ᥘᥫᥴ ᥔᥥᥴ ᥐᥝ ... ᥟᥛᥱ ᥛᥤᥰ ᥚᥬᥴ ᥙᥧᥖ ᥘᥭᥲ ᥕᥝᥳ ... ᥕᥩᥢᥳ ᥔᥒᥴ ᥟᥛᥱ ᥑᥬᥲ ᥟᥣᥙ ᥙᥢ ᥐᥝ ... ᥘᥣᥖ ᥟᥝ ᥘᥤ ᥘᥤ ᥘᥦᥳ ... ᥟᥛᥱ ᥙᥢ ᥐᥩᥲ ... ᥖᥤᥴ ᥖᥪᥐᥴ ᥟᥝ ... ᥙᥩᥰ ᥐᥨᥝ ᥛᥫᥒᥰ ᥔᥧᥴ ᥘᥧᥳ ... ᥟᥣᥙ ᥐᥛᥰ ᥘᥥᥝ ...” ᥘᥭᥴ ᥕᥝᥳ။
ᥚᥩᥒᥰ ᥑᥣᥒᥰ ᥘᥣᥒᥰ ᥟᥤᥱ ᥘᥣᥖ ᥝᥣ “ᥛᥫᥒᥰ ᥛᥣᥝᥰ ᥘᥨᥒᥴ ᥞᥝᥰ ᥑᥣᥲ ᥘᥭᥳ ... ᥙᥥᥢ ᥛᥣᥢᥲ ᥕᥬᥱ ᥛᥫᥒᥰ ᥘᥨᥒᥴ ... ᥙᥥᥢ ᥛᥫᥒᥰ ᥛᥤᥰ ᥓᥧᥛᥲ ᥛᥫᥒᥰ ... ᥟᥝ ᥑᥛᥰ ᥞᥥᥖᥱ ᥝᥭᥳ ... ᥘᥐᥴ ᥘᥫᥒ ᥙᥢᥰ ᥘᥭᥴ ᥐᥩᥲ ... ᥓᥝᥲ ᥞᥝᥰ ᥞᥧᥳ ᥕᥧᥱ ... ᥖᥒᥲ ᥟᥝ ᥓᥝᥲ ᥘᥣᥒᥰ ᥞᥝᥰ ᥑᥣᥲ ... ᥓᥙᥴ ᥑᥭᥲ ᥓᥙᥴ ᥘᥣᥝᥴ ... ᥖᥨᥝᥱ ᥗᥪᥒᥴ ᥝᥢᥰ ᥛᥫ ᥘᥭᥳ ... ᥟᥛᥱ ᥘᥭᥲ ᥞᥢᥴ ᥓᥧᥛᥲ ᥑᥛᥰ ᥘᥢᥳ ᥕᥝᥳ ... ᥟᥛᥱ ᥛᥤᥰ ᥓᥧᥛᥲ ᥛᥫᥒᥰ ... ᥟᥛᥱ ᥓᥣᥒ ᥚᥩᥒᥰ ᥒᥛᥰ ᥛᥣᥢᥲ ᥛᥫᥒᥰ ᥘᥭᥴ ᥐᥩᥲ ... ᥓᥝᥲ ᥞᥝᥰ ᥖᥥᥴ ᥞᥧᥳ ᥘᥫᥴ ᥞᥝᥰ ᥑᥣᥲ ᥕᥧᥱ ...
ᥘᥩᥒ ᥖᥥᥴ ᥟᥣᥙ ᥛᥣᥢᥲ ᥛᥫᥒᥰ ... ᥟᥛᥱ ᥟᥣᥙ ᥘᥭᥴ ᥘᥢᥳ ... ᥞᥝᥰ ᥑᥣᥲ ᥙᥥᥢ ᥚᥩᥒᥰ ᥛᥫᥒᥰ ᥐᥩᥭᥰ ᥘᥦᥲ ... ᥟᥛᥱ ᥛᥤᥰ ᥟᥣᥱ ᥘᥣᥱ ... ᥖᥦᥙᥱ ᥖᥖᥴ ᥘᥭᥲ ... ᥞᥧᥳ ᥐᥣ ᥖᥥᥴ ᥘᥭᥲ ... ᥖᥦᥙᥱ ᥖᥖᥴ ... ᥞᥥᥖᥱ ᥔᥣᥒᥲ ᥓᥩᥛᥰ ᥘᥒᥱ ... ᥗᥧᥒᥰ ᥟᥢ ᥛᥤᥰ ᥛᥣᥰ ᥓᥥᥛ ᥐᥩᥢᥱ ᥘᥢᥳ ᥐᥩᥭᥰ ᥑᥣᥲ ... ᥚᥬᥴ ᥛᥤᥰ ᥓᥧᥛᥲ ᥛᥫᥒᥰ ... ᥟᥢ ᥖᥥᥴ ᥟᥝ ᥙᥥᥢ ... ᥛᥤᥐ ᥛᥣᥭᥴ ᥚᥩᥒᥰ ᥒᥛᥰ ᥛᥫᥒᥰ ᥐᥩᥰ ... ᥞᥝᥰ ᥑᥣᥲ ᥖᥥᥴ ᥘᥭᥲ ᥕᥧᥐᥳ ᥛᥣᥢᥲ ᥛᥫᥒᥰ ᥟᥣᥙ ᥙᥢ ᥐᥩᥭᥰ ... ᥘᥩᥒ ᥓᥧᥛᥲ ᥛᥫᥒᥰ ᥘᥢᥳ ... ᥓᥝᥲ ᥘᥣᥒᥰ ᥞᥝᥰ ... ᥟᥛᥱ ᥔᥒᥱ ᥔᥒᥴ ᥝᥭᥳ ᥑᥣᥲ ᥘᥦᥰ ... ᥕᥨᥝ ᥛᥢᥰ ᥘᥣᥒᥰ ᥙᥢ ᥓᥝᥲ ᥞᥝᥰ ᥝᥭᥳ ᥑᥣᥲ ᥞᥪᥴ ...
ᥔᥒᥴ ᥝᥣ ᥓᥧᥛᥲ ᥛᥫᥒᥰ ᥞᥝᥰ ᥑᥣᥲ ... ᥛᥤᥰ ᥖᥤ ᥓᥝᥲ ᥞᥝᥰ ᥕᥧᥱ ᥘᥭᥳ ᥖᥥᥳ ... ᥑᥪᥢᥲ ᥙᥥᥢ ᥓᥝᥲ ᥙᥫᥒᥱ ᥘᥛᥳ ᥒᥛᥰ ᥘᥤᥢ ᥞᥝᥰ ᥑᥣᥲ ᥐᥛᥰ ᥘᥥᥝ ᥐᥩᥲ ... ᥞᥝᥰ ᥑᥣᥲ ᥟᥛᥱ ᥗᥥᥒᥴ ... ᥔᥒᥴ ᥝᥣ ᥟᥛᥱ ᥛᥤᥰ ᥘᥭᥴ ᥖᥥᥳ ... ᥐᥨᥝ ᥘᥭᥲ ᥚᥤᥖᥴ ᥗᥧᥒᥰ ᥛᥣᥢᥲ ᥛᥫᥒᥰ ᥘᥦᥳ ... ᥞᥝᥰ ᥑᥣᥲ ᥟᥛᥱ ᥓᥣᥒ ᥟᥣᥙ ᥙᥢ ᥑᥣᥲ ... ᥞᥧᥳ ᥐᥣ ᥖᥥᥴ ᥘᥭᥲ ᥟᥩᥢ ᥐᥢ ᥙᥬᥳ ... ᥖᥨᥝᥱ ᥗᥪᥒᥴ ᥞᥢᥴ ᥑᥪᥢᥰ ... ᥓᥧᥛᥲ ᥛᥣᥢᥲ ᥓᥧᥛᥲ ᥛᥫᥒᥰ ᥞᥝᥰ ᥑᥣᥲ ᥘᥢᥳ ᥐᥩᥭᥰ ...” ᥘᥭᥴ ᥘᥦᥳ ᥑᥧᥢᥴ ᥖᥣᥭᥱ ᥑᥪᥢᥲ ᥓᥤ ᥔᥒᥱ ᥔᥩᥐ ᥞᥣᥴ ᥓᥧᥛᥲ ᥑᥛᥰ ᥘᥨᥒᥴ ᥘᥢᥳ ᥘᥬᥰ ᥞᥣᥒᥲ ᥞᥨᥝᥴ ᥐᥧ ᥖᥤ။ ᥘᥬᥰ ᥛᥣᥢᥲ ᥛᥫᥒᥰ ᥐᥧ ᥞᥫᥢᥰ။ ᥚᥩᥒᥰ ᥛᥫᥒᥰ ᥑᥝᥴ ᥐᥩᥲ ᥔᥣᥒᥳ ᥔᥨᥝᥱ ᥖᥒᥰ ᥛᥫᥒᥰ ᥝᥣ
“ᥓᥧᥛᥲ ᥑᥛᥰ ᥘᥨᥒᥴ ᥛᥫᥒᥰ ᥛᥣᥝᥰ ᥘᥭᥳ ... ᥖᥒᥲ ᥟᥝ ᥓᥝᥲ ᥘᥣᥒᥰ ᥟᥤᥱ ᥟᥛᥱ ᥛᥤᥰ ᥕᥝᥳ ᥘᥢᥳ ... ᥟᥛᥱ ᥞᥢᥴ ᥕᥝᥳ ᥘᥦᥳ ... ᥛᥫᥢᥴ ᥛᥫᥒᥰ ᥟᥛᥱ ᥛᥤᥰ ᥓᥝᥲ ᥑᥧᥢᥴ ᥝᥭᥳ ... ᥛᥤᥰ ᥖᥤ ᥚᥬᥴ ᥐᥩᥲ ... ᥟᥝᥴ ᥛᥣᥰ ᥟᥣᥙ ᥙᥢ ᥑᥪᥢᥰ ᥐᥛᥰ ᥘᥥᥝ ... ᥔᥒᥴ ᥝᥣ ᥙᥥᥢ ᥐᥨᥢᥰ ᥛᥫᥒᥰ ᥕᥨᥝᥰ ᥕᥨᥝᥰ ... ᥖᥥᥴ ᥙᥢ ᥔᥧᥰ ᥕᥬᥱ ᥘᥣᥙ ᥘᥨᥒᥴ ... ᥖᥥᥴ ᥖᥣᥒᥱ ᥙᥥᥢ ᥓᥢᥳ ᥔᥪᥒᥱ ᥚᥩᥒᥰ ᥛᥫᥒᥰ ... ᥔᥒ ᥝᥣ ᥙᥥᥢ ᥑᥫᥰ ᥓᥝᥲ ᥑᥫᥰ ᥑᥧᥢᥴ ... ᥖᥥᥴ ᥕᥧᥐᥳ ᥕᥩᥒ ... ᥙᥥᥢ ᥓᥝᥲ ᥙᥥᥢ ᥑᥧᥢᥴ ᥑᥪᥢᥰ ᥐᥛᥰ ᥘᥥᥝ ...” ᥘᥭᥴ ᥕᥝᥳ။
ᥖᥩᥭᥱ ᥛᥩᥒᥰ ᥞᥩᥒᥳ ᥔᥨᥝᥱ ᥕᥧᥱ ᥘᥣᥭᥴ ᥝᥢᥰ ᥐᥩᥲ ᥟᥛᥱ ᥛᥤᥰ ᥚᥬᥴ ᥟᥝ ᥛᥣᥰ ᥟᥣᥙ ᥙᥢ။ ᥑᥧᥢᥴ ᥖᥣᥭᥱ ᥑᥪᥢᥲ ᥞᥬᥲ ᥔᥫᥐᥱ ᥛᥢᥰ ᥑᥪᥢᥲ ᥔᥩᥐ ᥖᥝᥴ ᥐᥧ ᥟᥫᥒᥱ၊ ᥐᥧᥰ ᥙᥩᥐᥳ၊ ᥐᥧ ᥕᥩᥛᥱ၊ ᥐᥧ ᥞᥫᥢᥰ ᥐᥩᥲ ᥟᥛᥱ ᥗᥨᥙᥱ။ ᥛᥫ ᥘᥢᥳ ᥘᥣᥒᥰ ᥜᥣᥳ ᥓᥤᥒᥱ ᥟᥢ ᥓᥒᥰ ᥘᥣᥒᥰ ᥟᥩᥢᥱ ᥑᥝᥴ ᥛᥥ ᥘᥧᥐ ᥝᥭᥳ ᥕᥧᥱ ᥘᥢᥳ ᥙᥩᥭᥱ ᥑᥣᥝᥱ ᥝᥣ “ᥑᥥᥰ ᥖᥤᥴ ᥛᥤᥰ ᥕᥧᥱ ... ᥖᥤ ᥘᥣᥒᥰ ᥟᥩᥢᥱ ᥑᥝᥴ ᥛᥥ ᥘᥧᥐ ...” ᥘᥭᥴ ᥘᥦᥰ ᥑᥧᥢᥴ ᥖᥣᥭᥱ ᥑᥪᥢᥲ ᥔᥨᥒᥱ ᥔᥪᥐᥱ ᥝᥦᥖᥳ ᥘᥩᥛᥳ ᥔᥩᥐ ᥖᥤ ᥘᥣᥒᥰ ᥟᥩᥢᥱ ᥑᥝᥴ ᥛᥥ ᥘᥧᥐ ᥕᥧᥱ ᥘᥢᥳ ᥐᥛᥰ ᥘᥥᥝ ᥕᥝᥳ။
ᥚᥩᥒᥰ ᥘᥢᥳ ᥔᥩᥒᥴ ᥙᥤ ᥘᥩᥒᥳ ᥙᥭᥱ ᥗᥪᥒᥴ ᥛᥫᥒᥰ ᥑᥪᥢᥰ ᥘᥦᥳ ᥛᥤᥰ ᥘᥣᥒᥰ ᥟᥩᥢᥱ ᥐᥨᥝᥳ ᥘᥥᥝ ᥐᥩᥭᥰ။ ᥔᥪᥐᥱ ᥑᥧᥢᥴ ᥖᥣᥭᥱ ᥑᥪᥢᥲ ᥟᥩᥢ ᥐᥢ ᥔᥩᥐ ᥞᥣᥴ ᥓᥧᥛᥲ ᥛᥫᥒᥰ ᥟᥛᥱ ᥞᥢᥴ ᥘᥦᥳ ᥓᥦᥖ ᥗᥣᥛᥴ ᥘᥣᥒᥰ ᥟᥩᥢᥱ ᥐᥩᥲ ᥖᥪᥢᥰ ᥟᥛᥱ ᥟᥩᥐᥱ ᥘᥣᥰ ᥘᥣᥰ။ ᥗᥣᥛᥴ ᥞᥥᥖᥱ ᥞᥪᥴ ᥐᥩᥲ ᥟᥛᥱ ᥞᥧᥳ ᥟᥛᥱ ᥞᥢᥴ ᥕᥧᥱ ᥐᥩᥭᥰ ᥘᥦᥳ ᥖᥤ ᥕᥩᥙᥱ ᥘᥣᥒᥰ ᥟᥩᥢᥱ ᥛᥫᥰ ᥓᥧᥰ ᥑᥧᥢᥴ ᥖᥣᥭᥱ ᥑᥪᥢᥲ ᥕᥧᥱ ᥕᥝᥳ။ ᥑᥧᥢᥴ ᥖᥣᥭᥱ ᥑᥪᥢᥲ ᥓᥦᥖ ᥗᥣᥛᥴ ᥐᥩᥲ ᥟᥛᥱ ᥞᥧᥳ ᥘᥭᥴ ᥗᥦᥒᥲ ᥘᥦᥳ ᥐᥣ ᥟᥛᥱ ᥙᥢ ᥑᥪᥢᥰ ᥓᥧᥛᥲ ᥛᥫᥒᥰ ᥖᥥᥴ ᥟᥛᥱ ᥙᥩᥭᥱ ᥘᥭᥴ ᥔᥥᥴ ᥑᥧᥢᥴ ᥖᥣᥭᥱ ᥑᥪᥢᥲ ᥞᥬᥲ ᥑᥒᥴ ᥘᥣᥒᥰ ᥟᥩᥢᥱ ᥝᥭᥳ ᥕᥝᥳ။
ᥝᥣᥭᥰ ᥔᥥᥴ ᥔᥫᥐᥱ ᥛᥫᥒᥰ ᥛᥤᥖ ᥖᥤ ᥕᥩᥙᥱ ᥘᥣᥒᥰ ᥟᥩᥢᥱ ᥐᥣᥱ ᥕᥝᥳ “ᥕᥤ ᥑᥣᥒᥴ ᥑᥛᥰ ” ᥚᥦᥝᥴ ᥞᥩᥖ ᥖᥤ ᥗᥛᥲ ᥑᥝᥴ ᥛᥥ ᥘᥧᥐ ᥕᥝᥳ ᥟᥛᥱ ᥖᥨᥙᥱ ᥛᥥ ᥘᥦᥳ ᥔᥪᥙᥱ ᥘᥛᥰ ᥓᥩᥛᥰ ᥞᥣᥴ ᥑᥭᥲ ᥛᥥ ᥗᥪᥒᥴ ᥞᥨᥝᥴ။ ᥑᥧᥢᥴ ᥖᥣᥭᥱ ᥑᥪᥢᥲ ᥖᥤ ᥕᥩᥙᥱ “ᥕᥤ ᥑᥣᥒᥴ ᥑᥛᥰ ” ᥑᥒᥴ ᥝᥭᥳ ᥗᥦᥢᥲ ᥕᥧᥱ ᥕᥝᥳ။
ᥛᥫ ᥘᥢᥳ “ᥘᥣᥒᥰ ᥐᥣᥢᥲ ᥑᥛᥰ ᥔᥬᥴ ” ᥟᥤᥴ ᥘᥧᥴ ᥔᥩᥒᥴ ᥛᥥ ᥘᥧᥐ ᥔᥥᥴ ᥘᥐᥳ ᥕᥪᥢᥲ ᥛᥦᥒᥱ ᥔᥬᥱ ᥔᥨᥙᥱ ᥐᥣᥛᥰ ᥐᥨᥢᥰ ᥙᥬᥳ ᥑᥩᥐ ᥞᥬᥲ ᥙᥢ ᥔᥩᥒᥴ ᥛᥥ ᥘᥧᥐ ᥕᥧᥱ ᥔᥝᥰ ᥐᥤᥢ ᥘᥤ ᥝᥭᥳ ᥕᥝᥳ။ ᥔᥩᥒᥴ ᥛᥥ ᥘᥧᥐ ᥘᥭᥲ ᥑᥣᥛᥱ ᥑᥒᥴ ᥝᥭᥳ ᥕᥧᥱ ᥕᥝᥳ ᥔᥥᥴ ᥑᥧᥢᥴ ᥔᥣᥛᥴ ᥘᥨᥒᥴ ᥖᥥᥳ ᥙᥭᥱ ᥞᥩᥖ ᥑᥪᥢᥰ ᥛᥣᥢᥲ ᥛᥫᥒᥰ။

ᥟᥥᥢᥰ ᥟᥣᥢᥰ ᥖᥥᥛ ᥗᥨᥢᥲ

ᥑᥧᥢᥴ ᥖᥣᥭᥱ ᥑᥪᥢᥲ ᥔᥩᥢᥱ ᥝᥣ “ᥓᥧᥛᥲ ᥛᥫᥒᥰ ᥛᥤᥰ ᥖᥤ ᥘᥣᥒᥰ ᥟᥩᥢᥱ ᥑᥝᥴ ᥛᥥ ᥘᥧᥐ ᥐᥩᥭᥰ ... ᥘᥨᥝᥱ ᥞᥣᥴ ᥘᥩᥐᥴ ᥘᥣᥭᥰ ... ᥟᥝ ᥑᥪᥢᥰ ᥞᥬᥲ ᥘᥭᥲ ᥐᥩᥭᥰ ...” ᥘᥭᥴ ᥔᥥᥴ ᥐᥧᥛ ᥐᥢ ᥖᥒᥰ ᥚᥩᥒᥰ ᥛᥫᥒᥰ ᥛᥢᥰ ᥕᥝᥳ။ ᥚᥩᥒᥰ ᥛᥫᥒᥰ ᥛᥢᥰ ᥙᥢ ᥙᥣᥭᥰ ᥝᥨᥢᥳ ᥝᥣ “ᥓᥧᥛᥲ ᥛᥫᥒᥰ ᥛᥤᥰ ᥖᥤ ᥑᥝᥴ ᥛᥥ ᥘᥧᥐᥳ ᥔᥥᥴ ᥖᥣᥳ ... ᥔᥒᥴ ᥝᥣ ᥞᥝᥰ ᥑᥣᥲ ᥘᥥᥴ ᥘᥭᥲ ... ᥘᥩᥒ ᥟᥢ ᥑᥧᥢᥴ ᥕᥤ ᥑᥣᥴ ᥙᥤ ᥘᥩᥒᥳ ... ᥟᥛᥱ ᥓᥬ ᥘᥧᥐ ᥑᥧᥢᥴ ᥚᥣᥒᥱ ᥑᥛᥰ ... ᥘᥭᥴ ᥐᥩᥭᥰ ᥐᥩᥲ ... ᥑᥝᥴ ᥑᥪᥢᥲ ᥞᥥᥖᥱ ᥑᥧᥢᥴ ᥛᥫᥒᥰ ᥟᥛᥱ ᥘᥭᥲ ᥕᥝᥳ ... ᥛᥫ

ᥘᥥᥝ ... ᥐᥨᥢᥰ ᥛᥫᥒᥰ ᥖᥤ ᥘᥭᥲ ... ᥛᥤᥴ ᥐᥣᥭᥰ ᥘᥨᥒᥴ ᥘᥦᥲ ᥔᥫᥴ ᥘᥨᥒᥴ ... ᥛᥣᥰ ᥔᥣᥐ ᥝᥭᥳ ᥕᥧᥱ ... ᥞᥝᥰ ᥘᥨᥝᥱ ᥞᥬᥲ ... ᥞᥛᥰ ᥐᥢ ᥖᥒᥰ ... ᥛᥤᥴ ᥘᥦᥲ ᥔᥫᥴ ᥘᥢᥳ ᥔᥥᥴ ... ᥞᥥᥖᥱ ᥞᥬᥲ ᥑᥧᥢᥴ ᥕᥤ ᥔᥧᥛᥰ ...

