ᥐᥭᥱ ᥘᥛᥳ ᥖᥒᥰ ᥘᥨᥐ ᥐᥦᥒᥲ ᥑᥩᥢᥱ ᥟᥩᥒᥲ ᥐᥢ
ᥛᥫ ᥓᥝᥳ ᥓᥝᥳ ᥘᥢᥳ，ᥐᥭᥱ ᥘᥛᥳ ᥕᥧᥱ ᥘᥫᥴ ᥘᥩᥭ，ᥘᥨᥐ ᥐᥦᥒᥲ ᥕᥧᥱ ᥘᥬᥰ ᥖᥨᥒ。ᥛᥤᥰ ᥝᥢᥰ ᥘᥫᥒ，ᥘᥨᥐ ᥐᥦᥒᥲ ᥔᥭᥳ ᥞᥦᥴ ᥟᥤᥛᥱ ᥟᥤᥛᥱ ᥘᥩᥢᥰ ᥟᥩᥛᥱ ᥘᥦᥖᥱ ᥝᥭᥳ ᥔᥩᥢᥲ ᥑᥨᥢᥴ ᥞᥣᥒᥰ ᥛᥢᥰ，ᥘᥙᥴ ᥖᥣ ᥚᥤᥴ ᥚᥨᥝᥴ ᥞᥦᥴ ᥟᥩᥛᥱ ᥘᥦᥖᥱ ᥝᥭᥳ，ᥙᥥᥝᥱ ᥓᥬ ᥙᥥᥝᥱ ᥑᥨᥝᥰ ᥖᥥᥳ ᥖᥥᥳ。ᥟᥦᥒᥲ ᥘᥦᥒᥲ ᥛᥢᥰ ᥓᥧᥰ ᥝᥦᥢᥴ ᥘᥧᥐ ᥛᥣᥰ ᥙᥩᥒᥳ ᥝᥣ：“ᥘᥦᥖᥱ ᥖᥣᥭ ᥓᥣᥳ ᥞᥭᥳ ᥙᥥᥳ ᥛᥣᥰ ᥛᥭᥲ ᥘᥨᥒᥴ ᥛᥭᥲ ᥘᥣᥒᥴ ᥑᥭᥳ!” ᥛᥢᥰ ᥑᥣᥒ ᥓᥣᥳ ᥑᥣᥒ ᥑᥬᥲ ᥓᥬ ᥖᥤᥴ ᥐᥣᥱ ᥔᥩᥢ ᥞᥨᥛ ᥗᥬᥴ，ᥛᥥᥢ ᥐᥣᥱ ᥖᥥᥖᥱ ᥕᥫᥒᥰ ᥛᥭᥳ ᥚᥤᥝᥴ ᥝᥭᥳ，ᥘᥨᥛᥰ ᥙᥝᥱ ᥖᥨᥢᥲ ᥛᥭᥳ ᥔᥣᥒᥰ ᥘᥪᥒᥴ ᥐᥣᥱ ᥞᥣᥭᥰ ᥛᥣᥰ，ᥔᥣᥭᥴ ᥘᥦᥖᥱ ᥔᥛᥳ ᥖᥩᥒᥱ ᥑᥝᥲ ᥘᥬᥰ ᥐᥨᥝ ᥛᥭᥳ ᥚᥤᥝᥴ ᥛᥣᥰ，ᥘᥨᥐ ᥐᥦᥒᥲ ᥔᥛᥳ ᥓᥣᥳ ᥝᥣ：“ᥐᥣᥛᥱ ᥞᥨᥝᥴ ᥞᥝᥲ，ᥛᥥᥢ ᥐᥣᥱ ᥖᥥᥖᥱ ᥗᥬᥴ ᥐᥩᥰ ᥘᥦᥖᥱ ᥖᥩᥒᥱ ᥓᥨᥝᥲ。”
ᥘᥨᥐ ᥐᥦᥒᥲ ᥙᥨᥝᥰ ᥛᥥᥢ ᥓᥩᥖᥱ ᥙᥣᥲ ᥛᥫᥒᥰ ᥘᥫᥒ，ᥗᥬᥴ ᥐᥩᥰ ᥐᥩᥭᥰ ᥙᥥᥢ ᥕᥫᥒᥰ ᥛᥭᥳ ᥚᥤᥝᥴ ᥕᥫᥒᥰ ᥛᥭᥳ ᥔᥣᥒᥰ，ᥛᥢᥰ ᥖᥢᥱ ᥞᥫᥱ ᥓᥪᥙ ᥞᥫᥱ ᥓᥤ ᥛᥥᥢ ᥞᥩ ᥛᥩᥭ ᥛᥦᥢᥳ，ᥟᥛᥱ ᥑᥣᥴ ᥓᥨᥝᥲ ᥕᥫᥒᥰ ᥛᥭᥳ ᥟᥩᥒᥲ ᥔᥩᥢ ᥞᥨᥛ，ᥛᥢᥰ ᥓᥒᥱ ᥖᥥᥱ ᥜᥣᥳ ᥖᥣᥳ ᥚᥤᥴ：“ᥖᥨᥒ ᥛᥫᥒᥰ ᥞᥭᥳ，ᥐᥝ ᥞᥪᥴ ᥐᥩᥲ ᥕᥒ ᥑᥬᥲ ᥕᥧᥱ ᥞᥝᥳ。”
