ᥑᥣᥒᥱ ᥔᥤᥲ ᥖᥒᥰ ᥕᥧᥒᥰ
ᥑᥣᥒᥱ ᥔᥤᥲ ᥖᥒᥰ ᥕᥧᥒᥰ
ᥛᥤᥰ ᥑᥣᥒᥱ ᥔᥤᥲ ᥖᥨᥝ ᥘᥫᥒ ᥖᥫᥐ ᥘᥩᥢᥰ ᥝᥢᥰ ᥖᥤ ᥖᥬᥲ ᥖᥨᥢᥲ ᥛᥭᥳ ᥞᥭᥳ，ᥕᥧᥒᥰ ᥖᥨᥝ ᥘᥫᥒ ᥛᥥᥢ ᥛᥣᥰ ᥕᥧᥱ ᥖᥤ ᥞᥤᥛᥰ ᥛᥤᥢᥲ ᥞᥧᥴ ᥛᥢᥰ ᥞᥩᥒᥳ ᥞᥧᥢ ᥝᥧᥢ。ᥛᥢᥰ ᥕᥒ ᥘᥩᥢᥰ ᥘᥭᥲ ᥘᥙᥴ，ᥓᥝᥱ ᥞᥪᥖᥴ ᥘᥣᥱ ᥕᥧᥒᥰ：“ᥕᥧᥒᥰ ᥞᥣ ᥔᥫᥝ ᥖᥫᥭᥳ，ᥛᥬᥰ ᥙᥭᥱ ᥛᥣᥰ ᥞᥩᥢ ᥖᥤ ᥙᥣᥒ ᥘᥣᥲ ᥐᥝ ᥞᥭᥳ，ᥔᥒᥴ ᥝᥣ ᥛᥬᥰ ᥟᥛᥱ ᥙᥣᥭ，ᥐᥝ ᥖᥤᥴ ᥟᥝ ᥛᥬᥰ ᥕᥥᥙᥱ ᥙᥥᥢ ᥛᥧᥢ ᥞᥝᥳ。”ᥕᥧᥒᥰ ᥕᥨᥛᥳ ᥑᥨᥝᥴ ᥞᥦᥴ ᥑᥣᥢᥴ ᥝᥣ：“ᥟᥫᥭᥰ ᥐᥨᥝᥳ ᥑᥣᥒᥱ ᥘᥤᥲ ᥞᥫᥭᥰ! ᥙᥭᥱ ᥖᥣᥢᥲ ᥑᥣᥛᥰ ᥟᥨᥝᥰ ᥟᥣᥰ，ᥙᥭᥱ ᥝᥣ ᥛᥬᥰ ᥖᥤᥴ ᥟᥝᥐᥝ ᥕᥥᥙᥱ ᥙᥥᥢ ᥛᥧᥢ，ᥐᥩᥭᥰ ᥟᥢ ᥖᥨᥝ ᥑᥤᥒᥰ ᥐᥝ ᥛᥬᥰ ᥐᥩᥲᥕᥒ ᥓᥣᥒ ᥞᥪᥴ ᥔᥦᥝᥲ ᥘᥭᥲ ᥓᥨᥝᥲ。”ᥑᥣᥒᥱ ᥔᥤᥲ ᥑᥨᥝᥴ ᥑᥣᥳ ᥑᥣᥳ ᥘᥨᥒᥴ ᥝᥣ：“ᥚᥫᥭᥳ! ᥞᥣᥒ ᥘᥒᥱ ᥛᥬᥰ ᥐᥩᥭᥰ ᥖᥫ ᥑᥫ ᥛᥖᥴ，ᥖᥤᥴ ᥞᥪᥴ ᥛᥣᥰ ᥑᥥᥒᥱ ᥖᥨᥝ ᥐᥝ ᥘᥭᥲ？”