ᥘᥨᥝᥱ ᥙᥪᥢ ᥑᥣᥝᥱ ᥝᥣ ... ᥘᥒᥱ ᥞᥪᥴ ᥖᥤᥴ ᥓᥣᥒ ᥕᥧᥐᥳ ᥕᥩᥒᥲ ... ᥑᥧᥢᥴ ᥕᥤ ᥑᥣᥴ ᥙᥤ ᥘᥩᥒᥳ ... ᥑᥪᥢᥲ ᥙᥥᥢ ᥑᥧᥢᥴ ᥛᥫᥒᥰ ᥛᥣᥝᥰ ᥘᥨᥒᥴ ᥘᥭᥲ ᥘᥢᥳ ... ᥖᥤᥴ ᥘᥭᥲ ᥗᥖᥴ ᥖᥨᥭᥰ ᥝᥣ ... ᥙᥥᥢ ᥘᥧᥐ ᥚᥬᥴ ... ᥓᥩᥒᥱ ᥓᥬ ᥘᥧᥐ ᥑᥧᥢᥴ ᥚᥣᥒᥱ ᥑᥛᥰ ... ᥔᥒᥴ ᥝᥣ ᥓᥬ ... ᥖᥤᥴ ᥕᥧᥐᥳ ᥞᥥᥖᥱ ᥑᥧᥢᥴ ᥛᥫᥒᥰ ... ᥔᥒᥴ ᥝᥣ ᥟᥛᥱ ᥓᥬ ... ᥘᥨᥝᥱ ᥟᥝ ᥓᥧᥛᥲ ᥛᥫᥒᥰ ... ᥟᥩᥐᥱ ᥙᥢ ᥑᥪᥢᥰ ... ᥕᥩᥢᥳ ᥘᥢᥳ ... ᥖᥤᥴ ᥞᥬᥲ ᥑᥧᥢᥴ ᥕᥤ ᥞᥛᥰ ᥖᥒᥰ ᥛᥤᥴ ᥘᥦᥲ ᥔᥫᥴ ... ᥔᥒᥴ ᥝᥣ ... ᥙᥥᥢ ᥘᥧᥐ ᥑᥧᥢᥴ ᥚᥣᥒᥱ ᥑᥛᥰ ᥖᥥᥳ ... ᥞᥬᥲ ᥑᥧᥢᥴ ᥕᥤ ᥙᥥᥳ ... ᥔᥒᥴ ᥟᥛᥱ ᥓᥪ ... ᥞᥬᥲ ᥜᥣᥳ ᥚᥤᥴ ᥙᥢ ᥖᥣᥛᥱ ᥛᥢᥰ ... ᥘᥭᥴ ᥔᥥᥴ ᥞᥨᥭᥰ ᥟᥝ ᥐᥨᥢᥰ ᥛᥫᥒᥰ ᥙᥥᥢ ᥓᥬ ᥞᥝᥰ ...
ᥘᥪᥢᥰ ᥘᥢᥳ ... ᥞᥬᥲ ᥑᥧᥢᥴ ᥕᥤ ᥞᥛᥰ ᥖᥒᥰ ... ᥛᥤᥴ ᥘᥦᥲ ᥔᥫᥴ ... ᥞᥥᥖᥱ ᥞᥪᥴ ᥐᥩᥲ ... ᥑᥧᥢᥴ ᥕᥤ ᥖᥤᥴ ᥖᥣᥭ ᥕᥧᥱ ... ᥙᥩᥰ ᥘᥢᥴ ... ᥚᥬᥴ ᥐᥩᥲ ᥖᥤᥴ ᥟᥛᥱ ᥘᥥᥰ ᥞᥝᥰ ᥕᥝᥳ ... ᥔᥒᥴ ᥝᥣ ᥛᥢᥰ ᥟᥛᥱ ᥞᥖᥴ ᥞᥛᥰ ᥐᥩᥲ ... ᥛᥢᥰ ᥟᥛᥱ ᥓᥪ ... ᥘᥧᥐ ᥑᥧᥢᥴ ᥚᥣᥒᥱ ᥑᥛᥰ ᥘᥭᥴ ᥔᥥᥴ ... ᥖᥤᥴ ᥔᥧᥛᥰ ᥘᥩᥐᥴ ᥞᥝᥰ ᥗᥦᥢᥲ ᥘᥦᥲ ... ᥖᥤᥴ ᥘᥭᥲ ᥟᥝ ... ᥓᥧᥛᥲ ᥛᥫᥒᥰ ᥟᥣᥙ ᥙᥢ ᥓᥝᥲ ᥕᥧᥱ ᥕᥝᥳ ...” ᥘᥭᥴ ᥘᥦᥲ ᥟᥩᥢ ᥐᥢ ᥚᥩᥛᥳ ᥘᥭᥲ ᥓᥬ ᥓᥩᥛᥰ ᥕᥧᥱ ᥕᥝᥳ။
ᥛᥫ ᥘᥭᥲ ᥞᥧᥳ ᥘᥩᥒ ᥘᥭᥳ ᥕᥝᥳ ᥑᥧᥢᥴ ᥕᥤ ᥘᥣᥖ ᥝᥣ “ᥐᥣᥢ ᥘᥒᥱ ᥘᥭᥴ ᥘᥭᥳ ... ᥐᥝ ᥑᥦᥢᥰ ᥚᥩᥛᥳ ᥕᥝᥳ ... ᥙᥥᥢ ᥐᥣᥢ ᥘᥦᥐ ᥟᥝ ᥑᥪᥢᥰ ... ᥔᥣᥱ ᥘᥥᥱ ᥞᥝᥰ ᥛᥥ ᥘᥧᥐ ᥕᥝᥳ ... ᥐᥝ ᥙᥥᥢ ᥘᥧᥐ ᥚᥬᥴ ᥖᥥᥳ ᥖᥥᥳ ᥘᥭᥴ ᥐᥩᥲ ... ᥐᥝ ᥑᥬᥲ ᥞᥧᥳ ... ᥐᥨᥢᥰ ᥛᥫᥒᥰ ᥐᥩᥲ ... ᥑᥬᥲ ᥞᥬᥲ ᥞᥧᥳ ... ᥛᥥ ᥘᥣᥴ ᥚᥥᥰ ᥞᥝᥰ ᥐᥩᥲ ... ᥞᥬᥲ ᥙᥨᥢᥳ ᥘᥩᥖ ᥑᥣᥛᥰ ᥙᥫᥢ ᥑᥣᥳ ᥑᥣᥭᥴ ... ᥟᥛᥱ ᥑᥬᥲ ᥞᥬᥲ ᥛᥤᥰ ... ᥘᥩᥒ ᥗᥣᥒᥱ ᥗᥫᥛᥴ ᥔᥒᥴ ... ᥘᥫᥴ ᥞᥝᥰ ᥛᥥ ᥘᥧᥐ ... ᥐᥩᥭᥰ ᥐᥣ ... ᥓᥨᥝ ᥐᥝ ᥙᥭᥱ ᥘᥭᥲ ᥞᥛᥰ ᥘᥭᥳ ... ᥙᥩᥭᥱ ᥙᥢ ᥛᥥ ᥐᥝ ᥐᥩᥢᥱ ...” ᥘᥭᥴ ᥘᥦᥲ ᥑᥧᥢᥴ ᥖᥣᥭᥱ ᥑᥪᥢᥲ ᥙᥩᥭᥱ ᥘᥣᥒᥰ ᥟᥩᥢᥱ ᥔᥥᥴ ᥞᥣᥒᥲ ᥞᥦᥢᥰ ᥞᥬᥲ ᥑᥧᥢᥴ ᥕᥤ ᥞᥛᥰ ᥖᥒᥰ ᥛᥤᥴ ᥘᥦᥲ ᥔᥫᥴ ᥕᥧᥱ ᥕᥝᥳ။
ᥚᥩᥒᥰ ᥛᥫ ᥖᥪᥐ ᥞᥣᥒᥲ ᥞᥦᥢᥰ ᥕᥧᥱ ᥘᥢᥳ ᥑᥧᥢᥴ ᥔᥣᥛᥴ ᥘᥨᥒᥴ ᥞᥩᥖ ᥗᥪᥒᥴ ᥛᥣᥰ။ ᥘᥭᥲ ᥞᥧᥳ ᥘᥩᥒ ᥞᥢᥴ ᥖᥣᥒᥰ ᥐᥧ ᥕᥫᥒ ᥕᥝᥳ ᥞᥣᥒᥲ ᥞᥦᥢᥰ ᥙᥬᥳ ᥒᥝᥰ ᥘᥣᥭᥰ ᥖᥣᥱ ᥖᥤᥴ ᥓᥩᥭ ᥗᥦᥛᥴ ᥓᥝᥲ ᥙᥤ ᥛᥢᥰ ᥝᥭᥳ ᥕᥧᥱ။ ᥛᥫ ᥖᥪᥐ ᥙᥬᥳ ᥕᥧᥱ ᥘᥢᥳ ᥝᥢᥰ ᥘᥫᥒ ᥢᥘᥣᥒᥰ ᥟᥩᥢᥱ ᥓᥬᥳ ᥑᥧᥢᥴ ᥔᥣᥛᥴ ᥐᥣᥱ ᥚᥥᥝᥲ ᥖᥤᥱ ᥞᥤᥛᥰ ᥗᥛᥲ ᥑᥝᥴ ᥛᥥ ᥘᥧᥐ ᥘᥢᥳ ᥕᥝᥳ။
ᥛᥫ ᥑᥧᥢᥴ ᥔᥣᥛᥴ ᥖᥤᥱ ᥗᥪᥒᥴ ᥞᥤᥛᥰ ᥛᥣᥐᥱ ᥞᥤᥢᥴ ᥘᥨᥒᥴ ᥞᥨᥭᥱ ᥘᥫᥒ ᥜᥣᥳ ᥖᥤᥱ ᥑᥧᥢᥱ ᥔᥣᥛᥴ ᥚᥖᥳ ᥛᥦᥢ ᥔᥥᥴ ᥘᥦᥒᥰ ᥘᥦᥲ ᥔᥥᥒᥴ ᥟᥩᥐᥱ ᥛᥣᥰ ᥛᥫᥢᥴ ᥜᥣᥳ ᥘᥒ ᥘᥨᥝᥲ ᥛᥦᥙ။ ᥗᥩᥛᥱ ᥔᥥᥒᥴ ᥖᥥᥳ ᥛᥫᥢᥴ ᥞᥣᥒᥲ ᥜᥣᥳ ᥖᥤᥱ ᥞᥐᥴ ᥐᥣᥱ ᥐᥛᥰ ᥘᥥᥝ။ ᥛᥫ ᥖᥨᥭᥰ ᥑᥪᥢᥰ ᥔᥛᥳ ᥜᥣᥳ ᥖᥤᥱ ᥖᥪᥐᥳ ᥛᥫᥢᥴ ᥐᥝᥱ ᥝᥭᥳ ᥕᥧᥱ။ ᥖᥤᥱ ᥐᥛᥰ ᥘᥬ ᥐᥩᥲ ᥙᥥᥢ ᥘᥢᥴ ᥑᥪᥢᥰ ᥕᥧᥱ ᥖᥤᥐᥱ ᥖᥤᥐᥱ။ ᥒᥤᥢᥰ ᥘᥣᥐᥱ ᥘᥣᥭᥰ ᥘᥦᥢᥱ ᥔᥥᥴ ᥛᥢᥰ ᥓᥝᥲ ᥐᥧᥭᥳ ᥛᥣᥐᥱ ᥞᥤᥢᥴ ᥖᥨᥭᥰ။ ᥘᥭᥲ ᥞᥢᥴ ᥓᥧᥛᥲ ᥛᥫᥒᥰ ᥛᥣᥝᥰ ᥘᥨᥒᥴ ᥛᥤᥰ ᥝᥭᥳ ᥕᥧᥱ ᥖᥬᥲ ᥛᥣᥐᥱ ᥞᥤᥢᥴ ᥘᥨᥒᥴ ᥘᥢᥳ ᥕᥧᥱ ᥕᥝᥳ။
ᥗᥪᥒᥴ ᥝᥢᥰ ᥟᥢ ᥑᥧᥢᥴ ᥕᥤ ᥖᥤᥴ ᥞᥛᥰ ᥛᥤᥴ ᥖᥒᥰ ᥔᥫᥴ ᥘᥢᥳ ᥐᥨᥢᥰ ᥛᥣᥰ ᥙᥬᥳ ᥖᥨᥭᥰ ᥙᥩᥰ ᥐᥣᥛ ᥐᥣᥱ ᥔᥥᥒᥲ။ ᥘᥩᥛᥳ ᥞᥨᥝᥳ ᥞᥥᥳ ᥙᥥᥢ ᥘᥒᥱ ᥑᥩᥐ ᥘᥨᥒᥴ ᥔᥥᥴ ᥞᥬᥲ ᥑᥧᥢᥴ ᥕᥤ ᥑᥝᥲ ᥕᥧᥱ ᥝᥭᥳ။ ᥘᥪᥢᥰ ᥘᥢᥳ ᥙᥩᥭᥱ ᥛᥤᥴ ᥑᥣᥭᥰ ᥔᥬᥱ ᥛᥢᥰ ᥓᥝᥲ။ ᥛᥤᥴ ᥑᥣᥭᥰ ᥑᥧᥢᥱ ᥙᥧᥒ ᥑᥝᥲ ᥓᥧᥰ။ ᥑᥧᥢᥴ ᥕᥤ ᥙᥖᥳ ᥔᥬᥱ ᥔᥩᥒᥴ ᥔᥣᥛᥴ ᥘᥣᥭᥰ ᥐᥩᥭᥰ ᥛᥤᥴ ᥑᥣᥭᥰ ᥘᥨᥛᥳ ᥟᥨᥙᥱ ᥗᥧᥴ ᥐᥣᥱ ᥐᥛᥰ ᥘᥥᥝ။ ᥔᥥᥒᥴ ᥞᥧᥢᥳ ᥐᥨᥢᥰ ᥙᥢᥰ ᥘᥢᥰ ᥐᥣᥱ ᥔᥥᥒᥲ။
ᥛᥤᥴ ᥑᥣᥭᥰ ᥖᥣᥭ ᥕᥝᥳ ᥙᥩᥭᥱ ᥔᥫᥴ ᥑᥝᥲ ᥓᥧᥰ ᥗᥦᥢᥲ။ ᥞᥬᥲ ᥔᥫᥴ ᥞᥣᥭᥳ ᥘᥦᥲ ᥙᥩᥭᥱ ᥟᥪᥙᥴ ᥝᥭᥳ ᥔᥤᥱ ᥞᥣᥲ ᥝᥢᥰ ᥕᥝᥳ။ ᥛᥫ ᥟᥝ ᥛᥣᥰ ᥞᥣᥴ ᥙᥣᥒᥱ ᥞᥛᥰ ᥐᥢ ᥘᥢᥳ ᥔᥥᥒᥴ ᥑᥣᥒᥰ ᥔᥥᥒᥴ ᥞᥩᥒᥳ ᥔᥫᥴ ᥘᥢᥳ ᥘᥢ ᥟᥨᥢᥴ ᥐᥣᥱ ᥔᥥᥒᥲ။ ᥚᥬᥴ ᥐᥩᥲ ᥔᥩᥢᥱ ᥝᥣ “ᥐᥛᥰ ᥘᥭᥳ ᥕᥝᥳ ... ᥑᥧᥢᥴ ᥕᥤ ᥖᥤᥴ ᥗᥨᥙᥱ ᥚᥥᥰ ᥞᥣᥭᥳ ...” ᥘᥭᥴ ᥐᥢ ᥕᥧᥱ။
ᥔᥫᥴ ᥟᥢ ᥙᥢᥰ ᥘᥢ ᥕᥧᥱ ᥞᥪᥛᥳ ᥞᥪᥛᥳ ᥘᥢᥳ ᥙᥩᥭᥱ ᥑᥝᥲ ᥑᥩᥐ ᥓᥧᥰ ᥑᥧᥢᥴ ᥕᥤ။ ᥛᥧᥒ ᥞᥢᥴ ᥑᥧᥢᥴ ᥕᥤ ᥕᥝᥳ ᥘᥭᥴ ᥐᥩᥲ ᥖᥥᥖᥱ ᥕᥥᥢ ᥐᥣᥱ ᥐᥛᥰ ᥘᥥᥝ။ ᥑᥧᥙᥳ ᥐᥣᥢᥰ ᥗᥧᥴ ᥑᥝᥲ ᥓᥧᥰ ᥑᥧᥢᥴ ᥕᥤ ᥔᥥᥴ ᥟᥝ ᥘᥧᥢᥱ ᥛᥢᥰ ᥗᥧᥴ ᥘᥨᥛᥴ ᥖᥤᥢ ᥑᥧᥢᥴ ᥕᥤ ᥕᥧᥱ ᥕᥝᥳ။ ᥚᥬᥴ ᥐᥩᥲ ᥟᥣᥛᥰ ᥘᥨᥒᥴ ᥟᥣᥛᥰ ᥘᥣᥒᥴ ᥔᥥᥴ ᥒᥣᥳ ᥙᥣᥐᥱ ᥒᥣᥳ ᥐᥣᥒᥰ ᥛᥧᥒ ᥖᥨᥭᥰ ᥔᥥᥒᥴ ᥐᥨᥢᥰ ᥖᥒᥰ ᥙᥣᥒᥱ ᥕᥥᥢ ᥔᥤᥖᥱ ᥔᥤᥖᥱ ᥕᥝᥳ။ ᥘᥪᥢᥰ ᥘᥢᥳ ᥓᥒᥱ ᥑᥧᥐᥴ ᥓᥬ ᥘᥭᥲ ᥔᥥᥴ ᥟᥩᥢ ᥐᥢ ᥞᥩᥒᥳ ᥔᥦᥢᥱ ᥝᥣ “ᥘᥭᥳ ᥕᥝᥳ ... ᥑᥧᥢᥴ ᥛᥫᥒᥰ ᥛᥣᥝᥰ ᥘᥨᥒᥴ ᥞᥝᥰ ... ᥘᥭᥳ ᥕᥝᥳ ... ᥘᥧᥐ ᥓᥣᥭᥰ ᥓᥝᥲ ᥘᥨᥒᥴ ᥛᥦᥝᥳ ᥙᥧᥒᥱ ᥞᥝᥰ ... ᥐᥛᥰ ᥘᥭᥳ ᥖᥥᥳ ... ᥚᥤᥴ ᥟᥛᥱ ᥘᥙᥳ ᥐᥨᥢᥰ ᥟᥛᥱ ᥘᥦᥢᥴ ᥘᥭᥲ ᥕᥝᥳ ...” ᥙᥢᥰ ᥞᥨᥢ ᥐᥣᥱ ᥖᥒᥰ ᥙᥣᥒᥱ။
ᥟᥛᥱ ᥙᥥᥢ ᥛᥣᥰ ᥘᥒᥱ ᥟᥥᥢᥰ ᥟᥣᥢᥰ ᥛᥢᥰ ᥘᥦᥲ ᥑᥧᥢᥴ ᥖᥣᥭᥱ ᥑᥪᥢᥲ ᥐᥨᥝᥳ ᥘᥫᥒ ᥘᥤ ᥟᥣᥭ ᥐᥩᥲ ᥛᥤᥰ ᥓᥬ ᥘᥛ ᥐᥩᥲ ᥙᥣᥰ ᥔᥥᥴ ᥓᥤ ᥔᥒᥱ ᥞᥬᥲ ᥔᥪᥐᥱ ᥛᥢᥰ ᥘᥩᥛᥳ ᥝᥦᥖᥳ ᥑᥧᥢᥴ ᥕᥤ ᥐᥛᥰ ᥘᥥᥝ ᥕᥝᥳ။ ᥛᥫ ᥘᥢᥳ ᥑᥧᥢᥴ ᥔᥣᥛᥴ ᥐᥪᥒᥳ ᥐᥣᥒᥳ ᥚᥧᥖᥴ ᥟᥩᥐᥱ ᥘᥬᥰ ᥚᥧᥒᥴ ᥐᥨᥢᥰ ᥕᥝᥳ ᥝᥦᥢᥴ ᥙᥧᥒ ᥐᥩᥖᥱ ᥞᥪᥖ ᥖᥪᥖ ᥘᥩᥒᥱ ᥑᥧᥢᥴ ᥖᥣᥭᥱ ᥑᥪᥢᥲ ᥕᥝᥳ ᥟᥝ ᥘᥦᥝᥰ ᥒᥣᥴ ᥝᥭᥳ ᥐᥣᥢᥲ ᥑᥨᥝᥰ ᥛᥢᥰ ᥐᥛᥰ ᥘᥥᥝ။
ᥑᥧᥢᥴ ᥔᥣᥛᥴ ᥓᥬᥳ ᥘᥦᥲ ᥑᥧᥢᥴ ᥖᥣᥭᥱ ᥑᥪᥢᥲ ᥘᥭᥲ ᥓᥤ ᥔᥒᥱ ᥘᥧᥐ ᥘᥩᥒᥳ ᥛᥢᥰ ᥗᥩᥭᥴ ᥟᥩᥐᥱ ᥙᥣᥒ ᥞᥛᥰ ᥐᥢ ᥘᥢᥳ ᥐᥛᥰ ᥘᥥᥝ။ ᥟᥩᥐᥱ ᥕᥣᥢᥴ ᥐᥣᥱ ᥕᥝᥳ ᥐᥩᥲ ᥑᥧᥢᥴ ᥔᥣᥛᥴ ᥖᥪᥐ ᥟᥝ ᥘᥦᥝᥰ ᥒᥣᥴ ᥐᥣᥢᥲ ᥑᥨᥝᥰ ᥑᥧᥢᥴ ᥖᥣᥭᥱ ᥑᥪᥢᥲ ᥝᥭᥳ ᥕᥧᥱ။ ᥘᥣᥒᥰ ᥟᥩᥢᥱ ᥟᥩᥐᥱ ᥛᥣᥰ ᥘᥬᥰ ᥐᥥ ᥐᥨᥢᥰ ᥟᥧᥛᥱ ᥝᥭᥳ ᥕᥧᥱ ᥘᥢᥳ ᥔᥥᥴ ᥕᥩᥢᥰ ᥞᥬᥲ ᥙᥩᥭᥱ ᥙᥢ ᥘᥦᥲ ᥑᥧᥢᥴ ᥔᥣᥛᥴ ᥙᥩᥭᥱ ᥑᥧᥢᥴ ᥖᥣᥭᥱ ᥑᥪᥢᥲ ᥕᥝᥳ ᥘᥪᥙ ᥞᥨᥝᥲ ᥛᥫᥰ ᥑᥪᥢᥰ ᥛᥫᥒᥰ ᥛᥤᥖ ᥐᥛᥰ ᥘᥥᥝ။ ᥖᥥᥱ ᥘᥢᥳ ᥛᥣᥰ ᥑᥧᥢᥴ ᥖᥣᥭᥱ ᥑᥪᥢᥲ ᥛᥤᥰ ᥘᥩᥒ ᥙᥦᥒᥰ ᥓᥬ ᥝᥭᥳ ᥘᥫᥴ ᥕᥤ ᥑᥣᥒᥴ ᥑᥛᥰ ᥑᥣᥴ ᥙᥤ ᥘᥩᥒᥳ ᥕᥧᥱ ᥕᥝᥳ။

ᥑᥪᥢᥲ ᥞᥣᥒᥲ ᥞᥨᥝᥴ

ᥝᥣᥭᥰ ᥔᥥᥴ ᥑᥧᥢᥴ ᥖᥣᥭᥱ ᥑᥪᥢᥲ ᥟᥩᥐᥱ ᥙᥣᥒ ᥐᥣᥱ ᥕᥝᥳ ᥐᥩᥲ ᥑᥧᥢᥴ ᥔᥣᥛᥴ ᥘᥨᥒᥴ ᥟᥝ ᥓᥧᥛᥲ ᥛᥫᥒᥰ ᥟᥣᥙ ᥙᥢ ᥑᥧᥢᥴ ᥕᥤ။ ᥔᥩᥒᥴ ᥙᥤ ᥘᥩᥒᥳ ᥟᥝ ᥓᥧᥛᥲ ᥛᥫᥒᥰ ᥛᥫᥰ ᥓᥧᥰ ᥞᥨᥝᥴ ᥛᥫᥒᥰ ᥛᥣᥝᥰ ᥘᥨᥒᥴ ᥐᥛᥰ ᥘᥥᥝ။ ᥘᥥᥴ ᥓᥧᥛᥲ ᥛᥫᥒᥰ ᥘᥭᥲ ᥔᥥᥴ ᥛᥝᥱ ᥐᥣᥰ ᥙᥥᥢ ᥘᥧᥐ ᥓᥣᥭᥰ ᥓᥝᥲ ᥜᥣᥳ ᥘᥨᥒᥴ ᥖᥥᥳ ᥘᥦᥲ ᥖᥣᥝᥳ ᥔᥪᥒᥱ ᥚᥩᥒᥰ ᥛᥫᥒᥰ ᥖᥒᥰ ᥘᥣᥭᥴ ᥕᥧᥐᥳ ᥛᥣᥢᥲ ᥛᥫᥒᥰ ᥟᥣᥙ ᥙᥢ ᥔᥩᥒᥴ ᥙᥤ ᥘᥩᥒᥳ ᥕᥧᥱ ᥕᥝᥳ။
ᥙᥤ 1311 “ᥑᥧᥢᥴ ᥕᥤ ᥑᥣᥒᥴ ᥑᥛᥰ ” ᥑᥪᥢᥲ ᥙᥥᥢ ᥓᥝᥲ ᥘᥨᥒᥴ ᥛᥫᥒᥰ ᥛᥣᥝᥰ ᥘᥨᥒᥴ ᥕᥝᥳ ᥔᥪᥙᥱ ᥕᥧᥱ ᥔᥝᥰ ᥖᥤ ᥝᥥᥒᥰ ᥘᥣᥒᥰ ᥟᥤᥱ။ ᥙᥤ 1312 ᥑᥣᥭᥳ ᥞᥣᥒᥲ ᥞᥨᥝᥴ ᥐᥣᥱ “ᥓᥥ ᥞᥭᥰ ”။ ᥙᥤ 1314 ᥙᥨᥐᥱ ᥖᥒᥲ ᥞᥨᥝᥴ ᥛᥬᥱ ᥖᥤ “ᥓᥥ ᥘᥣᥢᥳ ” ᥕᥝᥳ ᥑᥪᥢᥲ ᥓᥪ ᥙᥥᥢ “ᥔᥫᥴ ᥑᥣᥢᥱ ᥜᥣᥳ ”။ ᥛᥦᥢ ᥛᥫ ᥟᥣᥱ ᥕᥧᥳ ᥘᥭᥲ 24 ᥙᥤ ᥙᥫᥒᥱ ᥒᥛᥰ ᥙᥥᥢ “ᥓᥝᥲ ᥛᥩᥛᥱ ᥛᥣᥝᥰ ᥘᥨᥒᥴ ”။ ᥘᥭᥲ ᥓᥢᥳ “ᥔᥫᥴ ” ᥟᥢ ᥛᥤᥰ ᥟᥣᥱ ᥘᥣᥱ ᥟᥧᥙᥳ ᥙᥫᥒᥱ ᥚᥦᥢᥴ ᥓᥖᥴ ᥐᥣᥢᥴ ᥛᥫᥒᥰ ᥐᥣᥢ ᥔᥪᥐᥱ ᥛᥫᥒᥰ ᥐᥧ ᥙᥫᥒ ᥘᥢᥳ ᥕᥧᥱ ᥕᥝᥳ။
ᥑᥧᥢᥴ ᥔᥣᥛᥴ ᥘᥨᥒᥴ ᥔᥛᥳ ᥑᥪᥢᥲ ᥓᥪ “ᥔᥣᥛᥴ ᥘᥨᥒᥴ ᥜᥣᥳ ”ᥔᥥᥴ ᥙᥥᥢ ᥚᥧᥱ ᥐᥩᥢᥰ ᥐᥣᥢ ᥐᥦᥖᥱ ᥑᥥᥴ ᥛᥫᥒᥰ။ ᥘᥭᥲ ᥓᥢᥳ “ᥞᥧᥒᥳ ᥘᥨᥒᥴ ” ᥛᥫᥒᥰ ᥛᥣᥝᥰ ᥘᥨᥒᥴ ᥕᥝᥳ။ ᥝᥣᥭᥰ ᥘᥪᥢᥰ ᥛᥣᥰ ᥑᥧᥢᥴ ᥔᥣᥛᥴ ᥘᥨᥒᥴ ᥑᥪᥢᥲ ᥙᥥᥢ ᥓᥝᥲ ᥜᥣᥳ “ᥛᥫᥒᥰ ᥐᥩᥒ ”ᥗᥦᥢᥲ ᥕᥧᥱ ᥕᥝᥳ။