ᥘᥨᥐ ᥘᥦᥒᥲ ᥓᥝᥱ ᥛᥥᥢ ᥐᥣᥱ ᥘᥫᥴ ᥘᥩᥭ ᥖᥒᥰ ᥐᥭᥱ ᥘᥛᥳ ᥐᥧᥛ ᥙᥩᥒ ᥐᥢ ᥖᥤᥴ ᥑᥩᥢᥱ ᥟᥩᥒᥲ ᥐᥢ。ᥗᥩᥒᥴ ᥖᥥᥳ ᥐᥭᥱ ᥘᥛᥳ ᥙᥨᥝᥰ ᥘᥐ ᥓᥨᥛᥰ ᥘᥬᥰ ᥓᥬ ᥝᥭᥳ ᥞᥣᥒᥰ ᥐᥩᥭᥰ，ᥙᥨᥝᥰ ᥟᥣᥒᥲ ᥟᥥᥴ ᥑᥬᥲ ᥘᥨᥒᥰ ᥖᥨᥒ ᥖᥒᥰ ᥞᥪᥒᥴ ᥖᥒᥰ ᥞᥤᥰ。ᥕᥧᥱ ᥘᥫᥴ ᥘᥩᥭ ᥘᥤ ᥕᥧᥱ，ᥘᥨᥒ ᥛᥭᥳ ᥗᥤᥱ ᥟᥤᥖᥴ ᥔᥤᥖᥴ ᥟᥩᥢᥱ，ᥕᥥᥢ ᥓᥩᥛᥴ ᥚᥩᥛᥴ，ᥐᥩᥭᥰ ᥝᥣ ᥘᥤ ᥐᥨᥝ ᥝᥣᥴ ᥘᥭᥰ ᥖᥒᥰ ᥔᥫᥴ ᥗᥝᥴ，ᥙᥨᥝᥰ ᥟᥛᥱ ᥜᥣᥒᥳ ᥐᥩᥭᥰ ᥓᥨᥝᥲ ᥑᥝᥴ ᥐᥣᥙ ᥐᥤᥢ。ᥕᥧᥱ ᥘᥬᥰ ᥖᥨᥒ ᥛᥫᥒᥰ ᥙᥦᥐ ᥝᥣ ᥛᥤᥰ ᥒᥧᥰ，ᥐᥩᥭᥰ ᥝᥣ ᥑᥝᥲ ᥘᥛᥳ ᥛᥣᥐ ᥘᥫᥒᥱ，ᥛᥨᥒᥲ ᥛᥦᥢᥰ ᥘᥛᥴ ᥘᥣᥭᥴ，ᥑᥬᥲ ᥐᥤᥢ ᥔᥒᥴ ᥛᥤᥰ ᥔᥒᥴ，ᥘᥩᥒ ᥐᥤᥢ ᥖᥣᥒᥰ ᥕᥦᥛᥳ ᥘᥦᥛᥰ ᥒᥣᥭ，ᥞᥧᥙ ᥕᥣᥰ ᥓᥨᥝᥲ ᥘᥩᥒ ᥘᥤ ᥛᥥᥝᥰ ᥘᥭᥳ ᥚᥬᥴ ᥕᥒ ᥓᥨᥛᥰ？ᥐᥭᥱ ᥘᥛᥳ ᥖᥒᥰ ᥘᥨᥐ ᥐᥦᥒᥲ ᥐᥧᥛ ᥐᥢ ᥘᥤ ᥔᥥᥴ，ᥔᥒᥱ ᥑᥣᥛᥰ ᥝᥭᥳ ᥔᥣᥖ ᥔᥣᥖ ᥘᥣᥰ ᥘᥣᥰ，ᥑᥩᥢᥱ ᥖᥒᥰ ᥞᥪᥒᥴ ᥖᥒᥰ ᥕᥣᥝᥰ ᥚᥬᥴ ᥙᥭᥱ ᥘᥭᥲ ᥚᥤᥖᥴ ᥓᥬ。
