ᥑᥣᥛᥰ ᥘᥣᥭᥴ ᥚᥫᥢᥴ ᥑᥦᥐᥱ

ᥟᥫ ! ᥛᥫ ᥘᥭᥳ ᥙᥥᥢ ᥛᥫ ᥘᥤ ᥝᥢᥰ ᥐᥣ ᥛᥫ ᥔᥣᥱ ᥝᥢᥰ ᥞᥨᥒᥴ,ᥝᥢᥰ ᥟᥢ ᥙᥫᥢ ᥞᥤᥛᥴ ᥐᥢ ᥖᥒᥲ ᥚᥫᥢᥴ ᥑᥦᥐᥱ ᥟᥝ ᥛᥥᥰ.ᥘᥧᥒᥰ ᥚᥣᥰ ᥐᥣᥱ ᥞᥝᥰ ᥑᥝᥴ ᥕᥒᥰ ᥐᥣᥱ ᥞᥙ ᥘᥭᥲ ᥘᥧᥐ ᥙᥬᥳ ᥘᥣᥢᥴ ᥘᥣᥒᥰ ᥛᥣᥰ ᥗᥪᥒᥴ ᥞᥩᥒᥲ ᥞᥫᥢᥰ ᥐᥣᥒ ᥕᥥᥰ,ᥕᥒᥰ ᥛᥣᥰ ᥞᥙ ᥞᥩᥒᥳ ᥘᥩᥒᥳ ᥙᥤ ᥗᥝᥲ ᥐᥥᥱ ᥘᥬᥰ ᥛᥣᥢᥲ ᥘᥬᥰ ᥔᥨᥢᥴ, ᥛᥣᥢᥲ ᥖᥬᥲ ᥘᥣᥰ ᥘᥫᥴ,ᥓᥒᥱ ᥛᥣᥰ ᥖᥒᥲ ᥚᥫᥢᥴ ᥘᥣᥭᥰ ᥙᥣᥭᥰ ᥚᥫᥢᥴ ᥑᥦᥐᥱ,ᥓᥒᥱ ᥞᥝᥰ ᥗᥝᥲ ᥛᥧᥱ ᥙᥧᥱ ᥙᥨᥝ ᥓᥫᥰ ᥘᥒ ᥘᥫᥴ ᥜᥧᥐ,ᥘᥧᥐ ᥘᥫᥴ ᥓᥥᥢ ᥛᥣᥰ ᥗᥤᥒᥰ ᥕᥣᥰ ᥛᥣᥒᥱ ᥐᥣᥱ ᥘᥣᥱ:ᥘᥧᥐ ᥘᥭᥳ ᥐᥣᥱ ᥝᥢᥰ ᥖᥣ ᥛᥫᥰ ᥘᥣᥲ ᥐᥢᥲ ᥘᥣᥲ ᥛᥫᥰ ᥞᥪᥒᥴ,ᥞᥬᥲ ᥔᥩᥒᥴ ᥑᥫᥴ ᥐᥨᥙ ᥐᥢ ᥘᥒᥱ ᥗᥧᥱ,ᥐᥧ ᥐᥢ ᥘᥒᥱ ᥛᥩᥢᥴ,ᥔᥒᥴ ᥗᥩᥢᥴ ᥕᥣᥱ ᥞᥬᥲ ᥘᥭᥲ,ᥚᥣᥳ ᥗᥩᥭᥱ ᥕᥣᥱ ᥞᥬᥲ ᥕᥣᥢᥴ,ᥖᥒᥰ ᥞᥫᥢᥰ ᥖᥒᥰ ᥕᥥᥰ ᥞᥬᥲ ᥜᥢᥲ ᥐᥢ ᥘᥒᥱ ᥓᥫᥐ ᥞᥫᥰ ,ᥜᥫᥴ ᥐᥢ ᥘᥒᥱ ᥓᥫᥐ ᥓᥣᥒᥳ, ᥚᥥᥰ ᥔᥦᥢᥴ ᥙᥫᥒ ᥕᥣᥱ ᥛᥣᥰ ᥞᥬᥲ,ᥞᥬᥲ ᥘᥭᥲ ᥐᥤᥢ ᥘᥭᥲ ᥝᥣ, ᥞᥬᥲ ᥛᥤᥰ ᥘᥧᥐ ᥘᥤ ᥘᥣᥒᥰ ᥐᥣ,ᥞᥪᥒᥴ ᥘᥣᥢᥰ ᥕᥣᥱ ᥞᥬᥲ ᥘᥭᥲ ᥑᥧᥢᥱ ᥔᥝᥲ ᥛᥝᥰ ᥛᥩᥒᥴ,ᥖᥒᥰ ᥔᥩᥒᥴ ᥞᥬᥲ ᥞᥧᥳ ᥗᥝᥲ ᥞᥧᥳ ᥐᥥᥱ,ᥕᥣᥱ ᥙᥥᥱ ᥙᥦᥖ ᥔᥥᥱ ᥘᥥᥱ ᥖᥫᥒᥰ ᥐᥣᥰ,ᥞᥬᥲ ᥞᥧᥳ ᥐᥖ ᥘᥤᥐ ᥐᥣ ᥑᥣᥰ ᥟᥥᥐᥱ ᥑᥨᥝ ᥔᥨᥝᥲ,ᥞᥬᥲ ᥓᥩᥛᥰ ᥓᥨᥝᥲ ᥟᥧᥙ ᥙᥖ ᥖᥥᥱ ᥗᥧᥒᥰ ᥛᥫᥒᥰ,ᥔᥒᥴ ᥞᥥᥖᥱ ᥘᥣᥰ ᥐᥩᥲ ᥞᥬᥲ ᥘᥭᥲ ᥛᥣᥢᥴ ᥑᥝᥲ,ᥖᥝᥲ ᥙᥭ ᥗᥬᥴ ᥐᥩᥲ ᥞᥬᥲ ᥘᥭᥲ ᥔᥧᥢᥱ ᥗᥣᥒᥱ,ᥖᥣᥒᥰ ᥘᥤ ᥞᥬᥲ ᥘᥒᥱ ᥘᥫᥢ ᥔᥤᥙᥴ ᥞᥣᥲ,ᥖᥣᥒᥰ ᥞᥐᥳ ᥞᥬᥲ ᥘᥒᥱ ᥐᥣᥲ ᥔᥣᥝᥰ ᥝᥢᥰ,ᥐᥤᥒᥱ ᥙᥨᥝ ᥐᥤᥒᥱ ᥛᥥ ᥞᥬᥲ ᥗᥪᥒᥴ ᥗᥝᥲ ᥟᥥᥐᥱ ᥗᥪᥒᥴ ᥙᥣᥭ , ᥞᥬᥲ ᥓᥣᥒ ᥖᥨᥒᥳ ᥘᥣᥭᥴ ᥘᥨᥝᥱ ᥔᥥᥱ ᥙᥤ ᥘᥩᥒᥳ,ᥞᥬᥲ ᥔᥩᥒᥴ ᥑᥫᥴ ᥙᥥᥢ ᥚᥨᥝᥴ ᥞᥨᥛ ᥗᥝᥲ ᥛᥥᥰ ᥞᥨᥛ ᥐᥥᥱ ᥐᥣᥱ ᥖᥒᥰ ᥞᥪᥒᥴ ᥖᥒᥰ ᥞᥤᥰ,ᥘᥤ ᥞᥝᥳ! ᥘᥤ ᥞᥝᥳ ! ᥘᥧᥐ ᥘᥦᥰ !