ᥔᥫᥴ ᥑᥣᥢᥱ ᥜᥣᥳ ᥘᥦᥲ ᥝᥥᥒᥰ ᥘᥢᥱ၊ ᥔᥦᥢᥴ ᥓᥥ

ᥙᥤ 1314 ᥔᥫᥴ ᥑᥣᥢᥱ ᥜᥣᥳ ᥞᥥᥖᥱ ᥙᥩᥭᥰ ᥑᥪᥢᥲ ᥞᥣᥒᥲ ᥞᥨᥝᥴ။ ᥛᥩᥐᥱ ᥗᥪᥒᥴ ᥓᥝᥲ ᥜᥣᥳ ᥝᥥᥒᥰ ᥘᥢᥱ “ᥓᥝᥲ ᥙᥣᥢᥰ ᥘᥩᥭᥳ ” ᥘᥦᥲ ᥓᥝᥲ ᥜᥣᥳ ᥔᥦᥢᥴ ᥓᥥ “ᥖᥣᥝᥳ ᥘᥩᥭᥳ ᥑᥥᥱ ” ᥝᥣ “ᥘᥒᥱ ᥞᥪᥴ ᥔᥪᥒᥱ ᥓᥪᥒ ᥛᥫᥒᥰ ᥖᥭᥰ ... ᥖᥥᥴ ᥙᥥᥢ ᥐᥩᥢᥲ ᥘᥥᥝ ᥐᥢ ᥔᥥᥴ ... ᥛᥢᥲ ᥐᥪᥛᥰ ᥐᥣᥱ ᥘᥣᥲ ᥘᥦᥲ ... ᥗᥧᥐᥴ ᥘᥭᥲ ᥞᥨᥛ ᥐᥢ ... ᥙᥣᥢᥱ ᥙᥩᥒ ᥛᥨᥢᥳ ᥛᥥᥰ ᥘᥒᥱ ᥞᥪᥴ ᥘᥭᥴ ᥘᥢᥳ ... ᥞᥬᥲ ᥞᥝᥰ ᥙᥤ ᥘᥩᥒᥳ ... ᥘᥭᥲ ᥟᥧᥙᥱ ᥐᥢ ᥘᥦᥲ ... ᥑᥦᥢᥰ ᥖᥩ ᥑᥪᥢᥲ ᥛᥣᥰ ᥔᥥᥴ ᥐᥛᥰ ...” ᥘᥭᥴ ᥘᥦᥲ
ᥔᥩᥒᥴ ᥓᥝᥲ ᥖᥩᥙᥱ ᥝᥣ “ᥕᥤ ᥑᥣᥒᥴ ᥑᥛᥰ ᥟᥫᥭᥰ ... ᥛᥬᥰ ᥙᥥᥢ ᥘᥩᥒᥳ ᥞᥝᥰ ᥟᥫᥰ ... ᥞᥝᥰ ᥟᥛᥱ ᥓᥬ ᥘᥩᥒᥳ ᥛᥬᥰ ... ᥞᥬᥲ ᥞᥝᥰ ᥐᥣᥱ ᥓᥧᥰ ᥛᥬᥰ ᥘᥭᥴ ᥘᥢᥳ ... ᥞᥝᥰ ᥟᥛᥱ ᥐᥣᥱ ... ᥛᥬᥰ ᥟᥫᥰ ... ᥗᥧᥐᥴ ᥛᥣᥰ ᥓᥧᥰ ᥞᥝᥰ ... ᥛᥬᥰ ᥑᥬᥲ ᥛᥣᥰ ᥐᥩᥲ ᥛᥣᥰ ... ᥟᥛᥱ ᥑᥬᥲ ᥛᥣᥰ ᥐᥩᥲ ... ᥕᥧᥱ ᥞᥣᥒᥰ ᥛᥬᥰ ᥘᥣᥲ ... ᥞᥝᥰ ᥖᥥᥴ ᥕᥧᥱ ᥞᥒᥰ ᥞᥝᥰ ... ᥕᥣᥱ ᥛᥣᥰ ᥕᥣᥳ ᥐᥝᥰ ᥔᥒᥴ ...” ᥘᥭᥴ ᥕᥝᥳ။
ᥛᥩᥐᥱ ᥙᥣᥒᥰ ᥗᥦᥢᥲ ᥔᥣᥛᥴ ᥙᥩᥐ ᥐᥩᥲ ᥟᥛᥱ ᥕᥩᥛᥰ ᥛᥣᥰ ᥘᥦᥲ ᥔᥫᥴ ᥑᥣᥢᥱ ᥜᥣᥳ ᥔᥨᥝᥱ ᥔᥪᥐᥱ ᥖᥪᥐᥱ ᥐᥛᥰ ᥘᥥᥝ။ ᥘᥭᥲ ᥑᥣᥛᥱ ᥞᥙᥳ ᥖᥪᥐᥱ ᥑᥪᥢᥰ ᥘᥦᥲ ᥔᥪᥐᥰ ᥓᥥ ᥘᥣᥢᥳ ᥟᥛᥱ ᥑᥣᥛᥱ ᥘᥭᥲ။ ᥗᥩᥭᥴ ᥑᥪᥢᥰ ᥗᥪᥒᥴ “ᥟᥧᥛᥱ ᥙᥣᥒ ᥓᥥ ᥞᥭᥰ ”။ ᥑᥧᥢᥴ ᥔᥣᥛᥴ ᥘᥨᥒᥴ ᥞᥣᥒᥲ ᥔᥪᥐᥱ ᥖᥪᥐᥱ ᥑᥪᥢᥰ။ ᥔᥫᥐᥱ ᥝᥥᥒᥰ ᥘᥢᥱ၊ ᥔᥦᥢᥴ ᥓᥥ ᥔᥧᥛᥰ ᥐᥣᥢᥳ ᥐᥣᥱ ᥕᥧᥱ ᥕᥝᥳ။ ᥖᥣᥝᥳ ᥘᥩᥭᥳ ᥑᥥᥱ ᥟᥝ ᥘᥩᥒᥳ ᥕᥤᥒᥰ ᥛᥢᥰ “ᥘᥣᥒᥰ ᥟᥭᥱ ᥑᥛᥰ ᥚᥩᥒᥴ ” ᥟᥣᥙ ᥙᥢ ᥔᥫᥴ ᥑᥣᥢᥱ ᥜᥣᥳ ᥔᥥᥴ ᥕᥩᥛᥰ ᥞᥥᥖᥱ ᥛᥫᥒᥰ ᥘᥥᥝ ᥐᥢ ᥘᥦᥲ ᥔᥪᥐᥱ ᥕᥝᥳ ᥐᥣᥱ ᥕᥧᥱ ᥕᥝᥳ။

ᥔᥫᥴ ᥑᥣᥢᥱ ᥜᥣᥳ ᥘᥦᥲ ᥛᥫᥒᥰ ᥛᥤᥖ

ᥑᥧᥢᥴ ᥖᥣᥭᥱ ᥑᥪᥢᥲ ᥐᥩᥲ ᥟᥛᥱ ᥙᥥᥢ ᥛᥣᥰ ᥘᥒᥱ ᥟᥣᥒᥲ ᥟᥣᥢᥰ ᥐᥩᥭᥰ ᥛᥝᥱ ᥐᥣᥰ ᥙᥣᥭ ᥘᥭᥲ ᥑᥣᥛᥱ ᥑᥧᥢᥴ ᥔᥣᥛᥴ ᥘᥨᥒᥴ ᥖᥤ ᥕᥩᥙᥱ ᥝᥭᥳ ᥚᥣᥭᥱ ᥘᥣᥲ ᥐᥨᥢᥰ ᥛᥫᥒᥰ ᥖᥒᥰ ᥘᥣᥭᥴ ᥘᥦᥲ ᥛᥤᥰ ᥘᥩᥒ ᥙᥦᥒᥰ ᥓᥒᥰ ᥘᥫᥴ ᥛᥫᥒᥰ ᥛᥣᥝᥰ ᥝᥭᥳ။ ᥛᥫ ᥙᥤ 1314 ᥔᥫᥴ ᥑᥣᥢᥱ ᥜᥣᥳ ᥞᥥᥖᥱ ᥙᥩᥭᥰ ᥑᥪᥢᥲ ᥞᥣᥒᥲ ᥞᥨᥝᥴ ᥘᥦᥲ ᥛᥩᥐᥱ ᥙᥣᥒᥰ ᥐᥩᥲ ᥟᥛᥱ ᥑᥝᥲ ᥞᥨᥛ ᥓᥩᥛᥰ။
ᥙᥤ 1315 ᥝᥣᥭᥰ ᥔᥥᥴ ᥖᥪᥐᥱ ᥔᥦᥢᥴ ᥓᥥ၊ ᥝᥥᥒᥰ ᥘᥢᥱ ᥕᥝᥳ ᥔᥫᥴ ᥑᥣᥢᥱ ᥜᥣᥳ ᥙᥩᥭᥱ ᥐᥨᥢᥰ ᥔᥤᥙᥴ ᥐᥨᥝᥳ ᥟᥝ ᥘᥤᥐ “ᥞᥬᥲ ᥘᥭᥲ ᥐᥧᥛ ᥐᥢ ᥘᥩᥒ ᥛᥣᥢᥲ ᥛᥫᥒᥰ ᥘᥦᥲ ... ᥑᥪᥢᥲ ᥓᥧᥰ ᥓᥥ ᥘᥣᥢᥳ ᥔᥥᥴ ᥐᥛᥰ ...” ᥘᥢᥳ ᥔᥨᥒᥱ ᥗᥪᥒᥴ ᥛᥫᥒᥰ ᥛᥤᥖ ᥕᥧᥱ ᥕᥝᥳ။ ᥞᥙᥳ ᥞᥢᥴ ᥘᥤᥐ ᥕᥝᥳ ᥑᥧᥢᥴ ᥖᥣᥭᥱ ᥑᥪᥢᥲ ᥖᥤ ᥕᥩᥙᥰ ᥐᥨᥢᥰ ᥔᥤᥙᥴ ᥐᥨᥝᥳ ᥘᥢᥳ ᥔᥥᥴ ᥖᥦᥙᥱ ᥖᥣᥭ ᥙᥦᥖ ᥓᥥᥖᥱ ᥐᥨᥝᥳ။ ᥙᥩᥭᥱ ᥔᥣᥛᥴ ᥐᥨᥝᥳ ᥟᥝ ᥘᥤᥐ ᥝᥣ
“ᥘᥒᥱ ᥛᥬᥰ ᥕᥤ ᥑᥣᥒᥴ ᥑᥛᥰ ... ᥘᥧᥐ ᥛᥥ ᥘᥩᥭᥳ ... ᥟᥢ ᥛᥨᥝᥴ ᥘᥥᥢᥲ ᥓᥧᥳ ᥐᥦᥛ ᥚᥨᥝᥴ ... ᥟᥛᥱ ᥞᥧᥳ ᥝᥣ ... ᥟᥧᥲ ᥛᥬᥰ ᥙᥥᥢ ᥚᥬᥴ ᥖᥥᥳ ᥘᥢᥳ ... ᥘᥦᥱ ᥞᥣᥴ ᥞᥤᥛᥴ ᥕᥣᥳ ... ᥓᥨᥢ ᥐᥝᥰ ᥛᥫᥒᥰ ᥙᥫᥢ ᥔᥥᥴ ... ᥑᥬᥲ ᥛᥣᥰ ᥞᥥᥖᥱ ... ᥓᥝᥲ ᥙᥫᥒᥱ ᥖᥒᥰ ᥘᥣᥭᥴ ᥕᥧᥱ ᥘᥭᥳ ... ᥐᥝ ᥟᥛᥱ ᥚᥩᥛᥳ ...” ᥘᥭᥴ ᥘᥢᥳ ᥔᥨᥒᥱ ᥗᥪᥒᥴ ᥔᥫᥴ ᥑᥢᥱ ᥜᥣᥳ ᥕᥧᥱ ᥕᥝᥳ။
ᥐᥨᥢᥰ ᥔᥣᥛᥴ ᥐᥨᥝᥳ ᥟᥝ ᥘᥤᥐ ᥛᥫᥰ ᥕᥒᥰ ᥙᥭᥱ ᥖᥢᥰ ᥗᥪᥒᥴ ᥓᥥ ᥘᥣᥢᥳ။ ᥑᥧᥢᥴ ᥖᥣᥭᥱ ᥑᥪᥢᥲ ᥟᥩᥢ ᥞᥨᥝᥴ ᥑᥧᥢᥴ ᥖᥣᥭᥱ ᥐᥭᥱ၊ ᥑᥧᥢᥴ ᥖᥣᥭᥱ ᥖᥝ၊ ᥑᥧᥢᥴ ᥖᥣᥭᥱ ᥖᥤᥒᥱ၊ ᥑᥧᥢᥴ ᥔᥣᥛᥴ ᥑᥪᥢᥲ ᥖᥪᥐᥱ ᥛᥫᥒᥰ ᥛᥣᥝᥰ ᥖᥩᥢᥲ ᥖᥬᥲ ᥐᥛᥰ ᥘᥥᥝ ᥕᥝᥳ။ ᥛᥣᥢᥲ ᥞᥨᥭᥲ၊ ᥛᥣᥢᥲ ᥛᥩᥢᥰ၊ ᥛᥨᥝᥱ ᥔᥤ၊ ᥘᥛᥳ ᥞᥤᥰ၊ ᥘᥩᥒᥴ ᥓᥩᥢᥲ ᥙᥥᥢ ᥚᥪᥢᥰ ᥙᥥᥢ ᥜᥭᥰ ᥘᥧᥳ ᥘᥦᥝᥴ ᥐᥣᥱ ᥛᥨᥖᥴ ᥕᥝᥳ။
ᥔᥫᥴ ᥑᥣᥢᥱ ᥜᥣᥳ ᥑᥤᥱ ᥔᥪᥐᥱ ᥒᥣᥰ ᥘᥫᥒ ᥔᥣᥛᥴ ᥘᥨᥒᥴ ᥜᥣᥳ ᥐᥩᥢᥰ ᥔᥫᥐᥱ ᥛᥫᥒᥰ ᥑᥣᥢᥴ၊ ᥓᥥ ᥜᥣᥒᥴ၊ ᥛᥫᥒᥰ ᥝᥢᥰ ᥘᥨᥒᥰ ᥖᥪᥐᥱ ᥑᥪᥢᥰ။ ᥑᥧᥢᥴ ᥖᥣᥭᥱ ᥑᥪᥢᥲ ᥟᥛᥱ ᥑᥣᥛᥱ ᥘᥭᥲ။ ᥐᥣᥢᥳ ᥙᥣᥭ ᥗᥪᥒᥴ ᥛᥫᥒᥰ ᥛᥤᥖ။ ᥔᥪᥐᥱ ᥛᥫᥒᥰ ᥛᥣᥝᥰ ᥘᥨᥭᥰ ᥓᥩᥛᥰ ᥗᥦᥢᥲ။ ᥔᥪᥐᥱ ᥛᥫᥒᥰ ᥛᥤᥖ ᥞᥙ ᥖᥪᥐᥱ ᥘᥦᥲ ᥐᥥᥒᥰ ᥘᥣᥝ၊ ᥝᥥᥒᥰ ᥝᥨᥝᥰ ᥙᥥᥢ ᥚᥪᥢᥰ ᥙᥥᥢ ᥜᥭᥰ ᥐᥣᥱ ᥔᥥᥒᥲ ᥕᥝᥳ။
ᥑᥧᥢᥴ ᥖᥣᥭᥱ ᥑᥪᥢᥲ ᥙᥣᥭ ᥗᥪᥒᥴ ᥛᥫᥒᥰ ᥛᥤᥖ။ ᥐᥨᥢᥰ ᥛᥫᥒᥰ ᥘᥧᥳ ᥕᥬᥱ ᥔᥧᥛᥰ ᥘᥛᥴ ᥘᥦᥢᥱ ᥘᥦᥲ ᥚᥩᥒᥰ ᥛᥫᥒᥰ ᥟᥩᥢ ᥐᥢ ᥖᥣᥒᥱ ᥝᥣ “ᥐᥨᥢᥰ ᥛᥫᥒᥰ ᥘᥧᥳ ᥕᥬᥱ ᥔᥧᥛᥰ ᥘᥨᥒᥴ ᥘᥦᥢᥱ ᥕᥝᥳ ᥑᥣᥲ ... ᥗᥧᥐᥴ ᥝᥣᥒᥰ ᥐᥩᥲ ... ᥝᥣᥒᥰ ᥔᥥᥴ ᥖᥥᥴ ᥘᥤ ᥕᥧᥱ ...” ᥘᥭᥴ ᥘᥦᥲ “ᥔᥧᥴ ᥑᥬᥲ ᥘᥩᥛᥰ ᥐᥩᥲ ... ᥘᥩᥛᥰ ᥞᥣᥒᥰ ᥔᥧᥴ ... ᥐᥝ ᥖᥥᥳ ᥟᥛᥱ ᥘᥩᥛᥰ ” ᥘᥭᥴ ᥔᥥᥴ ᥞᥦᥢᥰ ᥟᥝ ᥖᥙ ᥓᥣᥒᥳ ᥞᥥᥒᥴ ᥘᥫᥒ ᥟᥩᥐᥱ ᥖᥪᥐᥱ ᥖᥙ ᥓᥣᥒᥳ ᥛᥫᥒᥰ ᥛᥣᥝᥰ ᥟᥢ ᥛᥤᥰ ᥙᥦᥖᥱ ᥙᥣᥐᥱ ᥐᥩᥭᥰ ᥘᥢᥳ ᥕᥧᥱ ᥕᥝᥳ။ ᥖᥙ ᥓᥣᥒᥳ ᥛᥫᥒᥰ ᥛᥤᥖ ᥔᥧᥛᥰ ᥐᥣᥢᥳ ᥔᥥᥴ ᥘᥭᥲ ᥙᥣᥭ ᥑᥝᥲ ᥗᥫᥢᥱ ᥐᥣᥱ ᥐᥨᥝᥳ ᥞᥧᥰ ᥐᥨᥝᥳ ᥖᥣᥒᥰ ᥕᥧᥱ ᥕᥝᥳ။ ᥔᥪᥐᥱ ᥛᥫᥒᥰ ᥛᥣᥝᥰ ᥖᥤ ᥕᥩᥙᥱ ᥘᥭᥲ ᥑᥧᥢᥴ ᥖᥣᥭᥱ ᥑᥪᥢᥲ ᥔᥥᥴ ᥟᥣᥙ ᥙᥢ ᥔᥫᥴ ᥑᥣᥢᥱ ᥜᥣᥳ ᥕᥧᥱ ᥕᥝᥳ။
ᥚᥩᥒᥰ ᥛᥫᥒᥰ ᥛᥫᥒᥰ ᥛᥤᥖ ᥟᥩᥢ ᥐᥢ ᥞᥦᥢᥰ ᥟᥝ ᥑᥨᥝᥰ ᥑᥩᥒᥴ ᥚᥣᥐᥱ ᥖᥩᥢᥲ ᥑᥝᥲ ᥐᥨᥛᥲ ᥐᥩᥛᥰ ᥝᥣᥒᥰ ᥓᥧᥰ ᥘᥦᥲ ᥔᥫᥴ ᥑᥣᥢᥱ ᥜᥣᥳ ᥟᥝ ᥑᥧᥢᥴ ᥖᥣᥭᥱ ᥑᥪᥢᥲ ᥟᥣᥙ ᥙᥢ ᥑᥪᥢᥰ ᥔᥥᥴ ᥘᥣᥖ ᥝᥣ “ᥓᥝᥲ ᥓᥩᥛ ᥔᥧᥴ ᥘᥭᥳ ... ᥐᥨᥢᥰ ᥛᥫᥒᥰ ᥘᥧᥳ ᥔᥧᥛᥰ ᥕᥩᥢᥳ ᥛᥢᥰ ... ᥘᥛᥴ ᥘᥦᥢᥱ ᥕᥝᥳ ... ᥑᥬᥲ ᥟᥝ ᥞᥥᥖᥱ ᥔᥒᥴ ᥐᥩᥲ ... ᥟᥝ ᥔᥧᥴ ᥝᥣ ...” ᥘᥭᥴ ᥘᥦᥲ ᥚᥩᥒᥰ ᥛᥫᥒᥰ ᥐᥩᥲ ᥖᥦᥙᥱ ᥙᥦᥖ ᥑᥧᥢᥴ ᥖᥣᥭᥱ ᥑᥪᥢᥲ ᥖᥤ “ᥓᥧᥢᥱ ᥐᥨᥝᥰ ” ᥕᥧᥱ ᥕᥝᥳ။ ᥘᥪᥢᥰ ᥘᥢᥳ ᥔᥫᥴ ᥑᥣᥢᥱ ᥜᥣᥳ ᥕᥧᥐ ᥘᥩᥒᥳ ᥑᥧᥢᥴ ᥖᥣᥭᥱ ᥑᥪᥢᥲ “ᥑᥧᥢᥴ ᥖᥣᥭᥱ ᥐᥭᥱ ” ᥑᥪᥢᥲ ᥙᥧᥖ ᥞᥨᥝᥴ ᥛᥫᥒᥰ ᥛᥤᥖ ᥕᥧᥱ ᥕᥝᥳ။
ᥘᥣᥒᥰ ᥜᥣᥳ ᥑᥧᥢᥴ ᥖᥣᥭᥱ ᥑᥪᥢᥲ “ᥘᥣᥒᥰ ᥟᥣᥛ ᥑᥩᥒᥱ ” ᥟᥝ ᥘᥩᥒᥳ ᥕᥤᥒᥰ ᥛᥢᥰ “ᥘᥣᥒᥰ ᥐᥣᥢᥲ ᥑᥛᥰ ᥔᥬᥴ ” ᥔᥣᥐ ᥗᥪᥒᥴ ᥔᥫᥴ ᥑᥣᥢᥱ ᥜᥣᥳ ᥔᥥᥴ ᥕᥩᥢᥰ ᥙᥪᥒ ᥞᥨᥛ ᥚᥨᥭᥰ ᥞᥬᥲ ᥖᥨᥭᥰ ᥗᥪᥒᥴ ᥑᥝᥴ ᥛᥥ ᥘᥧᥐ ᥘᥭᥴ ᥕᥝᥳ။ ᥑᥧᥢᥴ ᥖᥣᥭᥱ ᥑᥪᥢᥲ ᥘᥦᥲ ᥘᥣᥒᥰ ᥟᥣᥛ ᥑᥩᥒᥱ ᥞᥨᥛ ᥐᥢ ᥛᥤᥰ ᥝᥭᥳ ᥘᥧᥐ ᥘᥣᥒᥰ ᥕᥥᥲ ᥑᥪᥢᥲ ᥘᥦᥲ ᥑᥧᥢᥴ ᥟᥣᥭᥲ ᥙᥧᥰ ᥑᥛᥰ ᥘᥭᥴ ᥔᥩᥒᥴ ᥐᥨᥝᥳ။ ᥔᥫᥴ ᥑᥣᥢᥱ ᥜᥣᥳ ᥞᥩᥒᥳ ᥑᥝᥴ ᥛᥥ ᥘᥧᥐ ᥛᥫᥰ ᥕᥧᥱ ᥓᥩᥛᥰ ᥛᥫᥒᥰ ᥛᥣᥝᥰ ᥕᥧᥱ ᥕᥝᥳ။
ᥚᥩᥒᥰ ᥛᥫ ᥖᥪᥐᥳ ᥖᥪᥐᥱ ᥛᥫᥒᥰ ᥛᥤᥖ ᥕᥧᥱ ᥘᥢᥳ ᥛᥥᥰ ᥘᥣᥒᥰ ᥖᥣᥝᥳ ᥘᥨᥒᥴ ᥛᥫᥒᥰ ᥛᥣᥝᥰ “ᥖᥣᥝᥳ ᥑᥣᥒᥴ ᥛᥫᥒᥰ ” ᥘᥧᥳ ᥞᥣᥭᥴ ᥖᥣᥭ ᥐᥣᥱ ᥖᥒᥰ ᥘᥩᥒ ᥖᥒᥰ ᥘᥒᥴ ᥙᥦᥖ ᥘᥦᥲ ᥟᥛᥱ ᥛᥤᥰ ᥚᥬᥴ ᥘᥧᥛᥰ ᥘᥣᥰ။ ᥘᥣᥒᥰ ᥟᥣᥛ ᥑᥩᥒᥱ ᥑᥝᥴ ᥛᥥ ᥘᥧᥐ ᥐᥩᥲ ᥟᥛᥱ ᥛᥤᥰ ᥖᥤ ᥙᥪᥒ ᥘᥭᥴ ᥔᥥᥴ ᥓᥝᥲ ᥔᥫᥴ ᥑᥣᥢᥱ ᥜᥣᥳ ᥞᥬᥲ ᥖᥣᥝᥳ ᥑᥣᥒᥴ ᥛᥫᥒᥰ ᥘᥦᥲ ᥘᥣᥒᥰ ᥟᥣᥛ ᥑᥩᥒᥱ ᥔᥩᥢᥳ ᥛᥤᥒ ᥐᥨᥙ ᥐᥧ ᥐᥢ ᥕᥧᥱ ᥕᥝᥳ။