ᥝᥢᥰ ᥑᥩᥢᥱ ᥟᥩᥒᥲ ᥐᥢ ᥘᥢᥳ，ᥐᥭᥱ ᥘᥛᥳ ᥓᥨᥛᥰ ᥓᥨᥛᥰ ᥔᥫᥰ ᥔᥫᥰ ᥙᥨᥝᥰ ᥘᥨᥒᥰ ᥘᥩᥭ ᥛᥣᥰ ᥓᥝᥳ ᥓᥝᥳ，ᥛᥢᥰ ᥞᥢᥴ ᥖᥨᥒ ᥐᥣᥒᥲ ᥘᥛᥳ ᥔᥐᥴ ᥔᥬᥴ，ᥘᥬᥰ ᥘᥣᥰ ᥛᥨᥒᥲ ᥛᥦᥒᥰ ᥗᥣᥰ ᥙᥨᥒ ᥓᥬ ᥘᥭᥲ ᥐᥤᥢ，ᥟᥧᥳ ᥖᥧᥳ ᥔᥣᥛᥴ ᥑᥣᥱ，ᥓᥤᥒᥱ ᥛᥢᥱ ᥖᥣᥳ ᥟᥧᥳ ᥖᥧᥳ、ᥝᥧᥖ ᥔᥢᥱ ᥖᥣᥳ ᥟᥧᥳ ᥖᥧᥳ，ᥞᥥᥱ ᥛᥢᥱ ᥖᥣᥳ ᥞᥧᥳ ᥖᥧᥳ，ᥐᥧ ᥑᥤᥒᥱ ᥐᥧ ᥛᥤᥰ ᥖᥣᥒᥰ ᥐᥤᥢ，ᥕᥒ ᥖᥙ ᥘᥭᥲ ᥓᥦᥝ ᥘᥦᥒᥴ ᥔᥒᥴ，ᥙᥥᥢ ᥔᥨᥙᥱ ᥙᥪᥴ ᥓᥝᥲ，ᥓᥨᥛᥰ ᥔᥫᥰ ᥔᥥᥴ ᥞᥩᥒᥳ ᥝᥣ：“ᥓᥨᥝᥲ ᥞᥝᥳ，ᥓᥨᥝᥲ ᥞᥝᥳ。”
ᥘᥨᥐ ᥐᥦᥒᥲ ᥑᥪᥢᥲ ᥘᥩᥭ ᥐᥣᥱ ᥔᥥᥴ，ᥕᥒ ᥕᥧᥱ ᥘᥭᥲ ᥛᥧᥖ，ᥘᥦᥛᥰ ᥖᥣᥒᥰ ᥐᥤᥢ ᥞᥥᥖᥱ ᥕᥣᥙᥱ，ᥟᥩᥐᥱ ᥛᥣᥱ ᥟᥩᥐᥱ ᥞᥦᥒᥰ ᥐᥣᥱ ᥘᥦᥛᥰ ᥕᥒᥰ ᥟᥛᥱ ᥟᥤᥛᥱ ᥖᥩᥒᥳ，ᥕᥒ ᥛᥤᥰ ᥕᥣᥛᥰ ᥘᥫᥲ ᥔᥒᥴ，ᥞᥥᥖᥱ ᥓᥫᥭᥳ ᥐᥨᥝᥱ ᥐᥣᥱ ᥛᥫ ᥛᥫ ᥝᥢᥰ ᥝᥢᥰ，ᥕᥧᥱ ᥘᥤ ᥝᥢᥰ ᥖᥣᥢᥱ ᥕᥧᥱ ᥘᥤ ᥙᥤ，ᥚᥤᥖᥴ ᥓᥬ ᥘᥨᥒᥴ ᥚᥤᥖᥴ ᥓᥬ ᥘᥣᥒᥴ，ᥐᥩᥭᥰ ᥝᥣ，ᥐᥩᥭᥰ ᥘᥭᥲ ᥖᥣᥒᥰ ᥛᥬᥴ ᥓᥬ ᥞᥝᥳ，ᥟᥛᥱ ᥓᥣᥒ ᥞᥪᥴ ᥞᥥᥖᥱ，ᥛᥢᥰ ᥗᥨᥭᥲ ᥓᥬ ᥕᥬᥱ ᥔᥥᥴ ᥞᥩᥒᥳ ᥝᥣ：“ᥚᥤᥖᥴ ᥓᥬ ᥖᥥᥳ ᥖᥥᥳ，ᥚᥥᥖᥴ ᥓᥬ ᥖᥥᥳ ᥖᥥᥳ。”
ᥙᥫ ᥘᥭᥴ ᥖᥭᥰ ᥞᥝᥰ ᥝᥣ ᥐᥨᥝᥳ ᥘᥬ ᥐᥨᥢᥰ ᥘᥬ ᥗᥧᥐᥴ ᥘᥨᥝᥴ ᥓᥨᥝᥲ ᥞᥨᥝᥴ ᥓᥬ ᥘᥢᥳ ᥓᥝᥱ ᥝᥣ：ᥓᥨᥝᥲ ᥞᥩ ᥙᥨᥝᥰ ᥘᥒᥱ ᥐᥭᥱ ᥘᥛᥳ。ᥖᥭᥰ ᥞᥝᥰ ᥓᥝᥱ ᥞᥥᥖᥱ ᥓᥫᥭᥳ ᥔᥪᥙ ᥐᥢ ᥑᥭ ᥐᥧ ᥐᥣᥙ ᥐᥧ ᥙᥣᥢ ᥞᥝᥳ。
ᥛᥧᥒᥱ ᥔᥫᥢᥳ ᥔᥤᥢᥱ ᥓᥥᥙᥱ ᥞᥩᥛᥴ