ᥕᥧᥒᥰ ᥝᥣ：“ᥑᥣᥛᥰ ᥘᥭᥳ ᥙᥥᥢ ᥛᥬᥰ ᥖᥣᥢᥲ，ᥝᥣᥭᥰ ᥛᥣᥰ ᥙᥭᥱ ᥘᥥᥰ ᥐᥝ ᥘᥣᥰ。”ᥐᥛᥰ ᥘᥭᥳ ᥖᥒᥰ ᥔᥩᥒᥴ ᥓᥝᥱ ᥖᥨᥝᥰ ᥐᥢ ᥖᥤ ᥖᥬᥲ ᥖᥨᥢᥲ ᥛᥭᥳ。ᥕᥧᥒᥰ ᥛᥥᥢ ᥐᥣᥱ ᥓᥙᥴ ᥘᥫᥴ ᥜᥣᥭᥱ ᥘᥣᥲ ᥑᥣᥒᥱ ᥔᥤᥲ，ᥑᥣᥒᥱ ᥔᥤᥲ ᥚᥤ ᥚᥣ ᥟᥝ ᥘᥥᥙ ᥛᥢᥰ ᥝᥐ，ᥕᥧᥒᥰ ᥜᥣᥭᥰ ᥙᥤᥐᥴ ᥛᥥᥢ ᥙᥣᥭ，ᥔᥛᥳ ᥐᥣᥱ ᥓᥙᥴ ᥘᥫᥴ ᥞᥧᥰ ᥘᥒ ᥛᥢᥰ，ᥑᥣᥒᥱ ᥔᥤᥲ ᥔᥛᥳ ᥚᥤ ᥚᥣ ᥓᥣᥝᥴ，ᥕᥧᥒᥰ ᥔᥛᥳ ᥛᥥᥢ ᥙᥣᥭ……ᥞᥥᥖᥱ ᥓᥫᥭᥳ，ᥕᥧᥒᥰ ᥓᥙᥴ ᥗᥬᥴ，ᥑᥣᥒᥱ ᥔᥤᥲ ᥓᥝᥱ ᥝᥐ ᥗᥢᥲ。
ᥖᥨᥝᥰ ᥐᥣᥱ ᥖᥨᥝᥰ ᥛᥣᥰ，ᥕᥧᥒᥰ ᥕᥒ ᥛᥣᥖᥱ ᥕᥒ ᥔᥧᥛᥰ ᥔᥒᥴ，ᥔᥩᥭᥰ ᥝᥣ ᥑᥣᥒᥱ ᥔᥤᥲ ᥞᥣᥒᥰ ᥐᥩᥭᥰ ᥝᥐ ᥞᥣᥒᥰ ᥐᥩᥭᥰ ᥗᥢᥱ ᥙᥩᥰ ᥙᥥᥢ ᥘᥫᥖ ᥖᥒᥰ ᥖᥨᥝ。
ᥟᥣ ᥙᥧᥛᥱ ᥑᥫᥰ ᥘᥭᥳ，ᥔᥩᥢᥴ ᥘᥥᥴ ᥞᥬᥲ ᥞᥝᥰ ᥖᥒᥰ ᥘᥣᥭᥴ ᥞᥧᥳ ᥝᥣ：ᥛᥣᥝᥱ ᥝᥣ ᥞᥥᥖᥱ ᥔᥒᥴ ᥐᥩᥰ，ᥙᥭᥱ ᥟᥨᥝᥰ ᥟᥣᥖ ᥟᥣᥰ ᥐᥤᥰ ᥚᥦᥝᥴ，ᥔᥧᥲ ᥓᥣᥒ ᥖᥦᥐ ᥖᥨᥝ ᥙᥪᥴ ᥓᥝᥲ ᥖᥒᥰ ᥓᥣᥒ ᥘᥨᥝᥱ ᥔᥥᥱ ᥙᥫᥢ。
ᥔᥪᥲᥓᥤᥢ ᥑᥧᥢ ᥓᥥᥙᥱ ᥞᥩᥛᥴ