ᥛᥥᥱ ᥛᥣᥢᥲ ᥛᥥᥰ ᥛᥫᥒᥰ

1. ᥘᥣᥲ ᥝᥢᥰ ᥓᥣᥢᥰ ᥘᥦᥰ ᥘᥣᥲ ᥝᥢᥰ ᥟᥩᥐᥱ

ᥛᥫ ᥙᥤ 1316 ᥘᥢᥳ ᥔᥫᥴ ᥑᥣᥢᥱ ᥜᥣᥳ ᥑᥤᥱ ᥔᥪᥐᥱ ᥛᥥᥱ ᥛᥣᥢᥲ ᥛᥫᥒᥰ ᥗᥪᥒᥴ ᥛᥫᥒᥰ ᥛᥤᥖ၊ ᥕᥩᥒ ᥞᥨᥭᥲ၊ ᥛᥫᥒᥰ ᥙᥣᥭᥰ၊ ᥛᥫᥒᥰ ᥘᥣᥭᥰ၊ ᥐᥥᥒᥰ ᥛᥭᥱ၊ ᥐᥥᥒᥰ ᥖᥧᥒᥴ၊ ᥐᥥᥒᥰ ᥞᥧᥒᥳ၊ ᥐᥪᥒᥱ ᥛᥣᥳ၊ ᥛᥫᥒᥰ ᥖᥤᥒᥴ၊ ᥛᥫᥒᥰ ᥐᥣᥳ ᥔᥥᥴ ᥚᥦᥝᥴ ᥑᥪᥢᥰ ᥓᥥ ᥘᥣᥢᥳ ᥕᥧᥱ ᥕᥝᥳ။ ᥛᥫ ᥗᥪᥒᥴ ᥛᥫᥒᥰ “ᥠᥣᥭᥰ ᥔᥤᥱ ᥘᥤ ”(Chaisiri)ᥘᥢᥳ ᥖᥪᥐᥱ ᥐᥢ ᥞᥪᥒᥴ ᥓᥥᥖᥱ ᥘᥫᥢ။ ᥘᥩᥛᥳ ᥝᥦᥖᥳ ᥛᥫᥒᥰ ᥝᥭᥳ ᥔᥥᥴ ᥟᥛᥱ ᥔᥤᥛᥰ ᥛᥫᥒᥰ ᥘᥭᥲ။ ᥐᥛᥰ ᥘᥪᥢᥰ ᥔᥧᥖᥴ ᥑᥧᥢᥴ ᥛᥫᥒᥰ “ᥠᥣᥭᥰ ᥔᥤᥱ ᥘᥤ ” ᥚᥝᥴ ᥛᥣᥢᥲ ᥛᥫᥒᥰ ᥛᥢᥰ ᥔᥥᥴ ᥟᥩᥐᥱ ᥙᥣᥭ ᥐᥣᥱ ᥘᥦᥰ ᥔᥫᥴ ᥑᥣᥢᥱ ᥜᥣᥳ ᥓᥒᥱ ᥔᥤᥛᥰ ᥘᥭᥲ ᥕᥝᥳ။

2. ᥛᥫᥒᥰ ᥘᥫᥴ (ᥘᥣᥲ ᥝᥢᥰ ᥞᥩᥒᥱ )

ᥙᥤ 1317 ᥘᥢᥳ ᥔᥫᥴ ᥑᥣᥢᥱ ᥜᥣᥳ ᥟᥩᥢ ᥞᥨᥝᥴ ᥔᥣᥛᥴ ᥘᥨᥒᥴ ᥜᥣᥳ၊ ᥖᥣᥝᥳ ᥑᥣᥒᥴ ᥛᥨᥢᥰ၊ ᥖᥣᥝᥳ ᥜᥣᥳ ᥘᥨᥝᥱ၊ ᥖᥣᥝᥳ ᥞᥣᥢᥴ ᥐᥭᥱ၊ ᥖᥣᥝᥳ ᥔᥫᥴ ᥕᥥᥢᥰ ᥑᥤᥱ ᥔᥪᥐᥱ ᥑᥪᥢᥲ ᥓᥫᥰ ᥕᥣᥛᥲ ᥙᥥᥢ ᥘᥒᥴ ᥘᥤᥢ ᥛᥣᥢᥲ ᥛᥫᥒᥰ ᥖᥭᥰ ᥛᥣᥰ ᥛᥫᥒᥰ ᥔᥦᥢᥴ (ᥕᥧᥱ ᥢᥣᥢᥱ ) ᥘᥢᥳ ᥘᥦᥰ ᥑᥪᥢᥲ ᥗᥪᥒᥴ “ᥠᥦᥢᥱ ᥖᥧᥱ ”(Chengtu)။ ᥘᥭᥲ ᥑᥣᥛᥱ ᥞᥙᥳ ᥖᥪᥐᥴ ᥑᥪᥢᥰ ᥔᥥᥴ ᥑᥥᥒ ᥔᥫᥐᥱ ᥖᥨᥝᥱ ᥐᥢ ᥝᥭᥳ ᥕᥝᥳ။
ᥚᥩᥒᥰ ᥘᥒᥱ ᥘᥢᥴ ᥓᥝᥲ ᥜᥣᥳ “ᥐᥪᥒᥱ ᥛᥣᥳ” ᥔᥨᥝᥱ ᥔᥪᥐᥱ ᥖᥪᥐᥱ ᥖᥒᥰ ᥘᥩᥒ ᥖᥒᥰ ᥘᥒᥴ ᥘᥦᥰ ᥛᥒᥰ ᥐᥣᥳ၊ ᥛᥒᥰ ᥐᥨᥝᥰ၊ ᥖᥤ ᥛᥣᥳ၊ ᥘᥣᥰ ᥘᥨᥒᥴ၊ ᥑᥨᥝᥴ ᥑᥥ၊ ᥛᥨᥝᥲ ᥖᥩᥒᥰ ᥙᥥᥢ ᥚᥪᥢᥰ ᥙᥥᥢ ᥜᥭᥰ ᥖᥒᥰ ᥛᥨᥖᥴ။ ᥔᥣᥛᥴ ᥘᥨᥒᥴ ᥜᥣᥳ ᥑᥤᥱ ᥔᥫᥐᥱ ᥘᥨᥒᥰ ᥞᥙᥳ ᥖᥪᥐᥰ ᥖᥤ ᥖᥤ ᥛᥣᥳ ᥘᥦᥲ ᥔᥪᥐᥱ ᥚᥣᥭᥱ ᥐᥪᥒᥱ ᥛᥣᥳ ᥟᥛᥱ ᥑᥣᥛᥱ ᥘᥭᥲ ᥐᥣᥢᥳ ᥙᥣᥭ။ ᥖᥤ ᥘᥭᥲ ᥓᥝᥲ ᥜᥣᥳ ᥐᥪᥒᥱ ᥛᥣᥳ ᥔᥥᥴ ᥖᥦᥙᥱ ᥙᥦᥖ ᥖᥤ “ᥘᥣᥰ ᥘᥨᥒᥴ ” ᥕᥧᥱ ᥕᥝᥳ။ ᥝᥣᥭᥰ ᥘᥢᥳ ᥕᥝᥳ ᥔᥣᥛᥴ ᥘᥨᥒᥴ ᥜᥣᥳ ᥐᥩᥢᥰ ᥔᥪᥐᥱ ᥑᥪᥢᥲ ᥛᥫᥰ ᥓᥧᥰ ᥔᥫᥴ ᥑᥣᥢᥱ ᥜᥣᥳ ᥑᥪᥢᥰ ᥔᥥᥴ ᥞᥨᥛ ᥐᥢ ᥕᥪ ᥔᥪᥐᥱ ᥓᥧᥰ “ᥠᥦᥢᥱ ᥖᥧᥱ ” ᥗᥦᥢᥲ။
ᥛᥫ ᥘᥢᥳ ᥛᥦᥢ ᥛᥫ ᥞᥨᥝᥴ ᥑᥛᥰ ᥑᥫᥰ ᥛᥧᥢᥱ ᥐᥨᥝᥰ ᥔᥣᥭᥴ ᥔᥪᥙᥱ ᥑᥫᥰ “ᥕᥣᥢᥱ ” (Yuan) ᥚᥩᥒᥰ ᥒᥛᥰ ᥛᥫᥒᥰ ᥑᥥᥱ ᥝᥭᥳ။ ᥘᥭᥲ ᥑᥣᥝᥱ ᥔᥪᥐᥱ ᥛᥫᥒᥰ ᥛᥣᥝᥰ ᥙᥥᥢ ᥛᥧᥐᥳ ᥙᥥᥢ ᥚᥧᥒᥴ ᥑᥪᥢᥲ ᥕᥪ ᥔᥪᥐᥱ ᥝᥭᥳ ᥕᥧᥱ ᥘᥦᥰ ᥙᥩᥭᥱ ᥐᥨᥢᥰ ᥘᥨᥒᥰ ᥗᥣᥛᥴ ᥝᥣ “ᥑᥤᥱ ᥔᥪᥐᥱ ᥑᥪᥢᥲ ᥛᥣᥰ ᥘᥭᥳ ... ᥐᥣᥒ ᥓᥬ ᥛᥤᥰ ᥘᥒᥱ ᥞᥪᥴ ...” ᥘᥭᥴ ᥘᥦᥰ ᥔᥫᥴ ᥑᥣᥢᥱ ᥜᥣᥳ ᥖᥩᥙᥱ ᥝᥣ “ᥑᥬᥲ ᥘᥭᥲ ᥑᥪᥢᥰ ... ᥘᥛᥳ ᥘᥤᥢ ᥞᥤᥢᥴ ᥚᥣᥴ ... ᥓᥨᥝ ᥙᥣᥢ ᥙᥧᥱ ᥛᥩᥢᥱ ᥖᥭᥰ ᥞᥝᥰ ... ᥟᥢ ᥔᥧᥴ ᥟᥝ ᥝᥭᥳ ᥘᥢᥳ ᥘᥦᥰ ... ᥓᥒᥱ ᥛᥣᥰ ᥕᥝᥳ ... ᥔᥒᥴ ᥙᥢᥴ ᥑᥪᥢᥰ ... ᥖᥥᥴ ᥘᥤ ᥐᥢ ᥘᥭᥲ ᥕᥧᥱ ... ᥔᥒᥴ ᥟᥛᥱ ᥙᥢ ᥑᥪᥢᥰ ... ᥙᥥᥢ ᥔᥫᥐᥱ ᥖᥨᥝᥱ ᥐᥢ ᥐᥩᥲ ᥘᥭᥲ ...” ᥘᥭᥴ ᥕᥝᥳ။
ᥞᥨᥝᥴ ᥑᥛᥰ “ᥕᥣᥢᥱ ”(Yuan) ᥙᥩᥭᥱ ᥚᥩᥒᥰ ᥑᥥᥝᥴ ᥟᥝ ᥘᥤᥐ ᥖᥦᥛᥲ ᥝᥣ “ᥕᥣᥱ ᥞᥬᥲ ᥘᥭᥲ ᥙᥥᥢ ᥔᥪᥐᥱ ᥖᥨᥝᥱ ᥐᥢ ... ᥛᥫᥒᥰ ᥔᥥᥴ ... ᥕᥨᥒᥰ ᥔᥣᥒᥲ ... ᥛᥧᥴ ᥟᥣᥢᥱ ... ᥙᥧᥰ ᥑᥣᥒᥳ ᥘᥨᥒᥴ ᥘᥢᥳ ... ᥖᥥᥴ ᥙᥢ

ᥞᥬᥲ ᥙᥥᥢ ᥘᥛᥳ ᥘᥤᥢ ᥔᥧᥴ ... ᥟᥛᥱ ᥗᥧᥐᥴ ᥖᥪᥐᥱ ᥐᥢ ᥕᥝᥳ ... ᥝᥣᥒᥰ ᥞᥩᥐᥱ ᥝᥣᥒᥰ ᥘᥣᥙᥱ ᥔᥥᥴ ... ᥖᥫᥰ ᥘᥤ ᥖᥨᥝᥱ ᥐᥢ ᥐᥣᥱ ᥘᥢᥳ ... ᥘᥤ ᥔᥥᥴ ᥙᥫᥢ ᥕᥝᥳ ...” ᥘᥢᥳ ᥔᥨᥒᥱ ᥗᥪᥒᥴ ᥔᥫᥴ ᥑᥣᥢᥱ ᥜᥣᥳ ᥕᥝᥳ။ 

ᥔᥫᥴ ᥑᥣᥢᥱ ᥜᥣᥳ ᥐᥧᥛ ᥘᥩᥒᥳ ᥘᥦᥰ ᥖᥣᥝᥳ ᥔᥪᥒᥱ ᥛᥢᥰ ᥝᥣ “ᥟᥛᥱ ᥘᥭᥲ ᥖᥪᥐᥱ ᥐᥢ ᥔᥥᥴ ... ᥞᥝᥰ ᥘᥭᥲ ᥑᥪᥢᥰ ᥘᥒᥴ ᥘᥤᥢ ᥛᥫᥒᥰ ᥖᥭᥰ ᥞᥝᥰ ᥐᥛᥳ ᥚᥩᥒ ᥕᥝᥳ ... ᥖᥒᥰ ᥘᥩᥒ ᥖᥒᥰ ᥘᥒᥴ ᥐᥩᥲ ... ᥟᥛᥱ ᥐᥖᥴ ᥕᥥᥢ ... ᥞᥝᥰ ᥖᥥᥴ ᥖᥪᥐᥱ ᥗᥦᥢᥲ ᥞᥪᥴ ... ᥓᥧᥰ ᥓᥬ ᥕᥝᥳ ᥘᥥᥱ ...” ᥘᥭᥴ ᥘᥦᥰ
ᥚᥬᥴ ᥐᥩᥲ ᥛᥭᥲ ᥓᥬ ᥕᥩᥢᥳ ᥖᥒᥰ ᥘᥩᥒ ᥖᥒᥰ ᥘᥒᥴ ᥔᥥᥴ ᥟᥛᥱ ᥑᥬᥲ ᥔᥪᥙᥱ ᥖᥪᥐᥱ ᥕᥝᥳ ᥘᥦᥰ ᥟᥩᥢ ᥐᥢ ᥚᥩᥛᥳ ᥓᥩᥛᥰ ᥘᥒᥱ ᥑᥧᥢᥴ ᥑᥥᥱ ᥚᥩᥛᥳ ᥙᥢ ᥘᥢᥳ ᥕᥝᥳ ᥔᥥᥴ ᥛᥫᥰ ᥑᥪᥢᥰ ᥘᥦᥰ ᥙᥤ 1318 ᥘᥢᥳ ᥑᥪᥢᥰ ᥗᥪᥒᥴ ᥓᥥ ᥘᥣᥢᥳ ᥕᥧᥱ ᥕᥝᥳ။

3. ᥝᥥᥱ ᥔᥣᥱ ᥘᥤᥱ

ᥙᥤ 1319 ᥘᥢᥳ ᥔᥣᥛᥴ ᥘᥨᥒᥴ ᥜᥣᥳ ᥐᥩᥢᥰ ᥔᥫᥐᥱ ᥑᥪᥢᥲ ᥐᥥᥒᥰ ᥖᥧᥒᥴ၊ ᥐᥥᥒᥰ ᥞᥧᥒᥳ၊ ᥐᥥᥒᥰ ᥛᥭᥱ၊ ᥛᥫᥒᥰ ᥘᥨᥒᥴ၊ ᥚᥣᥴ ᥔᥫᥱ ᥖᥩᥒᥰ ᥕᥝᥳ ᥗᥪᥒᥴ ᥑᥪᥢᥰ ᥛᥫᥒᥰ ᥛᥣᥝᥰ။ ᥛᥫ ᥘᥢᥳ ᥖᥣᥝᥳ ᥜᥣᥳ ᥘᥨᥝᥱ ᥘᥦᥰ ᥖᥣᥝᥳ ᥔᥫᥴ ᥕᥥᥢᥰ ᥞᥥᥖᥱ ᥐᥣᥢ ᥟᥛᥱ ᥖᥥᥛ ᥗᥨᥢᥲ။ ᥔᥣᥛᥴ ᥘᥨᥒᥴ ᥜᥣᥳ ᥖᥨᥒᥳ ᥖᥐᥳ။ ᥖᥣᥝᥳ ᥔᥩᥒᥴ ᥐᥨᥝᥳ ᥟᥛᥱ ᥙᥨᥝᥰ ᥓᥬ ᥔᥥᥴ ᥛᥫ ᥗᥪᥒᥴ ᥑᥪᥢᥰ ᥛᥫᥒᥰ ᥛᥣᥝᥰ ᥘᥢᥳ ᥛᥫᥰ ᥔᥨᥝᥱ ᥔᥨᥢᥰ ᥝᥣ ᥓᥝᥲ ᥔᥣᥛᥴ ᥘᥨᥒᥴ ᥜᥣᥳ ᥘᥐ ᥐᥨᥖ “ᥘᥣᥒᥰ ᥐᥣᥢᥲ ᥑᥛᥰ ᥔᥬᥴ ” ᥘᥭᥴ ᥘᥦᥰ ᥔᥫᥴ ᥑᥣᥢᥱ ᥜᥣᥳ ᥙᥦᥒᥰ ᥐᥥᥙᥱ ᥘᥬᥰ ᥓᥬ ᥝᥭᥳ ᥕᥧᥱ။
ᥙᥤ 1320 ᥖᥥᥴ ᥛᥥᥱ ᥑᥣᥐ ᥗᥪᥒᥴ “ᥛᥫᥒᥰ ᥝᥥᥱ ᥔᥣᥱ ᥘᥤᥱ ” ᥘᥭᥴ ᥔᥥᥴ ᥔᥫᥴ ᥑᥣᥢᥱ ᥜᥣᥳ ᥞᥬᥲ ᥔᥣᥛᥴ ᥘᥨᥒᥴ ᥜᥣᥳ ᥟᥩᥢ ᥟᥝ ᥖᥣᥝᥳ ᥜᥣᥳ ᥘᥨᥝᥱ၊ ᥖᥣᥝᥳ ᥔᥫᥴ ᥕᥥᥢᥰ၊ ᥖᥣᥝᥳ ᥞᥣᥢᥴ ᥐᥭᥱ ᥐᥩᥢᥰ ᥔᥫᥐᥱ ᥑᥪᥢᥲ ᥐᥣᥱ ᥘᥦᥰ ᥛᥫ ᥗᥪᥒᥴ “ᥟᥣ ᥞᥨᥛᥱ ”ᥘᥢᥳ ᥔᥣᥛᥴ ᥘᥨᥒᥴ ᥜᥣᥳ ᥟᥝ ᥘᥣᥭᥰ ᥘᥤ ᥔᥨᥢᥰ ᥖᥧᥛᥴ ᥘᥦᥰ ᥟᥛᥱ ᥘᥭᥲ ᥙᥥᥢ ᥔᥪᥐᥱ။ “ᥟᥣ ᥞᥨᥛᥱ ”ᥚᥩᥛᥳ ᥞᥣᥭᥰ ᥓᥧᥰ ᥛᥫᥒᥰ ᥛᥣᥝᥰ ᥕᥧᥱ ᥕᥝᥳ။
ᥟᥩᥢ ᥐᥢ ᥔᥪᥙᥱ ᥑᥣᥝᥰ ᥖᥣᥒᥰ ᥘᥨᥒᥰ ᥓᥧᥰ “ᥝᥥᥱ ᥔᥣᥱ ᥘᥤᥱ ”။ ᥗᥪᥒᥴ ᥐᥣᥱ ᥔᥣᥙᥱ ᥛᥫᥒᥰ ᥝᥥᥱ ᥔᥣᥱ ᥘᥤᥱ ᥘᥢᥳ ᥘᥭᥲ ᥞᥢᥴ ᥘᥧᥐ ᥟᥩᥢᥱ ᥘᥥᥒᥳ ᥒᥨᥝᥰ ᥑᥣᥭᥰ ᥘᥛᥴ ᥙᥨᥝᥰ ᥖᥣᥢᥱ ᥚᥧᥒᥴ ᥛᥝᥲ။ ᥔᥣᥛᥴ ᥘᥨᥒᥴ ᥜᥣᥳ ᥝᥨᥢᥳ ᥝᥣ “ᥘᥧᥐ ᥟᥩᥢᥱ ᥑᥝᥴ ᥐᥩᥭᥰ ... ᥘᥛᥴ ᥖᥣᥢᥱ ᥘᥭᥳ ... ᥐᥨᥢᥰ ᥛᥫᥒᥰ ᥑᥝᥴ ... ᥑᥦᥢᥰ ᥖᥥᥴ ᥘᥛᥴ ᥖᥣᥢᥱ ᥞᥪᥴ ᥟᥛᥱ ᥞᥧᥳ ... ᥔᥒᥴ ᥓᥫᥳ ᥙᥥᥢ ᥔᥪᥐᥱ ᥖᥪᥐᥴ ᥐᥢ ... ᥖᥥᥴ ᥟᥛᥱ ᥙᥥᥳ ᥘᥭᥲ ᥒᥣᥭ ᥒᥣᥭ ... ᥐᥨᥢᥰ ᥛᥫᥒᥰ ᥐᥩᥲ ... ᥖᥥᥴ ᥘᥧᥳ ᥕᥬᥱ ᥔᥧᥛᥰ ᥘᥛᥴ ... ᥖᥒᥰ ᥔᥩᥒᥴ ᥚᥣᥭᥱ ᥐᥩᥲ ... ᥖᥥᥴ ᥟᥛᥱ ᥓᥣᥒ ᥛᥤᥰ ᥚᥩᥢᥰ ᥘᥤ ᥘᥭᥲ ...” ᥘᥭᥴ ᥔᥥᥴ
ᥔᥣᥛᥴ ᥘᥨᥒᥴ ᥜᥣᥳ ᥟᥝ ᥘᥣᥭᥰ ᥔᥨᥢᥰ ᥖᥧᥛ ᥞᥨᥭᥰ ᥘᥦᥰ ᥟᥛᥱ ᥘᥭᥲ ᥖᥪᥐᥴ ᥐᥢ။ ᥝᥥᥱ ᥔᥣᥱ ᥘᥤᥱ ᥖᥨᥐᥱ ᥘᥨᥒᥰ ᥐᥨᥛᥲ ᥘᥩᥛᥰ ᥓᥧᥰ ᥛᥫᥒᥰ ᥛᥣᥝᥰ ᥘᥫᥒ ᥙᥤ ᥒᥪᥢᥰ ᥙᥣᥐᥱ ᥓᥩᥭᥳ၊ ᥑᥛᥰ ᥙᥣᥐᥱ ᥓᥩᥭᥳ ᥘᥦᥰ ᥚᥪᥢᥴ ᥚᥥᥰ ᥐᥧ ᥕᥫᥒ ᥗᥦᥢᥲ ᥖᥒᥰ ᥘᥛᥴ ᥕᥝᥳ။ ᥘᥒᥱ ᥞᥪᥴ ᥙᥩᥰ ᥖᥥᥴ ᥘᥭᥲ ᥞᥨᥙᥳ ᥗᥨᥙᥱ ᥞᥧᥳ ᥘᥩᥒ ᥞᥢᥴ ᥖᥣᥒᥰ ᥐᥢ ᥘᥤ ᥘᥤ ᥘᥦᥰ ᥙᥤ ᥟᥩᥢ ᥖᥣᥒᥰ ᥔᥧᥖᥴ ᥘᥭᥳ ᥑᥬᥲ ᥛᥫᥰ ᥞᥨᥙᥳ ᥔᥫᥴ ᥑᥣᥢᥱ ᥜᥣᥳ ᥘᥭᥴ ᥘᥦᥰ ᥚᥩᥒᥰ ᥑᥥᥝᥴ ᥛᥫᥒᥰ ᥝᥥᥱ ᥔᥣᥱ ᥘᥤᥱ ᥞᥦᥢᥰ ᥟᥝ ᥑᥨᥝᥰ ᥑᥩᥒᥴ၊ ᥒᥪᥢᥰ ᥑᥛᥰ ᥛᥫᥰ ᥓᥩᥛᥰ ᥔᥣᥛᥴ ᥘᥨᥒᥴ ᥜᥣᥳ ᥕᥧᥱ ᥕᥝᥳ။
ᥖᥒᥰ ᥘᥩᥒ ᥖᥒᥰ ᥘᥒᥴ ᥐᥩᥲ ᥝᥣᥭᥰ ᥔᥥᥴ ᥓᥝᥲ ᥔᥣᥛᥴ ᥘᥨᥒᥴ ᥜᥣᥳ ᥟᥩᥐᥱ ᥖᥣᥒᥰ ᥐᥣᥱ ᥕᥝᥳ ᥕᥧᥛᥱ ᥝᥭᥳ ᥑᥣᥛᥰ ᥑᥣᥭᥴ ᥛᥣᥙᥱ ᥖᥣᥝᥳ ᥔᥩᥒᥴ ᥐᥨᥝᥳ ᥘᥢᥳ ᥔᥥᥴ ᥔᥫᥴ ᥑᥣᥢᥱ ᥜᥣᥳ ᥘᥛᥰ ᥘᥨᥭᥰ ᥙᥦᥖ ᥘᥣᥒᥰ ᥐᥣᥢᥲ ᥑᥛᥰ ᥔᥬᥴ ᥕᥧᥱ ᥕᥝᥳ။ ᥛᥫ ᥘᥢᥳ ᥛᥢᥰ ᥘᥣᥒᥰ ᥓᥙᥴ ᥔᥢᥱ ᥗᥥᥱ ᥝᥭᥳ ᥔᥥᥴ ᥖᥣᥳ ᥟᥛᥱ ᥘᥫᥴ ᥘᥭᥲ ᥑᥣᥛᥰ ᥔᥒᥱ ᥑᥧᥢᥴ ᥘᥦᥰ ᥓᥨᥝᥰ ᥟᥩᥢ ᥟᥝ ᥐᥨᥢᥰ ᥓᥩᥛᥰ ᥔᥩᥒᥴ ᥐᥨᥝᥳ ᥘᥨᥒᥰ ᥞᥣᥒᥲ ᥞᥨᥝᥴ ᥛᥫᥰ ᥖᥥᥖᥱ ᥝᥭᥳ ᥘᥬᥰ ᥛᥫᥒᥰ ᥔᥦᥢᥴ ᥕᥧᥱ ᥕᥝᥳ။

ᥓᥤᥛ ᥐᥥᥲ ᥙᥤ ᥘᥩᥒᥳ

ᥛᥫ ᥔᥣᥛᥴ ᥘᥨᥒᥴ ᥜᥣᥳ ᥑᥝᥴ ᥘᥧᥐᥳ ᥛᥫᥒᥰ ᥝᥥᥱ ᥔᥣᥱ ᥘᥤᥱ ᥛᥣᥰ ᥑᥪᥢᥰ ᥘᥦᥰ ᥐᥪᥖᥴ ᥘᥪᥲ ᥕᥧᥱ ᥖᥤ ᥘᥫᥒ ᥖᥣᥝᥳ ᥜᥣᥳ ᥘᥨᥝᥱ ᥘᥦᥰ ᥖᥣᥝᥳ ᥔᥫᥴ ᥕᥥᥢᥰ ᥐᥤᥢ ᥑᥝᥲ ᥐᥤᥢ ᥘᥝᥲ ᥟᥧᥙᥱ ᥐᥢ ᥔᥥᥒᥴ ᥕᥬᥱ ᥔᥥᥒᥴ ᥘᥨᥒᥴ ᥝᥣ “ᥐᥨᥢᥰ ᥛᥫᥒᥰ ᥝᥥᥱ ᥔᥣᥱ ᥘᥤᥱ ᥘᥭᥳ ... ᥓᥬ ᥟᥩᥢᥱ ᥟᥥᥴ ᥑᥤᥲ ᥕᥣᥢᥲ ᥖᥥᥳ ᥖᥥᥳ ... ᥖᥨᥭᥰ ᥘᥧᥰ ... ᥘᥧᥐ ᥟᥩᥢᥱ ᥘᥥᥒᥳ ᥒᥨᥝᥰ ᥑᥣᥭᥰ ᥑᥝᥴ ... ᥘᥛᥴ ᥙᥨᥝᥰ ᥖᥣᥢᥱ ᥚᥧᥒᥴ ᥛᥝᥲ ... ᥘᥛᥴ ᥘᥫᥴ ᥔᥪᥐᥱ ᥞᥝᥰ ᥘᥧᥰ ᥐᥩᥢᥱ ... ᥐᥨᥢᥰ ᥛᥫᥒᥰ ... ᥐᥨᥢᥰ ᥔᥫᥐᥱ ᥑᥝᥴ ... ᥖᥥᥴ ᥘᥛᥴ ᥖᥣᥢᥱ ᥞᥪᥴ ... ᥕᥒᥰ ᥟᥛᥱ ᥞᥖᥴ ᥖᥪᥐᥱ ᥞᥝᥰ ᥘᥦᥰ ᥝᥣ ... ᥕᥧᥱ ᥘᥣᥭ ᥘᥣᥭ ᥔᥥᥴ ... ᥐᥨᥛᥲ ᥐᥩᥛᥰ ᥒᥩᥛᥰ ᥓᥧᥰ ᥒᥣᥭ ᥒᥣᥭ ᥘᥒᥱ ᥘᥭᥴ ᥘᥭᥳ ... ᥟᥛᥱ ᥛᥤᥰ ᥟᥣ ᥐᥥᥰ ᥔᥒᥴ ... ᥘᥤ ᥟᥣᥭ ᥖᥣᥒ ᥑᥝᥴ ᥘᥦᥢᥱ ...” ᥘᥭᥴ ᥘᥦᥰ
ᥔᥣᥛᥴ ᥘᥨᥒᥴ ᥜᥣᥳ ᥒᥤᥢᥰ ᥛᥦᥢ ᥔᥥᥴ ᥞᥩᥒᥳ ᥔᥩᥒᥴ ᥓᥝᥲ ᥘᥣᥖ ᥝᥣ “ᥜᥣᥳ ᥘᥨᥒᥴ ᥓᥩᥛᥴ ᥔᥪᥐᥱ ᥑᥝᥴ ᥟᥫᥭᥰ ... ᥞᥝᥰ ᥞᥥᥖᥱ ᥞᥨᥝᥴ ᥞᥥᥖᥱ ᥐᥩᥢᥰ ᥙᥫᥢ ᥔᥥᥴ ... ᥘᥣᥖ ᥑᥣᥛᥰ ᥖᥛᥱ ᥕᥨᥝᥲ ᥛᥝᥴ ᥚᥣᥒᥰ ... ᥘᥒᥱ ᥓᥝᥲ ᥑᥝᥴ ᥘᥣᥖ ᥕᥧᥱ ᥘᥭᥴ ... ᥛᥢᥰ ᥟᥛᥱ ᥗᥧᥐᥴ ... ᥑᥝᥴ ᥓᥝᥲ ᥓᥫᥰ ᥛᥣᥰ ᥓᥩᥛᥰ ᥞᥝᥰ ᥘᥭᥳ ... ᥙᥥᥢ ᥚᥧᥱ ᥕᥬᥱ ᥐᥨᥢᥰ ᥘᥨᥒᥴ ᥘᥣᥭ ᥘᥣᥭ ᥟᥫᥰ ... ᥑᥝᥴ ᥘᥭᥲ ᥒᥤᥢᥰ ᥐᥣᥱ ᥐᥩᥲ ... ᥟᥛᥱ ᥔᥣᥒᥱ ᥖᥨᥝᥱ ... ᥓᥝᥲ ᥑᥝᥴ ᥕᥣᥱ ᥘᥣᥖ ᥗᥦᥢᥲ ...” ᥘᥭᥴ ᥕᥝᥳ။
ᥖᥣᥝᥳ ᥔᥩᥒᥴ ᥐᥨᥝᥳ ᥟᥢ ᥖᥪᥢᥰ ᥓᥒᥰ ᥔᥣᥛᥴ ᥘᥨᥒᥴ ᥜᥣᥳ ᥝᥭᥳ ᥕᥧᥱ ᥘᥢᥳ ᥐᥨᥝ ᥔᥫᥴ ᥑᥣᥢᥱ ᥜᥣᥳ ᥞᥧᥳ ᥘᥩᥒ ᥑᥣᥴ ᥘᥭᥳ ᥔᥥᥴ ᥗᥨᥙᥱ ᥖᥣᥛᥱ ᥘᥦᥰ ᥞᥣᥴ ᥖᥒᥰ ᥚᥤᥖᥴ ᥔᥬᥱ ᥔᥣᥛᥴ ᥘᥨᥒᥴ ᥜᥣᥳ ᥗᥦᥢᥲ။ ᥞᥥᥖᥱ ᥘᥤᥐ ᥝᥣ “ᥕᥣᥛᥰ ᥘᥥᥝ ᥞᥝᥰ ᥑᥣᥲ ... ᥙᥥᥳ ᥝᥥᥱ ᥔᥣᥱ ᥘᥤᥱ ᥕᥝᥳ ᥘᥦᥰ ... ᥑᥝᥴ ᥐᥩᥲ ᥐᥨᥛᥲ ᥐᥩᥛᥰ ᥘᥩᥛᥰ ᥓᥧᥰ ᥕᥝᥳ ... ᥐᥩᥭᥰ ᥐᥣ ... ᥘᥩᥒᥳ ᥓᥝᥲ ᥘᥭᥳ ... ᥟᥛᥱ ᥙᥩᥒ ᥔᥪ ᥖᥨᥝᥱ ᥓᥝᥲ ... ᥛᥤᥰ ᥚᥦᥢᥴ ᥞᥨᥛ ᥞᥨᥝᥴ ᥑᥛᥰ ᥝᥥᥱ ᥔᥣᥱ ᥘᥤᥱ ᥔᥥᥴ ... ᥖᥥᥴ ᥚᥪᥢᥳ ᥓᥝᥲ ᥞᥝᥰ ᥑᥣᥲ ᥟᥩᥲ ... ᥑᥝᥴ ᥘᥐᥳ ᥛᥤᥰ ᥝᥭᥳ ... ᥑᥨᥝᥲ ᥖᥨᥐᥱ ᥘᥨᥒᥰ ᥐᥢ ᥘᥦᥰ ... ᥛᥫᥒᥰ ᥝᥥᥱ ᥔᥣᥱ ᥘᥤᥱ ᥓᥒᥱ ᥙᥩᥭᥱ ᥚᥩᥒᥰ ᥑᥥᥝᥴ ... ᥖᥥᥴ ᥛᥫᥰ ᥐᥨᥛᥲ ᥐᥩᥛᥰ ᥘᥩᥛᥰ ᥓᥧᥰ ... ᥓᥝᥲ ᥞᥝᥰ ᥘᥢᥳ ᥑᥣᥲ ᥕᥝᥳ ... ᥛᥫ ᥘᥥᥝ ...ᥑᥝᥴ ᥛᥣᥰ ᥓᥩᥛᥰ ᥞᥝᥰ ᥔᥥᥴ ... ᥛᥤᥰ ᥝᥭᥳ ᥕᥧᥱ ᥖᥤ ᥛᥫᥒᥰ ᥐᥩᥒ ᥑᥣᥲ ...
ᥛᥫ ᥗᥪᥒᥴ ᥛᥫᥒᥰ ᥛᥣᥝᥰ ᥘᥢᥳ ... ᥖᥥᥴ ᥞᥨᥛ ᥐᥢ ... ᥞᥥᥖᥱ ᥐᥨᥖᥳ ᥖᥨᥝᥱ ᥓᥝᥲ ᥕᥝᥳ ... ᥔᥣᥛᥴ ᥘᥨᥒᥴ ᥜᥣᥳ ᥖᥥᥴ ᥑᥪᥢᥲ ᥘᥒᥲ ᥞᥣᥒᥲ ᥞᥨᥝᥴ ᥘᥭᥴ ᥑᥣᥲ ᥟᥩᥲ ... ᥞᥝᥰ ᥑᥣᥲ ᥘᥭᥳ ... ᥘᥭᥲ ᥙᥥᥢ ᥑᥣᥲ ᥐᥤᥢ ... ᥑᥣᥲ ᥗᥣᥛᥰ ... ᥑᥣᥲ ᥔᥤᥖᥳ ᥓᥣᥱ ᥓᥝᥲ ᥞᥝᥰ ᥛᥣᥰ ᥑᥣᥲ ᥘᥦᥰ ... ᥛᥤᥰ ᥖᥣᥒᥰ ᥘᥐᥴ ᥓᥬ ᥕᥬᥱ ᥘᥨᥒᥴ ᥔᥥᥴ ... ᥓᥒᥱ ᥘᥭᥲ ᥖᥦᥛᥲ ᥘᥤᥐ ᥙᥩᥒᥱ ᥗᥪᥒᥴ ... ᥓᥝᥲ ᥞᥝᥰ ᥑᥢᥴ ᥑᥢᥴ ᥝᥭᥰ ᥝᥭᥰ ᥛᥣᥰ ᥑᥣᥲ ᥕᥝᥳ ...” ᥘᥭᥴ ᥔᥥᥴ ᥘᥐᥳ ᥙᥩᥭᥱ ᥐᥨᥢᥰ ᥞᥤᥙ ᥘᥦᥖ ᥛᥫᥰ ᥔᥨᥒᥱ ᥓᥧᥰ ᥔᥫᥴ ᥑᥣᥢᥱ ᥜᥣᥳ ᥕᥧᥱ ᥕᥝᥳ။
ᥛᥫ ᥘᥭᥲ ᥞᥙᥳ ᥘᥤᥐ ᥕᥝᥳ ᥚᥤᥖᥴ ᥓᥬ ᥘᥫᥴ ᥑᥧᥢᥴ ᥔᥣᥛᥴ ᥘᥨᥒᥴ ᥢᥘᥦᥢᥱ ᥔᥥᥴ ᥔᥫᥴ ᥑᥣᥢᥱ ᥜᥣᥳ ᥞᥬᥲ ᥞᥥᥖᥱ ᥑᥝᥲ ᥛᥧᥢᥰ၊ ᥑᥝᥲ ᥙᥩᥒᥰ၊ ᥖᥣᥒᥰ ᥐᥤᥢ ᥔᥬᥱ ᥒᥨᥢᥳ ᥔᥬᥱ ᥔᥣᥢᥴ ᥕᥝᥳ ᥑᥣᥢᥰ ᥐᥨᥢᥰ ᥔᥥᥴ ᥔᥒᥱ ᥑᥣᥛᥰ ᥝᥣ “ᥐᥨᥢᥰ ᥓᥣᥭᥰ ᥟᥢ ᥝᥣ ᥘᥢᥳ ... ᥞᥖᥴ ᥞᥥᥖᥱ ᥐᥩᥲ ᥞᥖᥴ ᥑᥣᥛᥱ ᥕᥝᥳ ... ᥓᥝᥲ ᥐᥝᥱ ᥞᥥᥖᥱ ᥔᥒᥴ ᥐᥩᥲ ... ᥖᥥᥴ ᥞᥧᥳ ᥖᥨᥝ ᥕᥧᥱ .. .ᥙᥩᥰ ᥘᥭᥲ ᥞᥙᥳ ᥖᥣᥒᥰ ᥐᥤᥢ ᥘᥭᥳ ᥕᥝᥳ ... ᥐᥤᥢ ᥐᥛᥰ ᥘᥥᥝ ... ᥔᥒᥴ ᥟᥛᥱ ᥐᥤᥢ ... ᥖᥣᥱ ᥖᥥᥴ ᥘᥤ ᥐᥢ ... ᥖᥪᥢᥰ ᥟᥛᥱ ᥛᥤᥰ ᥘᥭᥲ ...” ᥘᥭᥴ ᥔᥥᥴ ᥔᥨᥒᥱ ᥗᥪᥒᥴ ᥔᥣᥛᥴ ᥘᥨᥒᥴ ᥜᥣᥳ ᥐᥛᥰ ᥘᥥᥝ ᥕᥝᥳ။

ᥑᥨᥝᥲ ᥖᥦᥙᥱ ᥖᥖᥴ ᥔᥣᥛᥴ ᥘᥨᥒᥴ ᥜᥣᥳ

ᥛᥫ ᥘᥭᥲ ᥞᥙᥳ ᥑᥝᥲ ᥛᥧᥢᥰ ᥘᥦᥰ ᥘᥭᥲ ᥒᥤᥢᥰ ᥑᥣᥛᥰ ᥔᥒᥱ ᥕᥝᥳ ᥘᥢᥳ ᥔᥣᥛᥴ ᥘᥨᥒᥴ ᥜᥣᥳ ᥞᥧᥳ ᥝᥣ ᥔᥫᥴ ᥑᥣᥢᥱ ᥜᥣᥳ ᥕᥧᥛᥱ ᥑᥣᥛᥰ ᥖᥣᥝᥳ ᥔᥩᥒᥴ ᥐᥨᥝᥳ ᥘᥢᥳ ᥕᥝᥳ ᥘᥭᥴ ᥔᥥᥴ ᥝᥨᥢᥳ ᥝᥣ “ᥙᥤ ᥜᥣᥳ ᥐᥝ ᥘᥭᥳ ... ᥞᥢᥴ ᥚᥤᥖᥴ ᥐᥝ ᥕᥝᥳ ᥘᥦᥰ ... ᥖᥣᥱ ᥝᥣ ᥞᥣᥰ ᥙᥤ ᥘᥩᥒᥳ ... ᥖᥥᥴ ᥙᥥᥢ ᥘᥩᥒ ᥘᥤ ᥖᥨᥝᥱ ᥐᥢ ᥘᥢᥳ ... ᥘᥦᥙ ᥖᥥᥴ ᥟᥛᥱ ᥛᥤᥰ ᥘᥭᥲ ᥖᥥᥳ ᥕᥝᥳ ...
ᥔᥒᥴ ᥝᥣ ᥞᥣᥰ ᥙᥤ ᥘᥩᥒᥳ ... ᥘᥭᥲ ᥖᥥᥐᥱ ᥕᥣᥭ ᥐᥢ ... ᥘᥧᥐ ᥘᥩᥒᥳ ᥖᥣ ᥙᥥᥰ ... ᥑᥣᥲ ᥛᥣᥢᥲ ᥐᥨᥢᥰ ᥛᥫᥒᥰ ... ᥖᥥᥴ ᥓᥣᥒ ᥖᥦᥐᥱ ᥕᥣᥭ ... ᥓᥩᥛᥰ ᥞᥣᥰ ᥙᥤ ᥘᥩᥒᥳ ᥕᥝᥳ ... ᥔᥒᥴ ᥙᥥᥢ ᥘᥢᥴ ᥛᥣᥰ ... ᥛᥣᥢᥲ ᥛᥫᥒᥰ ᥟᥢ ᥞᥣᥰ ᥙᥤ ᥘᥩᥒᥳ ... ᥟᥣᥢᥰ ᥞᥬᥲ ᥕᥬᥱ ᥐᥣᥒᥲ ... ᥔᥫᥰ ᥔᥣᥱ ᥘᥦᥰ ... ᥞᥨᥛ ᥐᥢ ᥑᥖᥴ ᥓᥬ ... ᥐᥨᥝᥱ ᥔᥣᥒᥲ ᥕᥧᥱ ᥘᥢᥳ ... ᥖᥥᥴ ᥓᥣᥒ ᥘᥧᥳ ᥔᥧᥛᥰ ᥙᥦᥖ ᥘᥣᥭ ᥘᥣᥭ ᥐᥩᥭᥰ ... ᥐᥝ ᥔᥪᥙᥱ ᥛᥤᥰ ᥕᥧᥱ ᥐᥩᥲ ... ᥟᥛᥱ ᥙᥥᥢ ᥚᥩᥢᥰ ᥘᥤ ᥔᥒᥴ ᥕᥝᥳ ...’’ ᥘᥭᥴ ᥘᥦᥰ
ᥞᥩᥒᥳ ᥘᥣᥖ ᥚᥩᥒᥰ ᥑᥥᥝᥴ ᥛᥫᥒᥰ ᥝᥥᥱ ᥔᥣᥱ ᥘᥤᥱ ᥝᥣ “ᥖᥣᥱ ᥞᥝᥰ ᥖᥥᥴ ᥟᥩᥢ ᥐᥢ ... ᥔᥪᥙᥱ ᥑᥣᥝᥰ ᥖᥣᥒᥰ ... ᥐᥣᥱ ᥛᥫᥒᥰ ᥛᥣᥝᥰ ᥘᥢᥳ ... ᥒᥝᥰ ᥘᥣᥭᥰ ᥙᥭᥱ ᥙᥢ ᥘᥦᥰ ... ᥞᥝᥰ ᥙᥭᥱ ᥙᥥᥢ ᥛᥫᥰ ᥓᥩᥛᥰ ᥐᥢ ᥕᥝᥳ ... ᥑᥨᥝᥰ ᥑᥩᥒᥴ ᥚᥣᥢᥱ ᥖᥣᥱ ᥔᥧᥴ ᥓᥝᥲ ᥘᥢᥳ ... ᥝᥭᥳ ᥖᥤ ᥛᥫᥒᥰ ᥐᥩᥒ ᥘᥭᥳ ᥔᥥᥴ ... ᥛᥫᥰ ᥑᥪᥢᥰ ᥘᥣᥲ ... ᥐᥝ ᥑᥣᥲ ᥖᥥᥴ ᥔᥪᥙᥱ ᥔᥨᥒᥱ ᥙᥢ ᥐᥩᥭᥰ ...” ᥘᥭᥴ ᥔᥥᥴ ᥙᥩᥭᥱ ᥚᥩᥒᥰ ᥑᥥᥝᥴ ᥝᥥᥱ ᥔᥣᥱ ᥘᥤᥱ ᥛᥫᥰ ᥑᥪᥢᥰ။ ᥘᥪᥢᥰ ᥘᥢᥳ ᥞᥩᥒᥳ ᥖᥣᥝᥳ ᥘᥨᥒᥴ ᥖᥒᥰ ᥘᥣᥭᥴ ᥘᥣᥖ ᥝᥣ
“ᥖᥣᥝᥳ ᥑᥝᥴ ᥖᥒᥰ ᥘᥣᥭᥴ ᥟᥫᥭᥰ ... ᥘᥒᥱ ᥐᥣ ᥟᥥᥢᥰ ᥟᥣᥢᥰ ᥘᥣᥲ ᥐᥣᥢ ... ᥟᥢ ᥞᥝᥰ ᥟᥩᥢ ᥐᥢ ᥛᥣᥰ ᥘᥢᥳ ... ᥖᥥᥛ ᥗᥨᥢᥲ ᥛᥨᥖᥴ ᥕᥝᥳ ... ᥑᥨᥝᥰ ᥑᥩᥒᥴ ᥚᥣᥢᥱ ᥖᥣᥱ ... ᥛᥫᥒᥰ ᥝᥥᥱ ᥔᥣᥱ ᥘᥤᥱ ᥘᥭᥳ ᥐᥩᥲ ... ᥔᥧᥴ ᥐᥨᥝᥳ ᥟᥩᥢ ᥐᥢ ... ᥟᥝ ᥛᥫᥰ ᥔᥣᥐ ᥗᥪᥒᥴ ... ᥙᥤ ᥜᥣᥳ ᥘᥨᥒᥴ ᥐᥝ ᥑᥣᥲ ᥔᥥᥴ ᥘᥣᥲ ...
ᥖᥣᥝᥳ ᥜᥣᥳ ᥘᥩᥱ ᥘᥦᥰ ... ᥖᥣᥝᥳ ᥔᥫᥴ ᥕᥥᥢᥰ ᥟᥫᥭᥰ ... ᥕᥫᥒᥰ ᥟᥣᥢᥰ ᥔᥩᥒᥴ ᥑᥫᥴ ᥐᥩᥲ ... ᥗᥪᥒᥴ ᥖᥤ ᥕᥝᥳ ᥟᥫᥰ ... ᥘᥒᥱ ᥐᥣ ᥔᥩᥒᥴ ᥓᥝᥲ ... ᥑᥬᥴ ᥙᥥᥢ ᥘᥢᥳ ᥐᥩᥲ ... ᥙᥥᥢ ᥛᥣᥰ ᥖᥥᥳ ᥕᥝᥳ ᥟᥫᥰ ... ᥐᥝ ᥑᥣᥲ ᥖᥥᥴ ᥐᥪᥖᥴ ᥕᥧᥱ ᥝᥭᥳ ... ᥖᥤ ᥛᥫᥒᥰ ᥐᥩᥒ ᥘᥭᥳ ᥐᥩᥭᥰ ... ᥛᥫᥰ ᥑᥪᥢᥰ ᥖᥒᥰ ᥘᥩᥒᥳ ᥖᥒᥰ ᥘᥒᥴ ᥐᥩᥲ ... ᥟᥛᥱ ᥔᥣᥒᥱ ᥗᥧᥐᥴ ᥕᥝᥳ ...
ᥙᥤ ᥜᥣᥳ ᥐᥝ ᥑᥣᥲ ... ᥟᥛᥱ ᥕᥧᥛᥱ ᥘᥫᥴ ᥐᥝ ᥑᥣᥲ ᥕᥝᥳ ᥘᥦᥰ ... ᥐᥝ ᥑᥣᥲ ᥞᥥᥖᥱ ᥔᥒᥴ ᥐᥩᥲ ... ᥖᥥᥴ ᥟᥛᥱ ᥞᥢᥴ ᥘᥤ ᥕᥝᥳ ... ᥔᥒᥴ ᥝᥣ ᥛᥫᥰ ᥑᥪᥢᥰ ᥐᥩᥲ ... ᥐᥨᥝ ᥞᥣᥰ ᥙᥤ ᥘᥩᥒᥳ ... ᥘᥭᥲ ᥚᥤᥖᥴ ᥚᥦᥐᥱ ᥖᥦᥐᥱ ᥐᥢ ᥔᥥᥴ ... ᥖᥣᥝᥳ ᥔᥪᥒᥱ ᥚᥩᥒᥰ ᥛᥫᥒᥰ ᥖᥒᥰ ᥘᥣᥭᥴ ... ᥘᥭᥲ ᥐᥒ ᥓᥬ ᥔᥧᥐᥳ ᥕᥧᥒᥲ ᥓᥩᥛᥰ ᥗᥦᥢᥲ ᥕᥝᥳ ... ᥑᥣᥲ ᥛᥣᥢᥲ ᥐᥨᥢᥰ ᥛᥫᥒᥰ ᥔᥛᥳ ... ᥖᥥᥴ ᥘᥫᥖᥱ ᥛᥭᥲ ᥖᥧᥐᥳ ᥑᥣᥳ ᥘᥧᥳ ᥞᥣᥭᥴ ᥖᥣᥭ ᥕᥩᥢᥳ ... ᥞᥣᥰ ᥙᥤ ᥘᥩᥒᥳ ᥗᥦᥢᥲ ᥟᥫᥰ ... ᥛᥣᥢᥲ ᥛᥫᥒᥰ ᥟᥢ ᥞᥣᥰ ᥙᥤ ᥘᥩᥒᥳ ... ᥑᥩᥖᥱ ᥞᥦᥒᥰ ᥞᥬᥲ ᥕᥬᥱ ᥐᥣᥒᥲ ᥕᥧᥱ ᥘᥭᥳ ᥐᥩᥲ ... ᥖᥥᥴ ᥘᥭᥲ ᥖᥦᥐᥱ ᥕᥩᥭ ᥐᥣᥱ ᥑᥪᥢᥰ ᥟᥫᥰ ...
ᥕᥩᥢᥳ ᥘᥢᥴ ... ᥚᥫᥱ ᥞᥣᥰ ᥙᥤ ᥘᥩᥒᥳ ... ᥖᥥᥴ ᥘᥭᥲ ᥓᥖᥳ ᥓᥬ ᥐᥢ ᥔᥥᥴ ... ᥖᥦᥐᥱ ᥐᥢ ... ᥚᥤᥖᥴ ᥐᥢ ... ᥖᥣᥝᥳ ... ᥔᥪᥒᥱ ... ᥚᥩᥒᥰ ᥛᥫᥒᥰ ... ᥑᥣᥲ ᥛᥣᥢᥲ ᥐᥨᥢᥰ ᥛᥫᥒᥰ ᥖᥒᥰ ᥘᥣᥭᥴ ... ᥖᥥᥴ ᥘᥭᥲ ... ᥐᥒ ᥓᥬ ... ᥖᥧᥐᥳ ᥑᥣᥳ ᥓᥩᥛᥰ ... ᥕᥣᥙᥱ ᥕᥣᥐ ᥓᥩᥛᥰ ᥔᥥᥴ ... ᥛᥣᥢᥲ ᥛᥫᥒᥰ ᥖᥥᥴ ᥔᥧᥐᥳ ᥕᥧᥒᥲ ... ᥖᥦᥐᥱ ᥕᥣᥭ ᥘᥢᥳ ... ᥐᥝ ᥑᥣᥲ ᥖᥥᥴ ᥕᥩᥛᥰ ᥓᥧᥢᥳ ᥔᥣᥭᥴ ᥓᥬ ... ᥖᥤ ᥛᥫᥒᥰ ᥐᥩᥒ ᥘᥭᥳ ... ᥘᥒᥱ ᥓᥝᥲ ᥙᥤ ᥐᥝ ᥑᥣᥲ ... ᥑᥬᥲ ᥞᥬᥲ ᥙᥥᥢ ᥘᥢᥳ ᥐᥩᥭᥰ ᥕᥝᥳ ... ᥔᥧᥴ ᥓᥝᥲ ᥟᥩᥢ ᥔᥫᥐᥱ ᥞᥝᥰ ... ᥛᥫᥰ ᥑᥪᥢᥰ ᥛᥫᥒᥰ ᥛᥣᥝᥰ ᥔᥥᥴ ... ᥙᥩᥒᥱ ᥗᥪᥒᥴ ᥙᥤ ᥜᥣᥳ ᥐᥝ ᥑᥣᥲ ᥔᥥᥴ ᥘᥣᥲ ...”
ᥘᥣᥖ ᥘᥒᥱ ᥘᥢᥴ ᥕᥝᥳ ᥔᥣᥛᥴ ᥘᥨᥒᥴ ᥜᥣᥳ ᥐᥤᥢ ᥑᥝᥲ ᥛᥧᥢᥰ ᥑᥝᥲ ᥙᥩᥒᥰ ᥟᥢ ᥙᥤ ᥜᥣᥳ ᥛᥢᥰ ᥓᥝᥲ ᥔᥨᥒᥱ ᥙᥢ ᥘᥢᥳ ᥔᥥᥴ ᥘᥙᥴ ᥖᥣ ᥘᥪᥛᥰ ᥛᥫᥒᥰ ᥐᥣᥱ ᥖᥤ ᥛᥫᥒᥰ ᥐᥩᥒ ᥛᥫ ᥙᥤ 1321 ᥕᥧᥱ ᥕᥝᥳ။ ᥙᥤ ᥘᥩᥒᥳ ᥖᥭᥰ ᥛᥫᥒᥰ ᥐᥩᥒ ᥞᥝᥰ ᥑᥝᥴ ᥖᥪᥐᥳ ᥟᥩᥢ ᥐᥢ ᥕᥧᥛᥱ ᥕᥛ ᥝᥣ ᥓᥝᥲ ᥔᥣᥛᥴ ᥘᥨᥒᥴ ᥜᥣᥳ ᥙᥥᥢ ᥓᥝᥲ ᥛᥣᥢᥲ ᥓᥝᥲ ᥛᥫᥒᥰ ᥘᥨᥒᥴ ᥙᥬᥳ ᥙᥣᥰ ᥝᥭᥳ ᥕᥧᥱ ᥖᥤ ᥛᥫᥒᥰ ᥐᥩᥒ ᥖᥨᥝᥱ ᥗᥪᥒᥴ ᥕᥣᥛᥰ ᥘᥥᥝ ᥘᥭᥴ ᥕᥝᥳ။

ᥗᥧᥱ ᥘᥦᥛᥲ ᥘᥥᥝ

“ᥘᥣᥒᥰ ᥝᥣᥒ ᥓᥥ ” ᥘᥭᥲ ᥑᥣᥝᥱ ᥘᥧᥐ ᥔᥩᥒᥴ ᥘᥨᥝᥱ ᥓᥖᥳ ᥓᥬ ᥖᥨᥝᥱ ᥐᥢ ᥝᥭᥳ ᥘᥭᥴ ᥘᥦᥰ ᥗᥪᥒᥴ ᥑᥣᥝᥰ ᥞᥦᥢᥰ ᥛᥧᥱ ᥑᥝᥲ ᥖᥣᥱ ᥘᥫᥒ ᥛᥢᥰ ᥘᥣᥒᥰ ᥟᥝ ᥗᥧᥱ ᥘᥦᥛᥲ ᥘᥥᥝ ᥔᥬᥱ ᥙᥣᥢᥳ ᥛᥧᥱ ᥑᥝᥲ ᥔᥥᥴ ᥐᥣᥱ ᥔᥨᥒᥱ ᥙᥢ ᥔᥫᥴ ᥑᥣᥢᥱ ᥜᥣᥳ ᥕᥝᥳ။ ᥔᥫᥴ ᥑᥣᥢᥱ ᥜᥣᥳ ᥗᥣᥛᥴ ᥝᥣ “ᥛᥥ ... ᥗᥧᥱ ᥘᥦᥛᥲ ᥘᥥᥝ ᥘᥭᥳ ... ᥖᥥᥴ ᥞᥥᥖᥱ ᥞᥪᥴ ᥐᥤᥙ ᥐᥤᥢ ᥘᥭᥲ ᥘᥣᥱ ...” ᥐᥨᥝᥳ ᥙᥥᥢ ᥛᥥ ᥖᥩᥙᥱ ᥝᥣ “ᥞᥪᥴ ᥖᥥᥴ ᥞᥧᥳ ᥘᥣᥱ ᥘᥧᥐ ... ᥕᥨᥝ ᥘᥧᥐ ᥛᥥ ... ᥖᥥᥴ ᥛᥨᥝᥴ ᥐᥤᥙ ᥕᥧᥱ ᥟᥫᥰ ... ᥟᥛᥱ ᥘᥫᥴ ᥔᥥᥴ ... ᥛᥣᥢᥲ ᥛᥫᥒᥰ ᥘᥨᥒᥴ ᥙᥥᥢ ᥘᥧᥐ ᥘᥭᥳ ... ᥘᥧᥐ ᥛᥥ ᥟᥣᥢᥰ ᥙᥩᥒ ᥘᥭᥲ ᥐᥨᥝᥳ ᥘᥥᥝ ᥕᥧᥱ ... ᥟᥛᥱ ᥓᥪ ᥞᥪᥴ ...” ᥘᥭᥴ ᥕᥝᥳ။
ᥛᥫ ᥘᥭᥲ ᥒᥤᥢᥰ ᥑᥣᥛᥰ ᥛᥥ ᥕᥝᥳ ᥘᥢᥳ ᥔᥫᥴ ᥑᥣᥢᥱ ᥜᥣᥳ ᥕᥧᥙ ᥞᥧᥳ ᥖᥣᥒᥰ ᥚᥤᥖᥴ ᥖᥨᥝ ᥐᥝᥱ ᥕᥝᥳ ᥔᥥᥴ ᥘᥦᥖ ᥙᥩᥭᥱ ᥐᥨᥢᥰ ᥘᥛᥰ ᥘᥪᥙ ᥓᥩᥛᥰ ᥞᥣᥛᥲ ᥔᥣᥛᥴ ᥘᥨᥒᥴ ᥜᥣᥳ ᥐᥤᥢ ᥑᥝᥲ ᥛᥧᥢᥰ ᥔᥥᥴ ᥖᥣᥳ ᥟᥛᥱ ᥖᥢᥰ ᥑᥪᥖᥴ။ ᥛᥫ ᥐᥨᥢᥰ ᥛᥢᥰ ᥓᥝᥲ ᥚᥦᥝᥴ ᥐᥣᥱ ᥘᥢᥳ ᥔᥣᥛᥴ ᥘᥨᥒᥴ ᥜᥣᥳ ᥔᥥᥒᥲ ᥐᥣᥛᥱ ᥔᥧᥖᥰ ᥛᥧᥢ ᥙᥬᥳ ᥝᥭᥳ ᥕᥧᥱ ᥕᥝᥳ။
ᥑᥣᥝᥱ ᥞᥣᥭᥳ ᥘᥨᥒᥴ ᥟᥢ ᥟᥛᥱ ᥑᥬᥲ ᥒᥤᥢᥰ ᥔᥥᥴ ᥙᥫᥢ ᥘᥢᥳ ᥗᥪᥒᥴ ᥛᥣᥰ ᥕᥝᥳ ᥐᥩᥲ ᥔᥫᥴ ᥑᥣᥢᥱ ᥜᥣᥳ ᥘᥦᥒᥴ ᥓᥬ ᥘᥦᥢᥱ ᥘᥦᥰ ᥐᥢᥲ ᥞᥭᥲ ᥕᥧᥱ ᥘᥬᥰ ᥓᥬ ᥟᥛᥱ ᥘᥣᥖ ᥑᥣᥛᥰ ᥘᥭᥲ ᥔᥥᥴ ᥑᥨᥝᥲ ᥕᥝᥳ ᥐᥩᥲ ᥕᥣᥱ ᥘᥩᥒᥳ ᥟᥢ ᥙᥥᥢ ᥛᥪᥰ ᥑᥣᥴ ᥔᥥᥴ ᥓᥩᥭ ᥗᥦᥛᥴ ᥙᥤ ᥝᥭᥳ ᥕᥧᥱ ᥘᥢᥳ ᥖᥥᥳ ᥟᥛᥱ ᥘᥧᥐᥳ ᥛᥣᥰ ᥘᥭᥲ ᥑᥪᥢᥰ ᥕᥝᥳ။
ᥕᥧᥛᥱ ᥑᥣᥛᥰ ᥐᥝᥰ ᥐᥦᥰ ᥐᥣᥒ ᥘᥦᥢᥱ ᥘᥦᥰ ᥙᥥᥢ ᥘᥩᥒ ᥘᥭᥲ ᥔᥧᥛᥰ ᥘᥨᥒᥴ ᥔᥧᥛᥰ ᥘᥣᥒᥴ ᥙᥧᥢ ᥔᥫᥴ ᥑᥣᥢᥱ ᥜᥣᥳ ᥐᥩᥭᥰ ᥛᥝᥱ ᥐᥣᥰ ᥙᥧᥢ ᥛᥫᥒᥰ ᥛᥣᥝᥰ ᥘᥨᥒᥴ ᥗᥦᥢᥲ ᥘᥧᥰ ᥐᥩᥢᥱ ᥕᥝᥳ။ ᥘᥩᥒ ᥓᥫᥰ ᥘᥭᥳ ᥐᥪᥐᥱ ᥙᥪᥢᥰ ᥛᥣᥰ ᥖᥨᥝᥱ ᥗᥪᥒᥴ ᥝᥢᥰ ᥘᥭᥳ ᥘᥦᥰ ᥗᥝᥲ ᥐᥥᥱ ᥛᥫᥒᥰ ᥛᥣᥝᥰ ᥑᥝᥴ ᥐᥥᥙᥱ ᥟᥝ ᥙᥥᥢ ᥑᥣᥛᥰ ᥔᥒᥱ ᥔᥩᥢᥴ ᥘᥧᥐ ᥘᥣᥢᥴ ᥛᥣᥰ ᥙᥣᥢ ᥔᥪᥙᥱ ᥙᥣᥢ ᥝᥣ “ᥗᥧᥱ ᥘᥦᥛᥲ ᥘᥥᥝ ... ᥐᥤᥙ ᥟᥛᥱ ᥘᥭᥲ ... ᥐᥨᥢᥰ ᥐᥨᥝᥳ ᥘᥥᥝ ... ᥞᥥᥖᥱ ᥔᥒᥴ ᥟᥛᥱ ᥙᥥᥢ ...” ᥘᥭᥴ ᥕᥝᥳ။

ᥙᥧᥳ ᥐᥛᥱ ᥙᥣᥒ ᥕᥣᥲ ᥓᥥ ᥐᥦᥒᥰ

ᥛᥫᥒᥰ ᥙᥧᥳ ᥐᥛᥱ ᥙᥣᥢ “ᥢᥣᥳ ᥘᥣᥳ ᥔᥤᥱ ᥞᥣᥳ ᥙᥣ ᥖᥥᥳ ” ᥘᥢᥳ ᥟᥣᥭᥲ ᥔᥦᥒᥴ ᥑᥭᥱ၊ ᥕᥤ ᥔᥦᥒᥴ ᥐᥛᥱ၊ ᥔᥣᥛᥴ ᥔᥦᥒᥴ ᥔᥬᥴ ᥖᥭᥰ ᥔᥣᥛᥴ ᥙᥤ ᥘᥩᥒᥳ ᥛᥤᥰ ᥟᥨᥝᥰ ᥓᥣᥱ ᥝᥭᥳ။ ᥙᥤ 1304 ᥘᥢᥳ ᥟᥣᥭᥲ ᥔᥦᥒᥴ ᥑᥭᥱ ᥖᥦᥙᥱ ᥟᥝ ᥞᥨᥝᥴ ᥓᥨᥝᥱ ᥓᥣᥱ ᥙᥢ ᥑᥧᥢᥴ ᥕᥤ ᥐᥣᥭᥰ ᥑᥛᥰ ᥕᥝᥳ ᥐᥩᥲ ᥟᥣᥱ ᥘᥣᥱ ᥑᥫᥰ ᥑᥧᥢᥴ ᥙᥧᥳ ᥐᥛᥱ ᥟᥨᥢᥲ ᥕᥨᥙ ᥘᥫᥴ ᥐᥝᥱ။ ᥓᥝᥲ ᥘᥤᥖ ᥘᥦᥰ ᥓᥝᥲ ᥛᥩᥢᥰ ᥘᥤᥖᥰ ᥟᥢ ᥙᥥᥢ ᥑᥫᥰ ᥑᥧᥢᥴ ᥙᥧᥳ ᥐᥛᥱ ᥟᥧᥙᥳ ᥛᥫᥒᥰ ᥗᥦᥢᥲ ᥔᥩᥒᥴ ᥔᥪᥙᥱ ᥕᥝᥳ ᥐᥩᥲ ᥑᥫᥰ ᥙᥧᥳ ᥐᥛᥱ ᥔᥧᥖᥴ ᥑᥣᥖᥱ ᥐᥣᥱ။ ᥛᥫᥒᥰ ᥙᥧᥳ ᥐᥛᥱ ᥐᥩᥲ ᥝᥩᥖ ᥝᥣᥭᥰ ᥐᥣᥱ ᥕᥧᥱ ᥕᥝᥳ။
ᥙᥤ 1312 ᥛᥫ ᥘᥧᥐ ᥓᥣᥭᥰ ᥓᥨᥝᥱ ᥓᥣᥱ “ᥓᥝᥲ ᥘᥤᥖ ” ᥙᥥᥢ ᥑᥧᥢᥴ ᥙᥧᥳ ᥐᥛᥱ ᥝᥭᥳ ᥕᥧᥱ ᥘᥢᥳ ᥔᥣᥛᥴ ᥔᥦᥒᥴ ᥔᥬᥴ ᥖᥥᥱ ᥖᥒᥲ “ᥛᥫᥒᥰ ᥙᥣᥒ ᥕᥣᥲ ” (ᥙᥒᥰ ᥕᥣᥲ)ᥔᥥᥴ ᥖᥒᥲ ᥔᥣᥭᥴ ᥔᥪᥙᥱ ᥑᥫᥰ ᥑᥧᥢᥴ ᥟᥧᥙᥳ ᥙᥫᥒᥱ ᥞᥣᥒᥰ ᥐᥩᥭᥰ။ ᥔᥣᥭᥴ ᥔᥪᥙᥱ ᥑᥫᥰ ᥑᥧᥢᥴ ᥙᥣᥒ ᥕᥣᥲ ᥖᥢᥰ ᥛᥤᥰ (6) ᥔᥪᥙᥱ။ ᥔᥪᥐᥱ ᥛᥫᥒᥰ ᥛᥣᥝᥰ ᥖᥪᥐᥱ ᥘᥦᥰ ᥛᥫᥒᥰ ᥙᥣᥒ ᥕᥣᥲ ᥘᥧᥳ ᥙᥒᥰ ᥐᥣᥱ ᥛᥫ ᥙᥤ 1364 ᥘᥢᥳ ᥕᥝᥳ။
ᥛᥫ ᥙᥤ 1315 ᥘᥢᥳ “ᥔᥣᥛᥴ ᥔᥦᥒᥴ ᥔᥬᥴ ” ᥟᥩᥭᥱ ᥒᥨᥢᥳ ᥙᥤ ᥟᥣᥭᥴ ᥛᥢᥰ “ᥟᥣᥭᥲ ᥔᥦᥒᥴ ᥑᥭᥱ ” ᥖᥣᥭᥱ ᥐᥣᥱ။ ᥘᥧᥐ ᥓᥣᥭᥰ ᥔᥣᥛᥴ ᥔᥦᥒᥴ ᥔᥬᥴ “ᥓᥝᥲ ᥕᥨᥢᥰ ” ᥚᥤᥖᥴ ᥓᥬ ᥘᥫᥴ ᥘᥩᥒ ᥟᥢ ᥟᥧᥲ ᥛᥢᥰ ᥟᥩᥭᥱ ᥘᥧᥒᥰ ᥛᥢᥰ ᥖᥣᥭ ᥘᥢᥳ ᥔᥥᥴ ᥐᥣᥱ ᥖᥥᥱ “ᥛᥫᥒᥰ ᥓᥥ ᥐᥦᥒᥰ ”ᥗᥦᥢᥲ။ ᥖᥒᥲ ᥔᥣᥭᥴ ᥔᥪᥙᥱ ᥑᥫᥰ ᥑᥧᥢᥴ ᥞᥣᥒᥰ ᥐᥩᥭᥰ ᥗᥦᥰᥲ။ ᥖᥢᥰ ᥛᥤᥰ (7)ᥔᥪᥙᥱ ᥔᥥᥴ ᥔᥫᥐᥱ ᥛᥫᥒᥰ ᥛᥣᥝᥰ ᥖᥪᥐᥱ ᥘᥦᥰ ᥘᥧᥳ ᥙᥒᥰ ᥐᥣᥱ ᥛᥫ ᥙᥤ 1364 ᥘᥒᥱ ᥙᥣᥒ ᥕᥣᥲ ᥘᥒᥱ ᥐᥝᥱ။

ᥟᥣᥱ ᥝᥣᥳ ᥘᥦᥰ ᥛᥫᥒᥰ ᥛᥣᥝᥰ

ᥙᥤ 1361 ᥑᥧᥢᥴ ᥙᥣᥒ ᥕᥣᥲ “ᥢᥣᥳ ᥘᥣᥳ ᥔᥧᥱ ” ᥙᥩᥭᥱ ᥚᥩᥒᥰ ᥑᥥᥝᥴ ᥙᥣᥰ ᥟᥝ ᥑᥨᥝᥰ ᥑᥩᥒᥴ ᥚᥣᥢᥱ ᥖᥣᥱ ᥘᥦᥰ ᥘᥤᥐ “ᥛᥫ ᥘᥥᥝ ᥖᥤ ᥓᥥ ᥐᥦᥒᥰ ᥘᥭᥳ ... ᥐᥨᥢᥰ ᥟᥢ ᥟᥛᥱ ᥓᥪ ᥑᥫᥰ ᥑᥧᥢᥴ ᥘᥢᥳ ... ᥑᥪᥢᥲ ᥞᥤᥛᥴ ᥞᥥᥖᥱ ᥑᥧᥢᥴ ᥝᥭᥳ ᥕᥧᥱ ... ᥑᥝᥲ ᥙᥫᥐᥱ ᥖᥥᥛ ᥛᥫᥒᥰ ᥝᥭᥳ ᥕᥧᥱ ᥘᥦᥰ ... ᥓᥝᥲ ᥙᥤ ᥞᥝᥰ ... ᥛᥣᥰ ᥖᥛ ᥟᥝ ... ᥑᥝᥲ ᥛᥢᥰ ᥛᥫᥰ ᥑᥣᥲ ᥘᥣᥰ ... ᥐᥝ ᥑᥣᥲ ᥓᥝᥲ ᥘᥩᥒᥳ ... ᥖᥥᥴ ᥚᥥᥝᥲ ᥙᥫᥐᥱ ... ᥚᥥᥝᥲ ᥐᥦᥙᥱ ᥛᥢᥰ ᥑᥣᥲ ᥘᥭᥴ ...” ᥟᥢ ᥓᥨᥝᥰ ᥞᥩᥒᥳ ᥖᥪᥐᥱ ᥓᥥ ᥐᥦᥒᥰ ᥘᥢᥳ ᥔᥨᥒᥱ ᥗᥪᥒᥴ ᥔᥫᥴ ᥑᥣᥢᥱ ᥜᥣᥳ ᥕᥧᥱ ᥕᥝᥳ။
ᥔᥫᥴ ᥑᥣᥢᥱ ᥜᥣᥳ ᥞᥬᥲ ᥘᥧᥐ ᥛᥢᥰ ᥓᥝᥲ ᥙᥥᥛᥱ ᥜᥣᥳ ᥘᥦᥰ ᥓᥝᥲ ᥒᥫᥢ ᥑᥥᥝᥴ ᥜᥣᥳ ᥟᥩᥢ ᥞᥨᥝᥴ ᥖᥣᥝᥳ ᥜᥣᥳ ᥘᥨᥝᥱ ၊ ᥖᥣᥝᥳ ᥔᥫᥴ ᥕᥥᥢᥰ၊ ᥖᥣᥝᥳ ᥞᥣᥢᥴ ᥐᥭᥱ ᥑᥤᥱ ᥔᥫᥐᥱ ᥘᥨᥒᥰ ᥓᥥ ᥐᥦᥒᥰ ᥕᥝᥳ။ ᥚᥦᥝᥴ “ᥖᥣ ᥐᥩᥒ ”ᥐᥩᥲ ᥘᥭᥲ ᥑᥣᥛᥱ ᥞᥙᥳ ᥖᥪᥐᥱ ᥘᥦᥰ ᥘᥭᥲ ᥖᥪᥐᥱ ᥐᥢ။ ᥔᥪᥐᥱ ᥛᥫᥒᥰ ᥛᥣᥝᥰ ᥙᥥᥳ။ ᥖᥣ ᥐᥩᥒ ᥘᥧᥳ ᥙᥒᥰ။ ᥑᥧᥢᥴ ᥖᥣ ᥐᥩᥒ ᥟᥩᥐᥱ ᥙᥣᥭ။ ᥛᥫᥒᥰ ᥖᥣ ᥐᥩᥒ ᥙᥒᥰ ᥕᥝᥳ ᥐᥩᥲ ᥔᥫᥐᥱ ᥛᥫᥒᥰ ᥛᥣᥝᥰ ᥔᥪᥙᥱ ᥘᥨᥒᥰ ᥖᥪᥐᥱ “ᥓᥥ ᥐᥦᥒᥰ ”။ ᥑᥧᥢᥴ ᥓᥥ ᥐᥦᥒᥰ “ᥛᥤᥢᥰ ᥙᥩᥐᥳ ” ᥟᥩᥐᥱ ᥙᥣᥭ ᥐᥣᥱ ᥕᥧᥱ ᥕᥝᥳ။
ᥖᥪᥐᥱ ᥕᥧᥱ ᥘᥒᥱ ᥘᥢᥴ “ᥢᥣᥳ ᥘᥣᥳ ᥔᥧᥱ ” ᥟᥛᥱ ᥟᥩᥐᥱ ᥓᥩᥭ ᥐᥩᥭᥰ ᥛᥝᥱ ᥐᥣᥰ ᥓᥨᥝᥰ ᥘᥧᥐ ᥘᥩᥒᥳ ᥛᥢᥰ ᥟᥩᥐᥱ ᥙᥣᥭ ᥐᥣᥱ ᥛᥨᥐᥴ ᥝᥭᥳ ᥚᥣᥭᥱ ᥖᥨᥐᥱ ᥐᥥᥝ ᥙᥦᥖ ᥕᥝᥳ။ ᥔᥪᥐᥱ ᥛᥫᥒᥰ ᥛᥣᥝᥰ ᥔᥩᥢᥱ ᥝᥣ “ᥖᥣᥒᥰ ᥘᥣᥖ ᥘᥦᥰ ᥖᥣᥒᥰ ᥞᥥᥖᥱ ... ᥢᥣᥳ ᥘᥣᥳ ᥔᥧᥱ ᥟᥛᥱ ᥒᥣᥛᥱ ᥐᥢ ... ᥘᥣᥖ ᥖᥥᥳ ᥘᥣᥖ ᥝᥣ ᥔᥥᥴ ... ᥟᥛᥱ ᥞᥥᥖᥱ ᥓᥩᥛᥰ ” ᥘᥦᥰ ᥖᥪᥐᥱ ᥓᥥ ᥐᥦᥒᥰ ᥘᥧᥳ ᥕᥝᥳ ᥔᥪᥙᥱ ᥐᥣᥱ ᥙᥣᥒ ᥕᥣᥲ။ ᥗᥪᥒᥴ ᥙᥣᥒ ᥕᥣᥲ ᥕᥝᥳ ᥐᥩᥲ ᥙᥭᥱ ᥘᥭᥲ ᥞᥢᥴ “ᥢᥣᥳ ᥘᥣᥳ ᥔᥧᥱ ” ᥟᥩᥐᥱ ᥛᥣᥰ။ ᥘᥧ ᥘᥣᥭ ᥙᥨᥢᥳ ᥖᥤ ᥘᥦᥢᥱ ᥘᥭᥴ ᥔᥥᥴ ᥔᥪᥐᥱ ᥛᥫᥒᥰ ᥛᥣᥝᥰ ᥑᥝᥲ ᥖᥪᥐᥱ ᥘᥦᥰ ᥙᥣᥒ ᥕᥣᥲ ᥘᥧᥳ ᥙᥒᥰ ᥐᥣᥱ ᥕᥝᥳ။
ᥖᥪᥐᥱ ᥘᥧᥳ ᥕᥝᥳ ᥐᥩᥲ ᥓᥝᥲ ᥙᥥᥛᥱ ᥜᥣᥳ ᥘᥦᥰ ᥓᥝᥲ ᥒᥫᥢ ᥑᥥᥝᥴ ᥜᥣᥳ ᥕᥧᥐᥳ “ᥔᥣ ᥖᥨᥝᥰ ᥛᥒᥰ ᥜᥣᥳ ” ᥘᥧᥐ ᥓᥣᥭᥰ ᥓᥝᥲ ᥕᥨᥢᥰ ᥟᥢ ᥖᥥᥱ ᥖᥒᥲ ᥙᥣᥢ ᥑᥧᥢᥴ ᥓᥥ ᥐᥦᥒᥰ ᥘᥢᥳ ᥑᥪᥢᥲ ᥙᥥᥢ ᥑᥧᥢᥴ ᥕᥝᥳ ᥖᥤ ᥕᥩᥙᥱ “ᥢᥣᥳ ᥘᥣᥳ ᥔᥧᥱ ” ᥛᥫᥰ ᥓᥩᥛᥰ ᥛᥫᥒᥰ ᥛᥣᥝᥰ ᥕᥧᥱ ᥘᥦᥰ ᥘᥭᥲ ᥓᥪ “ᥢᥣᥳ ᥘᥣᥳ ᥔᥧᥱ ᥓᥙᥴ ᥓᥩᥛᥰ ᥛᥫᥒᥰ ᥛᥣᥝᥰ ” (မောပါနရသူ )ᥘᥭᥴ ᥘᥢᥳ ᥐᥪᥐᥱ ᥙᥪᥢᥰ ᥛᥣᥢ ᥝᥭᥳ ᥕᥧᥱ ᥕᥝᥳ။
26.1.1365 “ᥔᥣ ᥖᥨᥝᥰ ᥛᥒᥰ ᥜᥣᥳ ” ᥙᥨᥐᥱ ᥖᥒᥲ ᥛᥫᥒᥰ ᥟᥣᥱ ᥝᥣᥳ(အင်း၀)ᥘᥦᥰ ᥛᥤᥰ “ᥙᥣᥢ ᥟᥣᥱ ᥝᥣᥱ” (အင်း၀ခေတ် ) ᥟᥢ ᥛᥫ ᥐᥩᥢᥱ ᥛᥣᥢ ᥞᥩᥒᥳ ᥝᥣ “ᥙᥣᥢ ᥖᥭᥰ ” (သျှမ်းခေတ်) ᥘᥭᥴ ᥘᥢᥳ ᥛᥣᥰ ᥕᥝᥳ။ ᥛᥣᥢ ᥖᥦᥛᥲ ᥙᥪᥢᥰ ᥝᥭᥳ ᥝᥣ ᥘᥤᥐ ᥛᥣᥢ ᥖᥥᥱ ᥞᥣᥴ ᥞᥫ ᥞᥫᥒᥰ ᥛᥣᥰ ᥘᥬᥰ ᥙᥣᥢ ᥟᥣᥱ ᥝᥣᥳ။ ᥑᥧᥰ ᥛᥨᥝᥴ ᥘᥤᥐ ᥛᥣᥢ ᥖᥥᥱ ᥛᥤᥰ ᥛᥣᥰ ᥘᥬᥰ ᥙᥣᥢ ᥟᥣᥱ ᥝᥣᥳ ᥘᥭᥳ ᥐᥩᥭᥰ ᥘᥭᥴ ᥕᥝᥳ။

ᥑᥥᥱ ᥚᥦᥢᥴ ᥕᥣᥳ ᥛᥫᥒᥰ ᥛᥣᥝᥰ ᥘᥨᥒᥴ

ᥙᥤ 1362 ᥘᥢᥳ ᥑᥧᥢᥴ ᥑᥥᥱ ᥞᥢᥴ ᥝᥣ “ᥔᥫᥴ ᥑᥣᥢᥱ ᥜᥣᥳ ᥟᥣᥱ ᥕᥧᥳ ᥕᥬᥱ ᥐᥥᥱ ᥕᥝᥳ ... ᥘᥧᥐ ᥛᥢᥰ ᥓᥝᥲ ᥘᥦᥰ ... ᥖᥣᥝᥳ ᥔᥪᥒᥱ ᥖᥒᥰ ᥘᥣᥭᥴ ᥐᥩᥲ ... ᥟᥩᥢ ᥔᥫᥐᥱ ᥘᥨᥒᥰ ᥖᥪᥐᥱ ᥓᥥ ᥐᥦᥒᥰ ᥘᥦᥲ ᥙᥣᥒᥴ ᥕᥣᥲ ᥕᥧᥱ ... ᥙᥥᥢᥴ ᥔᥧᥢᥱ ᥘᥤᥴ ᥘᥨᥒᥴ ᥘᥣᥒᥴ ” ᥘᥭᥴ ᥔᥥᥴ ᥔᥨᥒᥱ ᥔᥪᥐᥱ ᥘᥨᥒᥰ ᥐᥝᥰ ᥛᥫᥒᥰ ᥛᥣᥝᥰ ᥔᥥᥴ ᥔᥤᥛᥰ ᥟᥝ ᥘᥨᥒᥴ ᥔᥣᥒᥲ၊ ᥛᥧᥴ ᥟᥣᥢᥱ၊ ᥙᥧᥰ ᥑᥣᥒᥳ ᥘᥨᥒᥴ ᥕᥝᥳ ᥖᥒᥲ ᥖᥙᥳ ᥕᥧᥱ ᥝᥭᥳ ᥗᥪᥒᥴ ᥙᥣᥒ ᥛᥨᥒ၊ ᥓᥥ ᥘᥫᥴ၊ ᥛᥨᥝᥱ ᥘᥥᥐᥱ၊ ᥞᥨᥝᥴ ᥑᥩᥒᥰ ᥘᥦᥰ ᥔᥫᥴ ᥑᥣᥢᥱ ᥜᥣᥳ ᥔᥨᥝᥱ ᥔᥪᥐᥱ ᥖᥪᥐᥱ ᥑᥪᥢᥰ ᥐᥛᥰ ᥘᥥᥝ။ ᥖᥪᥐᥱ ᥐᥢ ᥞᥪᥒᥴ ᥔᥣᥛᥴ ᥘᥫᥢ ᥙᥣᥭ။ ᥔᥪᥐᥱ ᥑᥥᥱ ᥟᥛᥱ ᥑᥣᥛᥱ ᥘᥭᥲ ᥔᥥᥴ ᥞᥨᥢᥴ ᥛᥫᥰ ᥑᥪᥢᥰ ᥕᥝᥳ။
ᥘᥪᥢᥰ ᥘᥢᥳ ᥑᥧᥢᥴ ᥑᥥᥱ ᥝᥨᥢᥳ ᥝᥣ “ᥔᥒᥴ ᥖᥤᥴ ᥟᥝ ᥘᥣᥭᥰ ᥔᥪᥐᥱ ᥔᥥᥴ ᥖᥪᥐᥱ ... ᥖᥥᥴ ᥟᥛᥱ ᥙᥥᥳ ᥘᥭᥲ ... ᥐᥨᥢᥰ ᥖᥥᥴ ᥘᥧᥳ ᥕᥬᥱ ᥔᥧᥛᥰ ᥘᥛᥴ ... ᥗᥧᥐᥴ ᥘᥤ ᥟᥝ ᥘᥣᥭᥰ ᥘᥐᥴ ᥘᥦᥛᥴ ᥔᥥᥴ ᥖᥪᥐᥱ ᥕᥝᥳ ...” ᥘᥭᥴ ᥔᥥᥴ ᥔᥨᥒᥱ ᥛᥨᥝᥴ ᥐᥣᥱ ᥘᥣᥰ ᥐᥩᥳ ᥘᥫᥒ ᥑᥝᥲ ᥛᥫᥒᥰ ᥛᥣᥝᥰ။ ᥛᥨᥝᥴ ᥐᥣᥱ ᥘᥣᥰ ᥘᥢᥳ ᥚᥦᥝᥴ ᥐᥣᥱ ᥗᥧᥒᥳ “ᥙᥣᥒ ᥛᥣᥐᥱ ᥞᥧ ” ᥞᥤᥛᥰ ᥛᥨᥝᥱ ᥘᥥᥐᥱ ᥞᥨᥝᥴ ᥑᥩᥒᥰ ᥕᥝᥳ ᥔᥩᥢᥱ ᥘᥙᥳ ᥖᥨᥭᥰ။ ᥗᥧᥐᥴ ᥛᥦᥢ ᥖᥤ ᥘᥤ ᥘᥭᥲ ᥘᥥᥐᥱ ᥘᥣᥛᥱ ᥝᥭᥳ ᥕᥝᥳ ᥘᥭᥴ ᥔᥥᥴ ᥞᥣᥒᥲ ᥞᥦᥢᥰ ᥞᥥᥖᥱ ᥟᥧᥛᥴ ᥑᥛᥰ ᥞᥣᥲ ᥘᥧᥐ။
ᥞᥥᥖᥱ ᥟᥣᥒᥰ ᥘᥥᥐᥱ ᥘᥣᥛᥱ ᥑᥧᥢᥴ ᥘᥦᥰ ᥛᥫᥒᥰ ᥞᥩᥒᥰ ᥝᥭᥳ ᥖᥬᥲ ᥐᥨᥢᥲ ᥟᥧᥛᥴ။ ᥒᥪᥢᥰ ᥘᥦᥰ ᥑᥛᥰ ᥔᥬᥱ ᥝᥭᥳ ᥘᥬᥰ ᥟᥧᥛᥴ။ ᥔᥤᥱ ᥘᥧᥐ ᥚᥒᥴ ᥔᥤᥱ ᥓᥥᥒᥱ ᥘᥣᥲ ᥛᥫᥒᥰ။ ᥐᥣᥒ ᥔᥤᥱ ᥘᥧᥐ ᥔᥪ ᥔᥪ ᥘᥢᥳ ᥚᥒᥴ ᥘᥧᥐ ᥘᥫᥒ။ ᥖᥒᥰ ᥔᥥᥒᥱ ᥚᥒᥴ ᥝᥭᥳ ᥞᥣᥲ ᥘᥧᥐ ᥕᥝᥳ ᥞᥥᥖᥱ ᥛᥨᥝᥴ ᥖᥨᥭᥰ ᥐᥣᥱ ᥘᥣᥰ ᥑᥝᥲ ᥛᥫᥒᥰ ᥛᥣᥝᥰ ᥐᥣᥱ ᥕᥧᥱ ᥕᥝᥳ။ ᥟᥛᥱ ᥞᥪᥒᥴ ᥟᥛᥱ ᥘᥣᥢᥰ ᥓᥪ ᥔᥥᥒᥴ ᥛᥨᥝᥴ ᥐᥣᥱ ᥘᥣᥰ ᥘᥪᥰ ᥘᥒᥴ ᥛᥣᥰ ᥖᥥᥳ ᥕᥝᥳ။ ᥚᥬᥴ ᥐᥩᥲ ᥝᥣ ᥗᥧᥐᥴ ᥘᥦᥢᥱ ᥛᥦᥢ ᥘᥦᥢᥱ ᥘᥭᥴ ᥔᥥᥴ ᥘᥪᥰ ᥗᥪᥒᥴ ᥔᥫᥴ ᥑᥣᥢᥱ ᥜᥣᥳ ᥕᥝᥳ။
ᥔᥫᥴ ᥑᥣᥢᥱ ᥜᥣᥳ ᥞᥩᥒᥳ ᥛᥫᥰ ᥔᥩᥢᥱ ᥘᥙᥳ ᥘᥦᥰ ᥛᥨᥝᥴ ᥐᥣᥱ ᥘᥣᥰ ᥞᥨᥝᥰ ᥝᥣ “ᥓᥪ ᥔᥥᥒᥴ ᥛᥫᥒᥰ ᥓᥥ ᥘᥣᥢᥳ ᥘᥭᥴ ... ᥛᥫ ᥐᥩᥢᥱ ᥖᥥᥳ ... ᥘᥤ ᥘᥨᥒᥴ ᥞᥨᥒᥴ ᥘᥪᥰ ᥖᥥᥳ ᥖᥥᥳ ... ᥝᥣᥭᥰ ᥔᥥᥴ ᥑᥧᥢᥴ ᥔᥣᥛᥴ ᥘᥨᥒᥴ ᥘᥧᥳ ᥕᥝᥳ ᥖᥥᥳ ... ᥔᥣᥭᥴ ᥘᥛᥳ ᥔᥣᥭᥴ ᥘᥤᥢ ... ᥕᥨᥖ ᥐᥣᥱ ᥕᥝᥳ ... ᥟᥝ ᥘᥭᥳ ᥐᥣᥱ ᥘᥣᥲ ... ᥔᥒᥴ ᥔᥪᥙᥱ ᥕᥧᥱ ᥗᥦᥢᥲ ᥖᥤ ᥘᥭᥳ ᥘᥭᥴ ᥖᥥᥳ ... ᥖᥣᥱ ᥖᥥᥴ ᥕᥧᥱ ᥓᥪᥢ ... ᥐᥖᥴ ᥕᥥᥢ ... ᥑᥪᥢᥲ ᥔᥧᥒᥴ ᥗᥦᥒᥲ ᥘᥢᥳ ... ᥟᥛᥱ ᥛᥤᥰ ᥕᥝᥳ ᥔᥥᥴ ᥛᥝᥱ ᥐᥣᥰ ... ᥛᥧᥢ ᥟᥧᥴ ᥛᥣᥢᥲ ᥛᥫᥒᥰ ... ᥖᥥᥴ ᥖᥛᥱ ᥕᥨᥝᥲ ᥐᥣᥱ ᥗᥦᥒᥲ ᥐᥩᥭᥰ ... ᥘᥤᥢ ᥖᥤ ᥘᥭᥲ ... ᥟᥛᥱ ᥐᥪᥒᥱ ᥘᥦᥙ ... ᥞᥨᥝᥴ ᥑᥛᥰ ᥕᥧᥱ ᥘᥫᥴ ᥛᥢᥰ ᥕᥝᥳ ... ᥗᥧᥐᥴ ᥘᥤ ᥑᥣᥭᥳ ᥐᥣᥱ ᥖᥒᥲ ᥝᥥᥒᥰ ᥗᥦᥢᥲ ... ᥖᥤ ᥛᥧᥢ ᥟᥧᥴ ᥛᥫᥒᥰ ... ᥕᥧᥐᥳ ᥑᥪᥢᥲ ᥑᥪᥢᥰ ᥘᥢᥳ ᥕᥝᥳ ...” ᥘᥭᥴ ᥘᥦᥰ
ᥔᥫᥴ ᥑᥣᥢᥱ ᥜᥣᥳ ᥗᥣᥛᥴ ᥖᥤ ᥗᥧᥐᥴ ᥘᥤ ᥑᥣᥭᥳ ᥕᥧᥱ ᥘᥦᥰ ᥛᥨᥝᥴ ᥐᥣᥱ ᥘᥣᥰ ᥞᥥᥖᥱ ᥐᥦᥒ ᥔᥩᥢᥱ ᥘᥙᥳ ᥕᥝᥳ ᥖᥩᥙᥱ ᥝᥣ “ᥖᥥᥴ ᥘᥭᥲ ᥔᥩᥐ ᥞᥣᥴ ... ᥖᥤ ᥛᥤᥰ ᥟᥧᥛᥴ ᥑᥛᥰ ᥞᥣᥲ ᥘᥧᥐ ᥘᥢᥳ ... ᥖᥥᥱ ᥛᥫᥒᥰ ᥛᥬᥱ ᥗᥦᥢᥲ ... ᥔᥤᥱ ᥓᥥᥒᥱ ᥘᥣᥲ ᥛᥫᥒᥰ ... ᥞᥬᥲ ᥛᥤᥰ ᥘᥫᥒ ᥓᥥᥒᥱ ᥘᥫᥒ ᥘᥧᥐ ᥔᥥᥴ ... ᥐᥣᥒ ᥑᥝᥴ ᥔᥪ ᥐᥢ ᥘᥢᥳ ... ᥞᥬᥲ ᥛᥤᥰ ᥗᥦᥒᥲ ᥘᥧᥐ ᥘᥫᥒ ...
ᥔᥒᥴ ᥝᥣ ᥘᥭᥲ ᥑᥣᥭᥳ ᥐᥣᥱ ... ᥕᥧᥱ ᥖᥤ ᥘᥢᥳ ᥔᥥᥴ ... ᥘᥒ ᥛᥫᥒᥰ ᥘᥭᥴ ᥖᥥᥳ ... ᥞᥨᥝᥴ ᥑᥛᥰ ᥖᥐᥴ ᥙᥥᥢ ᥞᥨᥝᥴ ᥔᥦᥒᥴ ... ᥛᥫᥒᥰ ᥓᥫᥰ ᥙᥭᥱ ᥕᥣᥛᥲ ᥐᥨᥛᥲ ᥝᥣᥒᥰ ᥓᥧᥰ ᥔᥥᥴ ᥙᥩᥐ ᥐᥩᥲ ... ᥖᥐᥴ ᥖᥥᥴ ᥒᥤᥢᥰ ᥐᥨᥝ ᥒᥤᥢᥰ ᥚᥣᥢᥲ ᥔᥥᥴ ... ᥐᥨᥛᥲ ᥝᥣᥒᥰ ᥛᥣᥰ ᥓᥧᥰ ᥐᥛᥰ ᥘᥥᥝ ᥘᥦᥰ ... ᥛᥫᥒᥰ ᥐᥨᥛᥲ ᥐᥩᥛᥰ ᥘᥩᥛᥰ ᥓᥧᥰ ... ᥖᥐᥴ ᥖᥥᥴ ᥘᥛᥴ ... ᥓᥝᥲ ᥞᥨᥝᥴ ᥑᥛᥰ ᥐᥩᥲ ... ᥖᥐᥴ ᥖᥥᥴ ᥕᥧᥱ ᥓᥪᥢ ᥐᥖᥴ ᥕᥥᥢ ... ᥟᥣᥱ ᥕᥧᥳ ᥕᥪᥢᥰ ᥕᥣᥝᥰ ᥕᥝᥳ ... ᥓᥪ ᥔᥥᥒᥴ ᥛᥣᥢᥲ ᥛᥫᥒᥰ ... ᥖᥐᥴ ᥖᥥᥴ ᥔᥣ ᥘᥨᥒᥴ ᥞᥨᥒᥴ ᥘᥪᥰ ᥖᥨᥝᥱ ᥗᥪᥒᥴ ᥓᥨᥝ ᥘᥧᥐ ᥙᥣᥢ ᥘᥣᥢᥴ ᥕᥝᥳ ...” ᥘᥭᥴ ᥘᥦᥰ ᥔᥫᥴ ᥑᥣᥢᥱ ᥜᥣᥳ ᥗᥧᥐᥴ ᥓᥬ ᥘᥦᥢᥱ ᥔᥥᥴ ᥓᥬᥳ ᥚᥩᥒᥰ ᥛᥫᥒᥰ ᥓᥩᥛᥰ ᥛᥨᥝᥴ ᥐᥣᥱ ᥘᥣᥰ ᥔᥩᥐ ᥞᥣᥴ ᥖᥤ ᥖᥥᥴ ᥘᥭᥲ ᥖᥥᥱ ᥝᥥᥒᥰ ᥛᥬᥱ ᥘᥦᥰ ᥛᥨᥝᥴ ᥐᥣᥱ ᥘᥣᥰ ᥔᥩᥢᥱ ᥘᥙᥳ ᥕᥝᥳ ᥓᥨᥝᥰ ᥑᥧᥖ ᥖᥨᥭᥰ ᥖᥤ ᥘᥫᥒ ᥕᥝᥳ ᥖᥤ ᥘᥫᥒ ᥖᥨᥝᥱ ᥙᥩᥰ ᥗᥪᥒᥴ ᥐᥣᥱ ᥖᥤ ᥛᥢᥰ ᥚᥒᥴ ᥟᥧᥛᥴ ᥝᥭᥳ ᥘᥢᥳ ᥕᥧᥱ ᥕᥝᥳ။
ᥓᥝᥲ ᥔᥫᥴ ᥑᥣᥢᥱ ᥜᥣᥳ ᥓᥤ ᥔᥒᥱ ᥑᥣᥭᥳ ᥙᥨᥐᥰ ᥞᥨᥝᥴ ᥑᥛᥰ ᥖᥤ ᥗᥧᥒᥳ “ᥙᥣᥒ ᥛᥣᥐᥱ ᥞᥧᥲ ”ᥕᥝᥳ ᥞᥬᥲ ᥔᥣᥒᥲ ᥛᥣᥢᥲ ᥝᥥᥒᥰ ᥛᥬᥱ။ ᥖᥒᥲ ᥓᥪ ᥙᥥᥢ “ᥝᥥᥒᥰ ᥖᥣ ᥔᥨᥙᥱ ᥟᥧᥴ ”ᥕᥝᥳ ᥑᥣᥭᥳ ᥕᥧᥱ ᥛᥫ 1363 ᥘᥢᥳ ᥕᥝᥳ။ ᥔᥫᥴ ᥑᥣᥢᥱ ᥜᥣᥳ ᥙᥥᥢ ᥑᥧᥢᥴ ᥛᥫᥒᥰ ᥛᥣᥝᥰ ᥘᥭᥲ (54)ᥙᥤ ᥟᥣᥱ ᥕᥧᥳ ᥓᥝᥲ ᥘᥭᥲ (75)ᥙᥤ ᥔᥥᥴ ᥘᥩᥢᥰ ᥚᥥᥰ ᥛᥫ ᥙᥤ 1365 ᥕᥧᥱ ᥕᥝᥳ။ “ᥝᥥᥒᥰ ᥖᥣ ᥔᥨᥙᥱ ᥟᥧᥴ ” ᥘᥢᥳ ᥕᥣᥛᥰ ᥘᥥᥝ ᥞᥩᥒᥳ ᥝᥣ “ᥐᥩᥒᥰ ᥞᥨᥝᥴ ᥑᥛᥰ ” ᥘᥭᥴ ᥔᥥᥴ ᥛᥤᥰ ᥝᥭᥳ ᥕᥧᥱ ᥚᥣᥭᥱ ᥞᥩᥒᥱ ᥘᥛᥳ ᥛᥣᥝᥰ ᥞᥤᥛᥰ ᥛᥣᥢᥲ “ᥙᥣᥒᥱ ᥙᥧᥒᥱ ” ᥘᥬᥰ ᥘᥤᥢ ᥛᥫᥒᥰ ᥑᥥᥱ ᥘᥢᥳ ᥕᥝᥳ။

ᥔᥣᥭᥴ ᥔᥪᥙᥱ ᥑᥧᥢᥴ ᥛᥫᥒᥰ ᥛᥣᥝᥰ

ᥙᥤ 1365 ᥝᥣᥭᥰ ᥔᥥᥴ ᥔᥫᥴ ᥑᥣᥢᥱ ᥜᥣᥳ ᥘᥩᥢᥰ ᥚᥥᥰ ᥕᥝᥳ ᥘᥧᥐ ᥛᥢᥰ ᥓᥝᥲ “ᥓᥝᥲ ᥙᥥᥛᥱ ᥜᥣᥳ ” ᥑᥪᥢᥲ ᥙᥧᥖ ᥘᥒ ᥞᥣᥒᥲ ᥞᥨᥝᥴ ᥖᥤ ᥝᥥᥒᥰ ᥖᥣ ᥔᥨᥙᥱ ᥟᥧᥴ။ ᥖᥢᥰ ᥞᥪᥒᥴ ᥔᥩᥒᥴ ᥙᥤ ᥐᥩᥭᥰ ᥘᥩᥢᥰ ᥚᥥᥰ ᥐᥣᥱ ᥛᥫ 1367 ᥘᥢᥳ ᥕᥝᥳ။
ᥙᥤ 1367 ᥘᥧᥐ ᥓᥝᥲ ᥙᥥᥛᥱ ᥜᥣᥳ “ᥔᥫᥴ ᥝᥣᥐᥱ ᥜᥣᥳ ” ᥑᥪᥢᥲ ᥙᥧᥖ ᥘᥒ ᥞᥣᥒᥲ ᥞᥨᥝᥴ ᥖᥤ ᥖᥣ ᥔᥨᥙᥱ ᥟᥧᥴ ᥗᥦᥢᥲ။ ᥐᥢᥳ ᥓᥢᥴᥭ ᥘᥧᥐ ᥕᥤᥒᥰ ᥘᥣᥒᥰ ᥔᥣᥝᥴ ᥙᥫᥢ။ ᥐᥨᥢᥰ ᥛᥫᥒᥰ ᥐᥨᥝ ᥞᥥᥴ ᥟᥩᥐᥱ ᥙᥣᥭ။ ᥖᥢᥰ ᥞᥥᥖᥱ ᥑᥧᥢᥴ ᥞᥪᥒᥴ (15)ᥘᥫᥢ။ ᥚᥩᥒᥰ ᥛᥫᥒᥰ ᥛᥢᥰ ᥖᥤ ᥕᥩᥙᥱ ᥖᥦᥙᥱ ᥖᥣᥭ ᥙᥦᥖ ᥛᥫ 1369 ᥘᥢᥳ ᥕᥝᥳ။
ᥙᥤ 1368 ᥛᥫᥒᥰ ᥑᥥᥱ ᥐᥩᥲ ᥔᥣᥭᥴ ᥔᥪᥙᥱ ᥑᥧᥢᥴ ᥛᥫᥒᥰ ᥑᥥᥱ ᥑᥫᥰ ᥞᥫᥢᥰ “ᥛᥤᥒᥱ ” (Ming Dyansty) ᥑᥪᥢᥲ ᥙᥧᥖ။ ᥙᥤ 1369 “ᥒᥫᥢ ᥑᥥᥝᥴ ᥜᥣᥳ ” ᥑᥪᥢᥲ ᥙᥧᥖ ᥞᥣᥒᥲ ᥞᥨᥝᥴ ᥛᥫᥒᥰ ᥛᥣᥝᥰ ᥖᥤ ᥖᥣ ᥔᥨᥙᥱ ᥟᥧᥴ ᥗᥦᥢᥲ။ ᥞᥪᥒᥴ (6)ᥘᥫᥢ ᥐᥩᥭᥰ ᥕᥩᥒᥱ ᥛᥣᥲ ᥑᥣᥲ ᥖᥨᥝ ᥑᥪᥢᥰ ᥞᥣᥒᥰ ᥐᥩᥭᥰ ᥔᥥᥴ ᥘᥩᥢᥰ ᥚᥥᥰ ᥐᥣᥱ။
ᥟᥛᥱ ᥛᥤᥰ ᥒᥫᥢ ᥓᥝᥲ ᥑᥫᥰ ᥑᥧᥢᥴ ᥕᥝᥳ ᥘᥦᥰ ᥙᥤ 1370 ᥘᥢᥳ ᥚᥩᥒᥰ ᥛᥫᥒᥰ ᥓᥩᥛᥰ ᥑᥭᥲ “ᥘᥣᥒᥰ ᥐᥣᥢᥲ ᥑᥛᥰ ᥔᥬᥴ ” ᥟᥢ ᥓᥙᥴ ᥖᥩᥒᥳ ᥔᥫᥴ ᥑᥣᥢᥱ ᥜᥣᥳ ᥐᥣᥱ ᥘᥢᥳ ᥘᥦᥰ ᥐᥣᥱ ᥞᥨᥙᥳ ᥞᥢᥴ ᥘᥧᥐ ᥛᥢᥰ “ᥑᥧᥢᥴ ᥟᥣᥭᥲ ᥙᥧᥰ ᥑᥛᥰ ”။ ᥟᥛᥱ ᥚᥩᥛᥳ ᥙᥩᥒ ᥛᥣᥢᥲ ᥛᥫᥒᥰ ᥕᥝᥳ ᥘᥭᥴ ᥔᥥᥴ ᥞᥬᥲ ᥘᥧᥐ ᥛᥢᥰ “ᥑᥧᥢᥴ ᥙᥧᥰ ᥐᥨᥝᥰ ” ᥛᥣᥰ ᥓᥩᥛᥰ ᥕᥝᥳ။ “ᥑᥧᥢᥴ ᥙᥧᥰ ᥐᥨᥝᥰ ” ᥑᥪᥢᥲ ᥓᥪ ᥙᥥᥢ “ᥔᥫᥴ ᥞᥨᥛᥱ ᥜᥣᥳ ” ᥔᥥᥴ ᥑᥪᥢᥲ ᥙᥧᥖ ᥘᥒ ᥞᥣᥒᥲ ᥞᥨᥝᥴ ᥖᥤ ᥖᥣ ᥔᥨᥙᥱ ᥟᥧᥴ ᥗᥦᥒᥲ။
“ᥔᥫᥴ ᥞᥨᥛᥱ ᥜᥣᥳ ”ᥘᥭᥳ ᥐᥩᥲ ᥟᥛᥱ ᥙᥩᥒ ᥛᥣᥢᥲ ᥙᥩᥒ ᥛᥫᥒᥰ။ ᥐᥧᥛᥱ ᥛᥪᥒᥳ ᥖᥣᥒᥰ ᥛᥨᥢ ᥖᥣᥒᥰ ᥓᥨᥝᥱ ᥐᥝᥰ ᥟᥥᥢᥲ ᥛᥥ ᥕᥤᥒᥰ။ ᥞᥥᥖᥱ ᥑᥨᥝᥴ ᥓᥨᥛᥴ ᥑᥨᥝᥴ ᥚᥧᥰ။ ᥐᥣᥖᥱ ᥘᥣᥲ ᥘᥣᥭᥰ ᥘᥣᥲ ᥐᥥᥒ။ ᥘᥫᥐ ᥟᥝ ᥛᥥ ᥕᥤᥒᥰ ᥖᥭᥱ ᥑᥨᥝᥴ ᥓᥨᥛᥴ ᥑᥝᥲ ᥐᥣᥖᥱ ᥘᥣᥲ ᥐᥥᥒ ᥘᥢᥳ ᥔᥥᥴ ᥘᥩᥢᥰ ᥓᥩᥛᥰ။ ᥖᥥᥱ ᥓᥥᥛ ᥔᥤᥐᥳ ᥞᥤᥐᥳ ᥖᥨᥝᥱ ᥗᥪᥒᥴ ᥛᥥ ᥞᥫᥢᥰ ᥟᥛᥱ ᥝᥭᥳ။ ᥐᥨᥖᥳ ᥘᥧᥐ ᥗᥧᥐᥴ ᥛᥥᥰ ᥙᥫᥢ ᥕᥧᥱ ᥖᥣᥱ ᥔᥥᥱ။ ᥐᥨᥢᥰ ᥛᥫᥒᥰ ᥐᥨᥝ ᥞᥥᥴ ᥛᥫᥱ ᥓᥣᥢᥲ ᥔᥥᥴ ᥟᥩᥐᥱ ᥙᥣᥭ။ ᥙᥤ 1373 ᥘᥢᥳ “ᥔᥫᥴ ᥞᥨᥛᥱ ᥜᥣᥳ ”ᥐᥨᥝ ᥞᥥᥴ ᥙᥣᥭ ᥟᥩᥐᥱ ᥛᥫᥒᥰ ᥐᥣᥱ ᥕᥧᥱ ᥕᥝᥳ။
ᥝᥣᥭᥰ ᥔᥥᥴ “ᥔᥫᥴ ᥞᥨᥛᥱ ᥜᥣᥳ ” ᥙᥣᥭ ᥐᥣᥱ ᥕᥝᥳ ᥚᥩᥒᥰ ᥛᥫᥒᥰ ᥖᥒᥰ ᥘᥣᥭᥴ ᥛᥫᥰ ᥙᥣᥒᥰ ᥓᥝᥲ ᥜᥣᥳ ᥔᥦᥢᥲ ᥝᥤᥴ “ᥔᥫᥴ ᥕᥥᥙᥱ ᥜᥣᥳ ” ᥛᥫᥰ ᥟᥧᥙᥳ ᥙᥫᥒᥱ ᥛᥫᥒᥰ ᥛᥣᥝᥰ။ ᥛᥢᥰ ᥓᥝᥲ ᥑᥣᥭᥳ ᥞᥨᥝᥴ ᥐᥣᥱ ᥙᥨᥐᥰ ᥖᥤ “ᥛᥣᥢᥲ ᥙᥧᥰ ᥐᥛᥱ ”။ ᥔᥫᥴ ᥞᥨᥛᥱ ᥜᥣᥳ ᥔᥛᥳ ᥐᥣᥱ ᥞᥨᥭᥰ ᥞᥩᥒᥳ ᥑᥥᥱ ᥛᥣᥰ ᥚᥦᥢᥴ ᥖᥦᥙᥱ ᥙᥦᥖ ᥘᥦᥰ “ᥔᥫᥴ ᥕᥥᥙᥱ ᥜᥣᥳ ” ᥘᥩᥢᥰ ᥚᥥᥰ ᥐᥣᥱ ᥛᥫ 1374 ᥘᥢᥳ ᥕᥝᥳ။
ᥝᥣᥭᥰ ᥔᥥᥴ “ᥔᥫᥴ ᥕᥥᥙᥱ ᥜᥣᥳ ” ᥘᥩᥢᥰ ᥚᥥᥰ ᥕᥝᥳ ᥔᥫᥴ ᥞᥨᥛᥱ ᥜᥣᥳ ᥕᥧᥱ ᥖᥤ ᥛᥣᥢᥲ ᥙᥧᥰ ᥐᥛᥱ ᥔᥥᥴ ᥟᥧᥙᥳ ᥙᥫᥒᥱ ᥛᥫᥒᥰ ᥛᥣᥝᥰ ᥖᥨᥝᥱ ᥗᥪᥒᥴ ᥙᥤ 1405 ᥘᥢᥳ ᥕᥝᥳ။ ᥔᥫᥴ ᥞᥨᥛᥱ ᥜᥣᥳ ᥛᥤᥰ ᥘᥧᥐ ᥔᥫᥴ ᥒᥣᥛᥱ ᥜᥣᥳ ᥘᥦᥰ ᥔᥫᥴ ᥑᥤᥱ ᥜᥣᥳ ᥘᥭᥴ ᥔᥩᥒᥴ ᥐᥨᥝᥳ။ ᥔᥩᥒᥴ ᥙᥤ ᥘᥩᥒᥳ ᥔᥪᥙᥱ ᥟᥧᥙᥳ ᥙᥫᥒᥱ ᥛᥫᥒᥰ ᥛᥣᥝᥰ ᥔᥥᥴ ᥖᥪᥐᥱ ᥐᥢ ᥖᥒᥰ ᥑᥥᥱ ᥘᥦᥰ ᥙᥤ 1420 ᥘᥢᥳ ᥘᥭᥲ ᥟᥩᥐᥱ ᥙᥣᥭ။ ᥕᥩᥢᥳ ᥘᥢᥳ ᥝᥣᥭᥰ ᥔᥥᥴ ᥑᥣᥭᥳ ᥙᥣᥭ ᥕᥣᥢᥴ ᥝᥥᥒᥰ ᥓᥥ ᥘᥣᥢᥳ ᥕᥝᥳ ᥘᥢᥳ ᥚᥧᥒᥰ ᥛᥧᥢ ᥛᥫᥒᥰ ᥛᥣᥝᥰ ᥘᥭᥲ ᥕᥨᥙ ᥘᥨᥒᥰ ᥐᥣᥱ ᥕᥧᥱ ᥕᥝᥳ။

ᥘᥩᥒ ᥕᥧᥛᥱ ᥗᥪᥴ

ᥘᥩᥒ ᥔᥩᥢᥱ ᥐᥣᥱ ᥘᥣᥰ ᥔᥥᥴ ᥞᥥᥖᥱ ᥟᥣᥒᥰ ᥘᥥᥐᥱ ᥘᥣᥛᥱ ᥘᥭᥴ ᥘᥢᥳ ᥐᥨᥢᥰ ᥙᥣᥢ ᥛᥬᥱ ᥕᥣᥛᥰ ᥘᥥᥝ ᥖᥤᥴ ᥕᥧᥛᥱ ᥕᥣᥙᥱ ᥔᥥᥴ ᥖᥣᥳ ᥘᥩᥒ ᥘᥣᥐᥱ ᥘᥣᥭᥰ ᥔᥧᥐᥳ ᥕᥧᥒᥲ ᥔᥛᥳ ᥙᥥᥢ ᥓᥩᥛᥰ ᥖᥥᥳ ᥕᥧᥱ ᥘᥭᥴ ᥘᥢᥳ ᥑᥧᥢᥴ ᥛᥫᥒᥰ ᥛᥣᥝᥰ ᥔᥪᥙᥱ ᥙᥣᥢ ᥘᥪᥢᥰ ᥔᥫᥴ ᥑᥣᥢᥱ ᥜᥣᥳ ᥙᥥᥢ ᥔᥣᥐ ᥔᥥᥱ ᥘᥥᥴ ᥝᥭᥳ ᥕᥧᥱ။
ᥖᥒᥲ ᥟᥝ ᥑᥣᥭᥳ ᥐᥣᥱ ᥕᥧᥱ ᥖᥤ “ᥖᥣ ᥔᥨᥙᥱ ᥟᥧᥴ ”ᥕᥝᥳ ᥘᥭᥲ ᥞᥢᥴ ᥛᥧᥢ ᥟᥧᥴ ᥛᥣᥢᥲ ᥛᥫᥒᥰ ᥕᥨᥙ ᥘᥨᥒᥰ ᥖᥥᥳ ᥖᥥᥳ။ ᥐᥣ ᥙᥭᥱ ᥑᥣᥭᥳ ᥞᥨᥝᥴ ᥟᥩᥐᥱ ᥝᥥᥒᥰ ᥖᥣ ᥔᥨᥙᥱ ᥟᥧᥴ ᥐᥣᥱ ᥘᥢᥳ ᥟᥣᥱ ᥕᥧᥳ “ᥑᥧᥢᥴ ᥛᥫᥒᥰ ” ᥟᥛᥱ ᥕᥪᥢᥰ ᥕᥣᥝᥰ။ ᥛᥫᥒᥰ ᥔᥧᥐᥳ ᥕᥧᥒᥲ ᥕᥧᥱ ᥖᥣᥱ ᥔᥥᥱ။
ᥛᥫᥒᥰ ᥛᥣᥝᥰ ᥟᥢ ᥙᥥᥢ ᥞᥨᥝᥴ ᥔᥦᥒᥴ ᥖᥭᥰ ᥔᥥᥴ ᥘᥪᥰ ᥘᥒᥴ ᥐᥪᥐᥰ ᥙᥪᥢᥰ ᥝᥭᥳ ᥕᥧᥱ ᥘᥢᥳ ᥔᥣᥭᥴ ᥔᥪᥙᥱ ᥑᥫᥰ ᥑᥧᥢᥴ ᥔᥛᥳ ᥙᥨᥝᥰ ᥘᥭᥲ ᥑᥣᥖᥱ ᥝᥣᥭᥰ ᥔᥥᥴ ᥙᥥᥢ ᥖᥬᥲ ᥔᥦᥢᥴ ᥝᥤᥴ ᥐᥣᥱ ᥘᥢᥳ ᥙᥥᥢ ᥕᥩᥢᥳ ᥘᥥᥐᥱ ᥘᥣᥛᥱ ᥞᥪᥴ ᥙᥥᥢ ᥕᥩᥢᥳ ᥟᥛᥱ ᥐᥖᥳ ᥑᥦᥢᥱ ᥞᥪᥴ ᥙᥥᥢ ᥕᥩᥢᥳ ᥔᥒᥴ ᥘᥭᥴ ᥐᥩᥲ ᥝᥨᥢᥳ ᥔᥩᥢᥱ ᥖᥦᥙᥱ ᥖᥖᥴ ᥟᥝ ᥞᥒᥰ ᥐᥩᥭᥰ ᥔᥥᥴ ᥐᥛᥰ။

ᥙᥫᥒ ᥟᥤᥒ

<div class="reflist reflist-columns references-column-width " style="column-width: <ref> ᥙᥪᥢᥳ ᥑᥫᥰ ᥖᥭᥰ ᥘᥦᥲ ᥙᥪᥢᥰ ᥛᥫᥒᥰ ᥖᥭᥰ၊ ᥑᥫᥰ ᥔᥦᥢᥴ၊ ᥘᥣᥲ

">

t